«رەال مادريد» فۋتبول كلۋبىنىڭ قورعاۋشىسى مارسەلو باسشىلىقتان ءوزىن «يۋۆەنتۋس» فۋتبول كلۋبىنا ساتۋدى تالاپ ەتتى دەپ حابارلايدى Qamshy.kz اقپارات اگەنتتىگى.

تانىمال ويىنشى ماۋسىم ايىندا ەمەس، كەيىنگى جىلدىڭ قاڭتار ايىنان باستاپ «يۋۆەنتۋستىڭ»  قۇرامىندا ويناعىسى كەلەتىنىن جەتكىزدى. ول «يۋۆەنتۋستىڭ» ءوزىن قۋانا-قۋانا ساتىپ الاتىنىن بىلەدى، ءوزى دە اتالمىش كوماندادا ويناۋعا اسىق، سول سەبەپتى ۋاقىت جوعالتقىسى كەلمەيدى ەكەن. بۇل جاعداي «رەال مادريد» فۋتبول كلۋبىنىڭ پرەزيدەنتى پەرەسكە اۋىر سوققى بولدى. سەبەبى «رەال ءمادريدتىڭ»  اتاعى بۇرىنعىداي جەر جارىپ تۇرعان جوق. ءقازىردىڭ وزىندە رەالدىق ويىنشىلار 9 ويىننىڭ ۇشەۋىن جەڭىلىسپەن اياقتادى. سونىمەن بىرگە كوپتەگەن جاس چەمپيونداردىڭ «رەال مادريدكە» دەگەن قىزىعۋشىلىعى بۇرىنعىداي ەمەس. ال پەرەس ءوزى قالاعان سپورتشىنى زورلىقپەن ۇستاپ تۇرا المايدى. ەگەر مارسەلو قالاسا كەلەسى جىلى رونالدۋ مەن مارسەلونىڭ قاتىسۋمەن وتكەن ويىندى تاماشالاي الامىز. بۇل رونالدۋ مەن مارسەلونىڭ جانكۇيەرلەرى ءۇشىن قۋانىشتى جاڭالىق بولعالى تۇر.

♦تانىمال فۋتبولشى رونالدۋدىڭ باسى داۋعا قالدى (فوتو)

ەسكە سالا كەتەيىك، بيىل جازدا مارسەلونىڭ جاقىن ارالاساتىن دوسى كريشتيانۋ رونالدۋ «يۋۆەنتۋس» قۇراماسىنا اۋىسقان بولاتىن. كەيىن مارسەلو دا ءوز دوسىنىڭ سوڭىنان ەرىپ، «يۋۆەنتۋس» فۋتبول كلۋبىنا اۋىسۋى مۇمكىن دەگەن سىبىس تارادى. سەبەبى فۋتبول جانكۇيەرلەرى رونالدۋ مەن مارسەلونىڭ اراسىنداعى دوستىقتىڭ بەرىك ءارى ەرەكشە ەكەنىن بىلەتىن. ولار ويىن كەزىندە دە، ويىننان تىس ۋاقىتتا دا ەكى فۋتبولشىنىڭ دوس ءسۇيسىنىپ، دۇشپان كۇيىنەتىندەي دوستار.

مارسەلو 2009 جىلى مادريد قالاسىنا ەندى كوشىپ كەلگەن رونالدۋعا كوپ كومەك كورسەتتى. سودان بەرى قانشا ۋاقىت زىرعىپ وتسە دە دوستىقتارى نىعايا ءتۇستى. ولاردىڭ دوستىعى كلۋبتىڭ باسشىلىعىنا ۇنايتىن، ويتكەنى الاڭدا ءبىر-بىرىن ءسوزسىز ءتۇسىنىپ، جۇيەلى ويىن كورسەتەتىن. كريشتيانۋ رونالدۋدىڭ مىنەزى اۋىرت بولعانىمەن، مارسەلو ونىڭ ءتىلىن تابا ءبىلدى.  ۇنەمى ازىلدەسىپ، قالجىڭداسىپ، جەڭىستەرىن بىرگە دۋمانداتىپ تويلايتىن ەكى دوس ءسوزسىز كوپتىڭ كوزىنە تۇسەتىن.

