دۇيسەنبىدە، ياكي قازاننىڭ 22ء-ى كۇنى ەسەنتاي موللدىڭ تورىندە اسقار ۇزابايەۆتىڭ رەجيسسەرلىگىمەن تۇسىرىلگەن «ماحاببات كافەسى» كينوسىنىڭ تۇساۋكەسەرى بولدى. كىلەڭ ىعاي مەنەن سىعاي جينالعان جيىنعا كاسىبىمىزدىڭ قۇدىرەتتىلىگىنىڭ ارقاسىندا ءبىز دە قاتىستىق. وسى جولعى پرەسس-كورسەتىلىمنىڭ ەرەكشەلىگى، الماتىنىڭ اكىمى باۋىرجان بايبەكتىڭ ءوزى بوي كورسەتتى. بۇل قىزىقتىڭ باسى دەپ ءبىلىڭىز. سەبەبى، بايبەكتىڭ اكەسى، ەلباسىنىڭ سۇيىكتى سىنىپتاسى قىدىرعالي مىرزا دا «ماحاببات كافەسىن» تاماشالاۋعا كەلىپ، بالاسىنىڭ سول جاعىنا جايعاستى. تاعدىردىڭ ماڭدايعا جازۋىمەن تۋرا اكىمنىڭ ارتقى جاعىنان ورىن الىپپىز.  ال، باۋىرجان بايبەكتىڭ وڭ جاعىندا كىم وتىردى دەيسىز؟ جاۋابى – ەركە ەسماحان. سەبەبى «ماحاببات كافەسىندە» باستى ءرولدى سومدايتىن دا وسى وتاندىق ديۆا. رەجيسسەر اسقار ۇزابايەۆتىڭ ايتۋىنشا، بۇل كينو رومانتيكالىق كومەديا بولعانىمەن، وندا رومانتيكالىق جەلى باسىم. الايدا نە ماحابباتتى، نە كومەديانى كورە الماعاندىقتان با، الەۋمەتتىك جەلىدە جازىلىپ، ايتىلىپ جاتقان ودالارعا رەاكسيا ما، «ەركە ەسماحان – جاقسى ءانشى، ءبىراق شىندىق قىمباتتىراق» ءپرينسيپىنىڭ  اسەرى مە، قولعا قالام الۋعا  ءماجبۇر بولدىم. ەركە ەسماحاننىڭ «جۇلدىزىن» ودان سايىن جارقىراتۋ ءۇشىن تۇسىرىلگەن تۋىندىنىڭ كورسەتىلىمى بارىسىندا ورنىمنان تۇرىپ كەتپەي، اياعىنا دەيىن كورۋىمە سەبەپكەر بولعان – قىدىرعالي مۇقامەتامىر ۇلى بايبەك. اكىمنىڭ 78 جاسقا كەلگەن اكەسى اقىرىنا دەيىن شىداپ وتىرعاندا مەنىڭ تۇرىپ كەتۋىم ەرسى كورىنەر دەگەن قازاقى تاربيەنىڭ ارقاسىندا 90 مينۋت (شامامەن الىنعان - رەد.) ارەڭ ءوتتى.

ماحاببات كافەسى ەركە ەسماحاننىڭ اكتريسا رەتىندەگى العاشقى كينوسى بولسا، رەجيسسەر اسقار ۇزابايەۆتىڭ، قاتەلەسپەسەم، جيىرماسىنشى كينوسى. «اۋىل دەگەن تاقىرىپتى جاقسى كورەمىن. سەبەبى ناعىز رومانتيكا – اۋىلدا»، – دەپ ءسوز سويلەگەن ۇزابايەۆ وسى جولى اۋىلدىڭ بەت-بەينەسىن، ونداعى قاراپايىم قازاقتىڭ تىرلىگىن جانە  ارەكەتىن جيىركەنىشتى تۇردە بەرگەندەي. قولىنان بۇرقىراعان تەمەكىسىن تاستامايتىن، الدەبىر ەركەكتى (كۇيەۋىن ەمەس) زارىعا كۇتىپ جۇرگەن ايەل، سامسانى جەپ وتىرىپ ىشتەرى اۋىرعاندارى سونشالىق، قۇيرىقتارىنان ب...