«7-20-25» باعدارلاماسى اياسىندا پاتەرگە ايىنا 100 مىڭ تەڭگە تولەيتىن ادامداردىڭ سانى وسكەن. بۇل تۋرالى Qamshy.kz اقپارات اگەنتتىگى «باسپانا» يپوتەكالىق ۇيىمىنا سىلتەمە جاساپ حابارلادى.

باسپانا ماماندارىنىڭ پىكىرىنشە، قارىز الۋشىلاردىڭ 60 پايىزى پاتەرگە ايىنا 100 مىڭ تەڭگەدەن تولەيدى. ال قارىز الۋشىلاردىڭ 6 پايىزى ەڭ جوعارعى سوماداعى قارجىنى تولەيدى. استانا، الماتى، اتىراۋ، اقتاۋ جانە شىمكەنت قالالارىنىڭ تۇرعىندارى پاتەردى نەسيەگە 20 ميلليون تەڭگەگە، وزگە قالالاردا 12 ميلليون تەڭگەگە العان. قارىز الۋشىلاردىڭ كوبى، جالپى كورسەتكىشتىڭ 37 پايىزى 10 ميلليوننان 15 ميلليونعا دەيىنگى ارالىقتا نەسيە العان.

«باعدارلاما ءوزىنىڭ الەۋمەتتىك باعىتىن ايقىنداي الدى. الايدا مىنانى ۇمىتپاۋىمىز كەرەك: 7-20-25 – ەڭ الدىمەن جىلدامدىق، قايتارىم، ۋاقىتىلى تولەم پرينسيپتەرىنە نەگىزدەلگەن يپوتەكا. ول كەز-كەلگەن قازاقستاندىق جۇمىسكەر ءۇشىن قولجەتىمدى، تەك بانك-سەرىكتەستەرىنە ءوزىنىڭ تولەم مۇمكىندىگىن دالەلدەسە، ناقتىلاسا بولعانى»، - دەدى «باسپانا» يپوتەكالىق ۇيىمىنىڭ باسقارما ءتوراعاسى قايرات التىنبەكوۆ.

24 قازانداعى جاعدايعا سايكەس، 7-20-25 باعدارلاماسى بويىنشا قارىز الۋشىلاردىڭ ەشقايسىسى تولەمدى كەشىكتىرمەگەن. جالپى قازاقستاندىقتار 44،5 ميلليارد تەڭگەگە ءوتىنىش بەرگەن. ونىڭ 30 ميلليارد تەڭگەسى، ياعني 2513 ءوتىنىش بانكتەر تاراپىنان ماقۇلدانعان.

ايتا كەتەيىك، بۇعان دەيىن ق ر ۇلتتىق بانكى «7-20-25» باعدارلاماسىنا قاتىساتىن سەرىكتەس بانكتەردى اتاپ شىققان. ولار: بانك سەنتركرەديت، ەۋرازيا بانكى، اتف بانك، RBK بانكى، سەسنا بانك، تۇرعىن ءۇي قۇرىلىس جيناق بانكى جانە حالىق بانكى. ال جىل سوڭىنا دەيىن سبەربانك پەن Forte bank قوسىلدى.

باعدارلاما بويىنشا جىلىنا 7 پايىز ۇستەمەمەن 25 جىلعا بەرىلەدى. العاشقى جارنا – 20پايىز.

جاڭا يپوتەكالىق قارىزدى قازاقستان رەسپۋبليكاسىنىڭ كەز كەلگەن ازاماتى الا الادى. تەك باسىندا جىلجىمايتىن مۇلكى بولماۋى شارت. باعدارلاما بويىنشا قازاقستاننىڭ كەز كەلگەن وڭىرىنەن الماتى، استانا، اتىراۋ قالالارىنان ەڭ ماكسيمالدى 25 ميلليون تەڭگەگە، قالعان وڭىرلەردە 15 ميلليون تەڭگەدەن باسپانا ساتىپ الۋعا بولادى.