قازاقستاننىڭ قاسيەتتى جەرلەرىن الەمگە تانىتۋ باعىتىندا قانداي شارالار قولعا الىنىپ جاتىر؟ بۇل تۋرالى اقوردادا ق ر پرەزيدەنت اكىمشىلىگىنىڭ باسشىسى اسەت يسەكەشيەۆتىڭ توراعالىعىمەن وتكەن قوعامدىق سانانى جاڭعىرتۋ باعدارلاماسىن جۇزەگە اسىرۋ بويىنشا ۇلتتىق كوميسسيانىڭ كەزەكتى وتىرىسىندا ق ر مادەنيەت جانە سپورت ءمينيسترى ارىستانبەك مۇحامەدي ۇلى بايان ەتتى.

«ءبىزدىڭ مينيسترلىك «قازاقستاننىڭ كيەلى جەرلەرىنىڭ گەوگرافياسى» جوباسىن جۇزەگە اسىرۋدا. جوبانىڭ ادىستەمەلىك، عىلىمي جانە پراكتيكالىق باعىتتارىن 2017 جىلى ۇلتتىق مۋزەيدىڭ جانىنان قۇرىلعان «قاسيەتتى قازاقستان» ورتالىعى مەن «تۋعان جەر» عىلىمي قاۋىمداستىعى جۇرگىزەدى. جوبانىڭ نەگىزگى ماقساتى مەن ناتيجەلەرى «قازاقستاننىڭ كيەلى جەرلەرىنىڭ گەوگرافياسى» رەسپۋبليكالىق فورۋمىندا قارالعان بولاتىن. فورۋمعا جەتەكشى تاريحشىلار مەن ارحەولوگتار، ەتنوگرافتار مەن اتقارۋشى ورگانداردىڭ وكىلدەرى قاتىستى. بارلىق قاسيەتتى جانە تاريحي ورىنداردى، قازاقستاننىڭ تۇكپىر-تۇكپىرىندەگى ەسكەرتكىشتەردى جۇيەلەندىرۋ ءۇشىن اكىمدىكتەرمەن بىرلەسە جۇمىس جۇرگىزىلىپ جاتىر. التى باعىت بويىنشا، اتاپ ايتقاندا سولتۇستىك، شىعىس، باتىس، وڭتۇستىك، ورتالىق جانە وڭتۇستىك-باتىس باعىتتا عىلىمي-زەرتتەۋ ەكسپەديسياسى ىسكە اسىرىلدى. وسى جۇمىستاردىڭ قورىتىندىسى بويىنشا ۇلتتىق ماڭىزى بار 185 جانە ايماقتىق ماڭىزى بار 456 ورىن تاڭداپ الىندى»، - دەدى ارىستانبەك مۇحامەدي ۇلى.

ءمينيستردىڭ ايتۋىنشا، ايماقتاردىڭ نەگىزگى نىساندارى بويىنشا «كيەلى قازاقستان» ەنسيكلوپەدياسىنىڭ العاشقى تومى جارىققا شىققالى جاتىر. الداعى ۋاقىتتا ءدال وسىنداي بەس كىتاپ شىعارىلادى. سونىمەن بىرگە، ماتەريالدار ۆيرتۋالدى كارتادا دا قولجەتىمدى بولماق.

«جاھاندىق ينتەرنەتتە قازاقستان قاسيەتتى ورىندارىنىڭ برەندىن قالىپتاستىرۋ ءۇشىن ءۇش تىلدە 30-عا تارتا ۆيدەوروليك دايىندالدى. BBC world news، Viasat history، National geographic تەلەارنالارى امەريكالىق Castle Film كومپانياسىمەن بىرلەسە وتىرىپ، «كوشپەندىلەر جەرى»، «التىن ادام» «قازاقستاننىڭ قاسيەتتى جەرلەرىنىڭ گەوگرافياسى»، «قوجا احمەت ياساۋي»، «ايشا ءبيبى» فيلمدەرى كورسەتىلۋدە. وسى جىلدىڭ قاراشاسىندا BBC World News-پەن بىرلەسە وتىرىپ، «Travel shows of Kazakhstan» اتتى جوبانى باستاۋ جوسپارلانىپ وتىر. وعان قازاقستاننىڭ تۋريستىك الەۋەتى تۋرالى بەس باعدارلاما ەنەدى. سونىمەن بىرگە، الەمنىڭ جەتەكشى مۋزەيلەرىندە التىن ادامنىڭ كورمەسى وتكىزىلدى. كورمەلەر وڭتۇستىك كورەيا، رەسەي، بەلارۋس، ازەربايجان، جۇڭگو، پولشا ەلدەرىندە ۇيىمداستىرىلدى. جاقىن ارادا ءدال وسى جوبا ۇلىبريتانيا، گرۋزيا، اقش، اۆستراليا، يتاليا مەن فرانسيادا وتكىزىلمەك»، - دەدى مينيستر.