ق شىعا جازداعان، ءسويتىپ اجەتحاناعا زىر جۇگىرگەن بانديتسىماقتار، مۇزداتقىشتاعى سۋ ەرىپ كەتكەننەن توكقا ءتۇسىپ،  220 ءۆولتتىڭ اسەرىنەن شاپتىرىپ دارەت سىندىرعان اكە، كينونىڭ سوڭىندا سەزىم ءبىلدىرىپ، و باستان قىزعا قىرىنداماعان جىگىت جانە سۋدان تازا، سۇتتەن اق قىز جايلى كينو. كەيىپكەرلەردىڭ تۇلعالىق بولمىسى، بىر-بىرىنە سەزىمى اشىلماعان كينودا ەتيكاعا ساي كەلمەيتىن ءبىراز كادرلار بار. اشىق ءسۇيىسۋ نەمەسە توسەكتەگى سەنا بولماسا دا مۇنداي كادردان وز-وزىڭنەن ۇيالادى ەكەنسىڭ. باستاپقىدا «كينو فەستيۆال جانرىندا تۇسىرىلگەن ەكەن-اۋ» دەپ قىلاڭ بەرگەن ءۇمىت تە اتالمىش كادرلاردان كەيىن بىردەن ءسوندى. اسقار ۇزابايەۆتىڭ ورىسشا سويلەگەنىنە قاراپ-اق قازاقتىڭ جانىن ۇقپايتىنىن بولجاي الامىز. الايدا قازاقتىڭ قاراپايىم قىزى، اۋىلدان شىققان قاراكوزىمىز ەركە نەگە كينونىڭ ادەپتەن وزعانىن بايقاي وتىرىپ، ۇندەمەي قالدى ەكەن. قوماقتى قاراجات جۇمسالعان كينونىڭ لوكاسياسى دا «ۋاۋ» ەمەس. «ويداعىداي كافە تابۋ ءۇشىن شۋعا ارنايى اتتاندىق» دەگەن رەجيسسەردىڭ سوزىنە قاراپ، كافەنىڭ ەرەكشەلىگىنە ءبىراز باس قاتىردىم. پوەزد ستانساسىنا جاقىندىعى بولماسا، كادىمگى كافە. الماتىنىڭ شەت جاعاسىنان «ماحاببات كافەسىن» تابۋ قيىنعا سوقپايدى-اۋ. ايتپاقشى، جارنامالىق پلاكاتتاردا «كافەسى ماحاببات» دەپ جازىلعان كينو اتاۋى «بوياۋشى-بوياۋشى دەگەنگە ساقالىن بوياپتىنىڭ» كەرى بولدى. سەبەبى، مۇنداي قاسيەتتى قازىرگى زامان تىلىمەن «حايپ» دەپ اتايدى. «گاككۋدىڭ» جۋرناليستەرى «حايپ حانشايىمى» دەپ اتاق بەرگەن ەركە ەسماحاننىڭ قازاق تىلىنە جەتىك ەكەنىن دە، پروديۋسەر، جۋرناليست، ەركە ەسماحاننىڭ «اپكەسى» گۇلنۇر ماماساريپوۆانىڭ دا سوزگە شەشەن ەكەنىن جاقسى بىلەمىز.

18 كۇن بويى تۇسىرىلگەن «كافەسى ماحاببات» كينوسىنان ۇققانىمىز، قازاق كورەرمەنى سۇرعىلت، ابىرجىگەن كينولاردى مىسە تۇتاتىن ۋاقىتتى الدەقاشان ارتقا قالدىردى. قازىرگى كورەرمەن بوياۋى قانىق، سەناريى ءىش پىستىرارلىق ەمەس، جاس اكتەرلەردىڭ تالانتىنا كۋا بولۋعا مۇمكىندىك بەرەتىن فيلمدەردى كورۋگە اسىق. «ءبىزدىڭ بىر-بىرىمىزگە دەگەن تارتىلىسىمىز بار» دەپ ءوز كينوسىنىڭ تورەعاليدىڭ «ۇلى دالا كومەدياسىمەن» تۇسپا-تۇس كەلۋىنە بايلانىستى ازىلدەگەن ەركە ەسماحان الايدا تورەعاليدىڭ اسىعى الشىسىنان تۇسكەنىن مويىنداۋى قاجەت. «مەن ماحابباتىمدى كينودا عانا ەمەس، ومىردە دە ىزدەيمىن» دەپ جۋرناليستەردىڭ سۇراعىنا جاۋاپ بەرگەن ەركە ەسماحاننىڭ اكتريسا رەتىندەگى العاشقى قادامى ءساتسىز بولسا دا، جار ىزدەۋدە ساتتىلىگى سەرىك بولسىن دەيمىز.