ەندى ءۇش كۇننەن كەيىن ماسكەۋدە ايبا-نىڭ پرەزيدەنتى سايلانادى. وعان قازاق ۇلتىنىڭ وكىلى سەرىك قوناقبايەۆ پەن وزبەك عافۋر راحيموۆ تالاسايىن دەپ وتىر. بۇل تاق تالاستا كىمنىڭ ءباسى جوعارى بولادى؟

ازىرگە قۋانىشتىسى، بىزگە بىرەر كۇن بۇرىن لوزاننادان جىلى حابار كەلدى.  حالىقارالىق بوكس قاۋىمداستىعىنىڭ (ايبا) ۆيسە-پرەزيدەنتى سەرىك قوناقبايەۆتىڭ سپورتتىق اربيتراجدى سوتقا (CAS) جىبەرگەن شاعىمى قاناعاتتاندىرىلىپ، ول رەسمي تۇردە پرەزيدەنتتىككە ۇمىتكەر اتاندى. بۇل تۋرالى ۇلتتىق وليمپيادالىق كوميتەتتىڭ باسپا ءسوز قىزمەتى حابارلادى.

–CAS پەن بۇل ىسكە قاتىسۋشىلارعا مەنىڭ شاعىمىم بويىنشا ءادىل شەشىم شىعارعانى ءۇشىن العىس ايتامىن. ءبىز كەلتىرگەن دالەلدەردى CASء-تىڭ وڭ قابىلداعانىنا ريزامىن. مەن ءۇشىن ايبا پرەزيدەنتتىگىنە ۇمىتكەر اتانۋ ۇلكەن قۇرمەت. ەندى باسشىلىقتى مىندەتتى قولعا الىپ، ءبىزدىڭ ۇيىمىمىز بەن سپورتىمىزدى ۇلتتىق فەدەراسيالارمەن بىرلەسە وتىرىپ قايتا جانداندىراتىن مۇمكىندىگىمىز بار. ماعان پرەزيدەنتتىككە ۇمىتكەر اتانۋعا مۇمكىندىك بەردى. ءارى قاراي پرەزيديۋمدى ورىندى ۇتىپ الۋ ءۇشىن بار كۇشىمدى سالامىن. مۇنى ءوزىم ءۇشىن ەمەس، ءبىزدىڭ بوكسشىلاردىڭ قۇقىعىن، ولاردىڭ وليمپياداداعى ارمانى مەن ءۇمىتىن قورعاۋ ءۇشىن ىستەگىم كەلەدى. بۇل مىندەتكە ۇلكەن جاۋاپكەرشىلىكپەن قاراي وتىرىپ، 3 قاراشا كۇنى ماسكەۋدە وتەتىن سايلاۋدى اسىعا كۇتەمىن. ايبا-نىڭ جارقىن بولاشاعى ءۇشىن قاۋىمداستىقتىڭ بارلىق مۇشەلەرىنەن مەنىڭ كانديداتۋرامدى قولداۋدى وتىنەمىن، - دەدى قازاق بوكسىنىڭ بولاشاعىن ويلاعان سەرىك قوناقبايەۆ.

ايتا كەتۋ كەرەك، وسى ۋاقىتقا دەيىن حالىقارالىق اۋەسقوي بوكس قاۋىمداستىعىنىڭ مىندەتىن اتقارۋشى قىزمەتىنە  عافۋر راحيموۆ تاعايىندالعانى بەلگىلى. كەزىندە وزبەك جەرىنەن قۋىلىپ، «قىلمىسقا قاتىسى بار» دەلىنگەن راحيموۆ بيلىككە ميرزيەيەۆ كەلگەلى قايتادان وزبەكستان شەكاراسىن اتتاۋعا رۇقسات الدى. سوڭعى ازيا چەمپيوناتىندا وزبەكتەر التىندى كوبىرەك الىپ، قازاق بوكسشىلارىنا كەدەرگى جاسالعانىنان دا جۇرتشىلىق حاباردار. ونىڭ ۇستىنە سوڭعى جىلدارى ايبا-نىڭ باسشىلارى قىلمىستىق جاۋاپكەرشىلىككە تارتىلىپ، اتالعان ۇيىمنىڭ بەدەلى دە تومەندەپ كەتتى. سوندىقتان ارينە بۇل جەرگە قازاق بوكسىندا ورنى بار  سەرىك قوناقبايەۆتىڭ بارعانى ءتيىمدى. بۇل ءبىز ءۇشىن دە ابىروي بولار ەدى.

ال وزبەك راحيموۆتىڭ ايبا-نىڭ پرەزيدەنتى بولۋعا مۇمكىندىگى بار ما؟ كىم جەڭەدى؟ راحيموۆ پا، قوناقبايەۆ پا؟ بۇل ماسەلە الداعى ۋاقىتتا 3 قاراشادا ماسكەۋدە وتەتىن ايۆا-نىڭ كونگرەسىندە ساراپقا سالىنادى.

ەسكەرتە كەتەيىك، 2017 جىلدىڭ شىلدە ايىندا ايۆا-نىڭ اتقارۋشى كوميتەتىنىڭ 13 مۇشەسى ۇيىمنىڭ باسشىسى چينگ-كۋو ۆۋعا سەنىمسىزدىك ءبىلدىرىپ، ونىڭ وتستاۆكاعا كەتۋىن تالاپ ەتتى. «قارجى جىمقىردى» دەپ ايىپ تاعىلىپ، قازىرگى ۋاقىتتا وعان قاتىستى تەرگەۋالدى جۇمىستارى جۇرگىزىلۋدە. ايۆا-نىڭ تارتىپتىك كەڭەسى وتكەن جىلدىڭ قازان ايىندا ونى ءبىرجولا قىزمەتتەن شەتتەتتى.

دەمەك، بۇدان شىعاتىن قورىتىندى نە؟ ايۆا سياقتى ىرگەلى ۇيىمعا قازاق قوناقبايەۆ سەكىلدى  تازا ءارى ادال ادام كەرەك. ءبىز ۇلتتىڭ ابىرويىن اسىرىپ جۇرگەن قايراتكەر ازاماتقا جەڭىس تىلەيمىز.