Yessenov University قابىرعاسىندا وتكەن "I حالىقارالىق ەسەنوۆ وقۋلارى" اياسىندا ەلەكتروموبيلدەرىنە ارنالعان العاشقى ەلەكتر قۋاتتاندىرۋ ستانسياسىنىڭ اشىلۋ ءراسىمى ءوتتى. ماڭعىىستاۋ وبلىسى اكىمى باسپا ءسوز قىزمەتىنىڭ مالىمەتىنشە، ۋنيۆەرسيتەتتىڭ باس كورپۋسىنىڭ الدىنا ورناتىلعان 2 ستانسيا اتالمىش وقۋ ورداسىنىڭ عالىمدارىنىڭ ەڭبەگىمەن جاساقتالعان. ولاردىڭ تولىق زاريادتاۋ سيكلى نەبارى 3 ساعاتتى قۇرايدى. ەلەكتروموبيلدەر ۋنيۆەرسيتەتتىڭ ىشكى پايدالانۋى ءۇشىن الىنعان.

حالىقارالىق ەسەنوۆ وقۋلارىنا ماڭعىستاۋ وبلىسىنىڭ اكىمى ەرالى توعجانوۆ، 2007 ج. نوبەل سىيلىعىنىڭ لاۋرەاتى رادجەندرا كۋمار پاچاۋري، پۋترا ۋنيۆەرسيتەتىنىڭ (مالايزيا) كوممۋنيكاسيالىق تەحنولوگيالار جانە جەلى كافەدراسىنىڭ، كومپيۋتەرلىك عىلىمدار جانە اقپاراتتىق تەحنولوگيالار فاكۋلتەتىنىڭ پروفەسسورى موحامەد بين وتمان ارنايى قاتىستى. "رۋحاني جاڭعىرۋ" باعدارلاماسىنىڭ مىندەتتەرىن جۇزەگە اسىرۋ اياسىندا وتكىزىلەتىن ەسەنوۆ وقۋلارىندا ستۋدەنتتەر مەن جاس عالىمدار ءۇشىن "سيفرلىق قازاقستان: اقپاراتتىق جۇيەلەر جانە ەنەرگەتيكا"، "كاسپيي كونۆەنسياسى: ايماقتىڭ ساياسي-قۇقىقتىق دامۋ ۇردىستەرى" جانە ت.ب. تاقىرىپتار بويىنشا عىلىمي-تاجىريبەلىك كونفەرەنسيا، "Yessenov University ۇزدىك ستارتاپ جوباسى" بايقاۋى ءوتتى.

شارا بارىسىندا Yessenov University رەكتورى بەرىك احمەتوۆ ايماق باسشىسىنا اۋدارىلمالى سىنىپ تەحنولوگياسىن تانىستىردى. بۇل وقۋ ورنىنىڭ ستۋدەنتتەرى دارىستەرگە كەلمەي، بارلىق ساباقتى ينتەرنەتتەگى ارنايى ارنادان كورە الادى. ءدارىستىڭ ورنىنا ولار سەمينارلارعا قاتىسىپ، ءۇي تاپسىرمالارىن تاجىريبە جۇزىندە ورىنداي الادى. "I حالىقارالىق ەسەنوۆ وقۋلارىنىڭ" ەكىنشى كۇنى مۇنايشى-گەولوگ حالەل وزبەكعالييەۆتىڭ 90 جىلدىعىنا ارنالعان كىتاپتىڭ تۇساۋكەسەرى جانە "Yessenov University ۇزدىك جاس عالىمى "اتتى بايقاۋ وتكىزىلدى