ەكى جاقتى كەلىسسوزدەر ناتيجەسىندە «قازاقستان» تەلەراديوكورپوراسياسى وتاندىق كاسىپقوي بوكسشىلارىمىزدىڭ جەكپە-جەگىن  «Qazaqstan» جانە «Qazsport»  تەلەارنالارىندا كورسەتۋ قۇقىعىنا يە بولدى.

4 قاراشا كۇنى اقش-تىڭ تەحاس شتاتىنداعى ەل-پاسوداعى Don Haskins Convention Center كەشەنىندە قازاق بوكسشىلارى جانىبەك ءالىمحان ۇلى مەن ساعادات راحمانقۇل بوكس كەشىنىڭ اندەكارتىندا شارشى الاڭعا شىعاتىن بولادى. باستى جەكپە-جەك مەكسيكالىق ميگەل بەرچەلت (34-1، 30 كو)  پەن ميگەل رومان (60-12، 47 كو)  اراسىندا  وتەدى. 

بۇل جانىبەك ءالىمحان ۇلىنىڭ (3-0، 1 كو) كاسىپقوي بوكستاعى ءتورتىنشى جەكپە-جەگى بولماق، ونىڭ قارسىلاسى 32 جاستاعى امەريكالىق بىلعارى قولعاپ شەبەرى ۆون الەكساندر (12-1، 8 كو). ال، ساعادات راحمانقۇل (3-0، 1 كو)  پۋەرتو-ريكالىق نيكلاۋس فلازبەن (5-1، 4 كو) قولعاپ تۇيىستىرەدى.

ايتا كەتەيىك، جانىبەك ءالىمحان ۇلىنىڭ  اۋەسقوي بوكستا قول جەتكىزگەن جەتىستىكتەرى ءبىر توبە. ول الەم جانە ازيا چەمپيونى، ازيا ويىندارىنىڭ جەڭىمپازى، قازاقستاننىڭ بىرنەشە دۇركىن چەمپيونى. 2018 جىلى جانىبەك كاسىپقوي بوكسقا اۋىسىپ، 3 جەكپە-جەك وتكىزىپ ۇلگەردى. بارلىعىندا جەڭىسكە جەتىپ، بىرەۋىن نوكاۋتپەن اياقتادى. ال، قارسىلاسى ۆون الەكساندر كاسىپقوي بوكستا 13 جەكپە-جەك وتكىزىپ، 12-دە جەڭىسكە جەتىپ، 8 كەزدەسۋىن نوكاۋتپەن اياقتاعان.

ساعادات راحمانقۇل  اۋەسقوي بوكستا 69 كەلىگە دەيىنگى سالماقتا  2013 جىلى ەل بىرىنشىلىگىندە توپ جارىپ، ال 2014 جىلى كۇمىس جۇلدەگەر اتانعان بولاتىن.

وتانداسىمىزدىڭ جەكپە-جەكتەرىن «Qazaqstan» مەن «Qazsport»  تەلەارنالارى 4 قاراشا كۇنى، ساعات 04:00-دە تىكەلەي ەفيردە كورسەتەتىن بولادى.  سونداي-اق، جەكپە-جەكتەردى «Qazaqstan tv»  ءموبيلدى قوسىمشاسى ارقىلى  كورە الاسىزدار!