ءتىپتى بىردە «رونالدۋ باقىتتى. مەن ونىمەن بىرگە ويناعاندى جاقسى كورەمىن. ول ءۇشىن قۋانىشتىمىن. رونالدۋ مەنىڭ تۋعان اعام سەكىلدى»، -دەپ مالىمدەمە جاساعان بولاتىن مارسەلو دوسى.

♦ادۆوكات: ماعان رونالدۋدان زورلىق كورگەنىن ايتىپ تاعى ءبىر ايەل حابارلاستى

رونالدۋ مارسەلو تۋرالى ءجيى پىكىر بىلدىرە قويمايتىن. ءبىراق دوستىققا ادالدىعىن ىسپەن كورسەتۋگە تىرىسىپ، ويىن كەزىندە دە، دايىندىق كەزىندە دە مارسەلوعا موتيۆاسيا بەرىپ وتىراتىن. مارسەلو دا فۋتبولشىنىڭ بۇل قاسيەتىن باعالاي ءبىلدى.

كەيىن رونالدۋ «يۋۆەنتۋس» فۋتبول كلۋبىنا كەتكەن سوڭ جاقىن دوسىمەن قيماي قوشتاسقانى جانكۇيەرلەردىڭ كوڭىلىن بوساتىپ جىبەردى.

«قوشتاساتىن ۋاقىت تا جەتتى. انت ەتەيىن، مەنى وسىنداي ءسات كۇتىپ تۇرعانىن بىلگەن جوقپىن. ءبىراق ومىردە بارلىعى ماڭگى ەمەس. سەنىڭ جاڭا بەلەسىڭ ءساتتى بولادى دەپ سەنەمىن. ءبىز 10 جىلعا جۋىق ۋاقىتتى بىرگە وتكىزدىك. بۇل جىلدار قۋانىشقا دا، ساتسىزدىككە دە، جەڭىس پەن جەڭىلىسكە دە تولى بولدى. كەرەمەت ەستەن كەتپەس ەستەلىكتەرىمىز بار. مەن سەنەن كوپ نارسەنى ۇيرەندىم. سەنىڭ ادالدىعىڭ سپورتشىلاردىڭ اراسىنان سەنى ەرەكشەلەندىرىپ تۇراتىن. ساعان جانە سەنىڭ جاڭا "وتباسىڭا" (كلۋبىڭا-رەد.) بارلىق جاقسىلىقتى تىلەدىم. سەنىمەن وتكەن دايىندىقتى دا، ويىنداردى دا قاتتى ساعىناتىن بولامىن. اڭىزعا اينالعان فۋتبولشى بولعانىڭ ءۇشىن عانا ەمەس، كەرەمەت ادام رەتىندە دە سەنىمەن ماقتانامىن. سەنىمەن ءبىر كوماندادا ويناعانىمدى، بىرگە تاجىريبە الماسىپ، دايىندالعانىمدى ماقتان تۇتامىن. مەن كارەرامدى ءتامامداعان كەزدە كافەدە وتىرىپ، بارلىق ەستەلىك سۋرەتتەردى قاراپ، اڭگىمە ايتاتىن بولامىز»، -دەپ جازىپتى مارسەلو ءوزىنىڭ ينستاگرام پاراقشاسىندا.

قىركۇيەك ايىندا مارسەلو «رەال مادريدتەن كەتپەيمىن. سوڭىنا دەيىن وينايمىن»، - دەپ مالىمدەمە جاساعان بولاتىن. الايدا اياق استىنان شەشىمىن وزگەرتكەن فۋتبولشىنىڭ بۇل ارەكەتىن «رونالدۋدى ساعىنعان عوي» دەپ پايىمدادى جانكۇيەرلەر. ءبىراق بۇدان باسقا دا سەبەپتەر بار سەكىلدى. وسىعان دەيىن رونالدۋ جايسىز جايتتاردان كوز اشپاي كەلە جاتقانىن جازعان ەدىك. تانىمال فۋتبولشى «رەال ءمادريدتىڭ» وزىنە ادەيى قاستاندىق جاساعانىن ايتتى.  رونالدۋدىڭ بۇل مالىمدەمەسىن ەستىگەن مارسەلو 10 شاقتى جىل جاقىن ارالاسقان دوسىنا قولداۋ ءبىلدىرۋ ءۇشىن وسىنداي قادامعا بارعان شىعار، كىم ءبىلسىن؟!