ق ر مادەنيەت جانە سپورت مينيسترلىگى ۆەدومستۆونىڭ لاۋازىمدى تۇلعالارى ۇستالدى دەگەن مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ مالىمەتىنە قاتىستى تۇسىنىكتەمە بەردى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنا سىلتەمە جاساپ. 

"سوتقا دەيىنگى تەرگەپ-تەكسەرۋ دەرەكتەرi جاريا ەتiلمەۋگە ءتيىس. قازىرگى تاڭدا سوتقا دەيىنگى تەرگەپ-تەكسەرۋ امالدارى جۇرگىزىلۋدە. سوندىقتان تەرگەۋ ءىسى بىتپەي، قازاقستان رەسپۋبليكاسى مادەنيەت جانە سپورت مينيسترلىگىنىڭ قىزمەتكەرى ايىپتى دەۋگە حاقىمىز جوق. قازىرگى تاڭدا بارلىق قىزمەتكەر جۇمىس ورنىندا"، — دەپ جازىلعان مينيسترلىك تاراتقان حابارلامادا. 

ايتا كەتەيىك، بۇگىن مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى مادەنيەت جانە سپورت مينيسترلىگىنىڭ لاۋازىمدى تۇلعالارى ۇستالعانىن حابارلادى. ءبىراق اگەنتتىكتىڭ رەسمي وكىلى قانشا ادامنىڭ ۇستالعانىن ناقتىلاعان جوق. ول ءقازىر سوتقا دەيىنگى تەرگەۋ جۇرگىزىلىپ جاتقانىن، باسقا اقپاراتتىڭ زاڭعا سايكەس جاريا ەتىلمەيتىنىن جەتكىزدى.

ال كەيىن استانا سوتىنىڭ باسپا ءسوز قىزمەتى مينيسترلىكتىڭ اكىمشىلىك دەپارتامەنتىنىڭ ديرەكتورى ەرەناي دارجىبايەۆتىڭ 24 جەلتوقسانعا دەيىن ءۇيقاماققا الىنعانىن حابارلادى.

مادەنيەت مينيسترلىگىنىڭ باسپا ءسوز قىزمەتىنىڭ حابارلاۋىنشا، ەرەناي دارجىبايەۆ 2014 جىلدان مادەنيەت جانە سپورت مينيسترلىگىندە جۇمىس ىستەيدى. ول قارجى مينيسترلىگىندە مەملەكەتتىك ساتىپ الۋ ءادىسناماسى باسقارماسىنىڭ باسشىسى، جوعارعى سوت جانىنداعى سوتتاردىڭ قىزمەتىن قامتاماسىز ەتۋ كوميتەتىنىڭ قوستاناي وبلىسى سوتتار اكىمشىسى، گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ اكىمشىلىك دەپارتامەنتىنىڭ ديرەكتورى، ءبىلىم مينيسترلىگىندە باسقارما باسشىسى قىزمەتتەرىن اتقارعان. 

"سوندىقتان، تەرگەۋ امالدارى اياقتالماي، لاۋازىمدى تۇلعانى ايىپتى دەپ قورىتىندى جاساۋعا اسىقپاعان ءجون"، — دەپ ءمالىم ەتتى مينيسترلىكتەگىلەر.