ق ر پرەزيدەنتى نۇرسۇلتان نازاربايەۆتىڭ 17 قازانداعى فينلياندياعا ساپارى بارىسىندا جۋرناليستەرمەن كەزدەسىپ، سۇراقتارعا جاۋاپ بەردى. بريفينگ بارىسىندا جۋرناليست ەلباسىنا 2020 جىلى وتەتىن سايلاۋعا قاتىساتىنى-قاتىسپايتىنى جايلى سۇراق قويعان ەدى. نازاربايەۆ ءبۇي دەدى:
«سوڭعى جىلدارى بۇل ماعان ءجيى قويىلاتىن سۇراق. ەگەر مەن 2020 جىلى كەتەتىن بولسام، ءبىزدىڭ بالالارىمىزدىڭ جارقىن بولاشاعىن كىم قامتاماسىز ەتەدى؟ ال شىن مانىسىندە، مەنىڭ وسى لاۋازىمدا ۇزاق وتىرعانىمدى ويلاپ تۇرعاندارىڭىز انىق. نەگىزىنەن، ءار بەس جىل سايىن وتەتىن سايلاۋدا حالىق مەنى تاڭداپ كەلدى. 2020 جىلدىڭ جەلتوقسانىندا مانداتىمنىڭ مەرزىمى اياقتالادى. ءارى مەن بۇگىنگى قازاقستاندى قۇرۋشى، تاۋەلسىز مەملەكەتتىڭ العاشقى پرەزيدەنتى رەتىندە ماعان ءوز ۇمىتكەرلىگىمدى ۇسىنا الاتىن كونستيتۋسيالىق قۇقىق بەرىلگەن. بۇل بىرنەشە فاكتورعا بايلانىستى. ادەتتە مۇنداي شەشىمدى سايلاۋعا جاقىن قابىلدايدى. سوندىقتان كەلەسى جىلى شەشىم قابىلداۋىم مۇمكىن. نەمەسە 2020 جىلى»، - دەپ جاۋاپ قاتتى مەملەكەت باسشىسى.
ايتا كەتەيىك، بۇعان دەيىن قاسىم-جومارت توقايەۆ بي-بي-سيدەگى Hardtalk باعدارلاماسىنا بەرگەن سۇحباتىندا نازاربايەۆ 2020 جىلى ءوتۋى ءتيىس كەزەكتى پرەزيدەنت سايلاۋىنا تۇسپەيدى دەپ ەسەپتەيتىنىن ايتتى:
— اشىعىن ايتايىن، مەن پرەزيدەنت نازاربايەۆ 2020 جىلعى پرەزيدەنت سايلاۋىنا قاتىساتىنىنا سەنبەيمىن. ويتكەنى ول اقىلدى ادام، وتە پاراساتتى. 2020 جىلى بىزدە پرەزيدەنت سايلاۋى نازاربايەۆتان باسقا كانديداتتارمەن وتەدى دەپ ويلايمىن"، — دەدى توقايەۆ.
ال اقپارات جانە كوممۋنيكاسيا ءمينيسترى داۋرەن ابايەۆ توقايەۆتىڭ ءسوزىن قۇپتاي قويمادى. ابايەۆ كەرىسىنشە نازاربايەۆتىڭ سايلاۋعا قايتا ءتۇسۋىن جاقسىعا جورىدى:
— قاسىم-جومارت كەمەل ۇلى ايتقانداي، 2020 جىلعا دەيىن ءالى ءبىراز ۋاقىت بار. شەشىمدى مەملەكەت باسشىسىنىڭ ءوزى قابىلدايدى. ءبىز بۇعان 2020 جىلى سول كەزدەگى جاعدايمەن قاراۋىمىز كەرەك. كوپ جىل پرەزيدەنت قىزمەتىن اتقارعان ادام، سونىمەن قاتار ەلباسىنىڭ ساياسات پەن ەكونوميكاداعى، حالىقارالىق ىستەردەگى زور تاجىريبەسى مەن حالىقارالىق بەدەلىن ەسكەرە كەلە، قازاقستان ەلباسىنىڭ 2020 جىلعى پرەزيدەنت سايلاۋىنا قاتىسقانىنان تەك ۇتادى دەپ سانايمىن، - دەدى داۋرەن ابايەۆ.
سەنات سپيكەرىنىڭ پىكىرىنە قاتىستى ەلىمىزدىڭ سىرتقى ىستەر ءمينيسترى دە ءۇنسىز قالمادى. قايرات ءابدىراحمانوۆتىڭ ايتۋىنشا، سۇحبات اسا كۇردەلى بولعانىمەن قاسىم-جومارت توقايەۆ قازاقستاننىڭ دا، ەلباسىنىڭ دا ساياسي بىلىكتىلىگىن كورسەتە العان:
- قاسىم-جومارت توقايەۆتىڭ قازاقستاننىڭ دامۋ جولىنداعى نۇرسۇلتان نازاربايەۆتىڭ ءرولىن ايقان كورسەتكەن. ەلباسى قۇرىپ كەتكەن ساياسي مودەل بەرىك. ءبىز «استانا» حالىقارالىق قارجى ورتالىعىن قوستىق، ءالىم بويىنشا ينۆەستيسيالار مەن جاڭا تەحنولوگيالاردى وزىمىزگە تارتىپ كەلەمىز. سەنات سپيكەرىنىڭ سۇحباتىندا مۇنىڭ اشىق ءارى جۇيەلى تۇردە قامتىلعان، - دەگەن ەدى مينيستر ءوز سوزىندە.
♦قازاقستان ەلباسىنىڭ 2020 جىلعى سايلاۋعا قاتىسقانىنان تەك ۇتادى — ابايەۆ
♦ق ر ءسىم باسشىسى قاسىم-جومارت توقايەۆتىڭ ايتقانىنا قاتىستى پىكىر ءبىلدىردى
