سەرىك عاريف بيىل 6 قىركۇيەكتە تابەلدىك تاپانشادان 34 جاستاعى باسشىسى رۇستەم راقىشيەۆقا اقجايىق اۋداندىق ىشكى ىستەر ءبولىمى الدىندا وق اتتى. كىسى ولتىرگەن سوڭ بىردەن پوليسياعا بەرىلگەن.

سوت-پسيحياتريالىق ساراپتاما قورىتىندىسى بويىنشا، سەرىك ءعاريفتىڭ دەنى ساۋ، اقىل-ەسى دۇرىس. ءبىراق كۇدىكتىنى تەكسەرىپ شىققان مامانداردىڭ ايتۋىنشا، ول ۇزاق ۋاقىت قىسىم كورۋ سالدارىنان تۋىنداعان فيزيولوگيالىق اففەكت جاعدايىندا قىلمىس جاساعان.

سەرىك عاريف قىلمىسى تۋرالى ءوزى تولىعىمەن ايتىپ بەردى. ونىڭ سوزىنە سۇيەنسەك، رۇستەم راقىشيەۆپەن جۇمىس ىستەگەن العاشقى كۇننەن باستاپ، ەكەۋى ءبىر-بىرىن جاقتىرماعان. 

«ماعان ۇنەمى ءتيىسىپ جۇرەتىن. قايتا-قايتا ەسكەرتۋ جاساپ، باسقالاردىڭ كوزىنشە تومەندەتەتىن. ەشقاشان دۇرىستاپ امانداسپاي، ۇنەمى ءتىل تيگىزىپ ءجۇردى. وسىنىڭ ءبارى بىرتىندەپ جينالا بەردى. سول كۇنى تاعى دا مەنىڭ نامىسىما ءتيدى. سودان سوڭ مەنىمەن باسقا قىزمەتكەرلەرگە قارۋ الىپ، جۇمىسقا كىرىسۋگە بۇيىردى. قارۋ بولمەسىنەن تاپانشانى الىپ، شىعا بەرگەندە، دالادان رۇستەم راقىشيەۆتى كوردىم. ادەتتەگىدەي ايۋ سياقتى قورباڭداپ كەلە جاتىر ەكەن. ونى جەك كورەتىنمىن. ءجۇرىس-تۇرىسى جىنىما تيەتىن. ارتىندا كەلە جاتىپ، تاپانشامدى شىعاردىم دا، اياعىنىڭ استىنا وق اتتىم. سودان سوڭ، نە كورىنگەنىن بىلمەيمىن، قالاي بولسا، سولاي وق جاۋدىرا بەردىم. ول سۇلاپ تۇسكەن كەزدە عانا توقتادىم»، – دەپ سەرىك عاريف ساراپتاما كەزىندە جاۋاپ بەرگەن.

«كەرى بۇرىلىپ، كەزەكشىنىڭ ۇستەلىنە كەلدىم دە، تاپانشانى قويىپ: «بولدىم» دەدىم. باسقا ءاىىب قىزمەتكەرلەرى جۇگىرىپ كەلىپ، قولىمدى بۇرادى. وقساۋىتتاعى قالعان ءوق-دارىنى تارتىپ الىڭدار دەدىم»، – دەپ جالعاستىردى ەكس-پوليسەي. 

سەرىك ءعاريفتىڭ ۇزاق ۋاقىت بويى كۇيزەلىستە جۇرگەنىن ونىڭ اعاسى ساقاۋوۆ تا ايتتى. كۇدىكتى 2015 جىلى كۇزەت قىزمەتىنە جۇمىسقا ورنالاسقالى بەرى چاپايەۆ اۋىلىنداعى سول اعاسىنىڭ ۇيىندە تۇرعان. ساقاۋوۆتىڭ ايتۋىنشا، سەرىك ءعاريفتىڭ مىنەزى تۇيىق، جۇمىسى تۋرالى ءتىس جارماعان. 

2017 جىلى ءبىر كۇنى اعاسى باۋىرىنىڭ جۇمىستان ۇنجىرعاسى ءتۇسىپ كەلگەنىن بايقاپ قالعان. تۇسكى اس كەزىندە نەگە كوڭىل-كۇيى بولماي جۇرگەنىن سۇراعان. سەرىك عاريف كەنەت جىلاپ جىبەرىپ، قاتتى شارشاعانىن، بۇدان بىلاي مۇنداي جاعدايدا جۇمىس ىستەي المايتىنىن ايتقان. اعاسى نە بولعانىن سۇراي باستاعاندا سەرىك عاريف ۇستەلدەن تۇرىپ، ۇيدەن شىعىپ كەتىپ قالعان. سودان كەيىن ونىڭ ۇيىنە ەكى كۇننەن كەيىن كەلگەن جانە ەشقاشان جۇمىسىندا نە بولىپ جاتقانىن ايتپاعان.

ۇلىنىڭ مىنەزى تۇيىق ەكەنىن كۇدىكتىنىڭ اكەسى سەرىك عاريف راستادى.

«وندا نە بولعانىن، قانداي سەبەپپەن ولتىرگەنىن بىلمەيمىن. ۇلىممەن كەزدەسۋگە بىرنەشە رەت باردىم. ول جانجالدىڭ سەبەبىن ايتپادى. اناسىمەن جۇزدەسۋدەن باس تارتىپ، مۇندا كەلمەۋىن سۇرادى. ادۆوكات جالداۋعا تىيىم سالدى، وعان ءالى كۇنگە دەيىن تەگىن، مەملەكەتتىك ادۆوكات قىزمەت كورسەتۋدە»، – دەيدى نۇرلان عاريف.

رۇستەم راقىشيەۆتىڭ اتا-اناسى دا جانجالدىڭ سەبەبىن بىلمەيدى. مارقۇمنىڭ اكەسى جاسقايرات راقىشيەۆ سوت- پسيحياتريالىق ساراپتامانىڭ قورىتىندىسىمەن كەلىسپەيدى.

«سەرىك عاريف ۇلىمدى قاساقانا ءولتىردى، ەشقانداي اففەكت بولعان جوق. سەرىك تۇسىنىكتەمەسىندە پىشاق الىپ جۇرگەنىن ايتتى. ياعني ول بۇل قىلمىسقا دايىندالعان»، – دەيدى ول. 

رۇستەم راقىشيەۆتىڭ تۋىستارى كۇدىكتىنى قايتا ساراپتامادان وتكىزۋدى تالاپ ەتۋدە. قۇجاتتا تەرگەۋشى كوپتەگەن  پروسەسسۋالدىق قۇقىق بۇزۋشىلىق جىبەرگەن، ال بۇل قۇجاتتى زاڭسىز دەپ تانۋعا نەگىز بولا الاتىن كورىنەدى.   

قازىرگى تاڭدا بۇل ءىستى تەرگەۋ جالعاسىپ جاتىر.