يران يسلام رەسپۋبليكاسى گۇلستان پروۆينسياسىنىڭ گۋبەرناتورى ماناف حاشەمي باستاعان يراندىق دەلەگەسيا ماڭعىستاۋ وڭىرىنە كەلدى. دەلەگاسيا قۇرامىندا مەملەكەتتىك ورگان باسشىلارى، تۋريزم، مەديسينا، ساۋدا-ونەركاسىپ پالاتاسىنىڭ قىزمەتكەرلەرى دە بار. وبلىس اكىمدىگى باسپا ءسوز قىزمەتىنىڭ دەرەگىنشە، بيىلعى ءبىرىنشى جارتىجىلدىقتىڭ قورىتىندىسى بويىنشا ماڭعىستاۋ وبلىسى مەن يران اراسىنداعى جالپى تاۋاراينالىمى 27،2 ملن. اقش دوللارىن قۇراعان. ونىڭ ىشىندە ەكسپورت – 4 ملن. اقش دوللارى، يمپورت – 23،2 ملن.اقش دوللارى.

ماڭعىستاۋ ءوڭىرى يرانعا 4 ملن. اقش دوللار كولەمىندە استىق پەن جارمالار، تەمەكى بۇيىمدارى، قۇرىلىس ماتەريالدارى، بولات جانە باسقا دا تاۋارلاردى ەكسپورتتايدى. ال يراننان ماڭعىستاۋ وبلىسىنا: كوكونىستەر، جەمىس-جيدەكتەر، اعاشتار، سپورتتىق قۇرال-سايماندار، جيھازدار جانە باسقا دا تاۋارلار اكەلىنەدى. يراندىق دەلەگاسيا اقشۇقىر اۋىلىنداعى بالىق زاۋىتىندا بولىپ، قۇرىق پورتىن ارالاپ، ستراتەگيالىق ماڭىزى زور نىساننىڭ مۇمكىندىگىمەن تانىستى. قۇرىق پورتى – ەلىمىز ءۇشىن عانا ەمەس، كوپتەگەن شەت مەملەكەتتەر ءۇشىن دە ترانسكاسپيي حالىقارالىق ءدالىزىنىڭ جانە كولىك-لوگيستيكالىق جۇيەسىنىڭ ەڭ نەگىزگى نۇكتەسى. ماڭعىستاۋ وبلىسى مەن گۋلستان پروۆينسياسى اراسىنداعى ساۋدا-ەكونوميكالىق بايلانىستاردى دامىتۋ ماقساتىندا بيزنەس-فورۋم ءوتتى. وندا ماڭعىستاۋ وبلىسىنىڭ اكىمدىگى مەن گۇلستان پروۆينسياسى اراسىندا، سونداي-اق «اتامەكەن» وڭىرلىك كاسىپكەرلەر پالاتاسى مەن گۇلستان وبلىسىنىڭ ساۋدا-ونەركاسىپتىك پالاتاسى اراسىندا ءوزارا تۇسىنىستىك پەن ىنتىماقتاستىق تۋرالى ەكى مەموراندۋمعا قول قويىلدى. ءوڭىر باسشىسى ەرالى توعجانوۆ ءوز سوزىندە:

"ەلباسى ن.ءا.نازارباۆ ەكونوميكانى ءارتاراپتاندىرۋ، شيكىزاتتىق ەمەس سەكتورعا تىكەلەي ينۆەستيسيالار تارتۋ مىندەتىن تىكەلەي جۇكتەدى. ارنايى ەكونوميكالىق ايماقتار ەكونوميكانى ءارتاراپتاندىرۋدىڭ ءتيىمدى جانە پارمەندى قۇرالى بولىپ تابىلادى. بۇگىنگى «اقتاۋ تەڭىز پورتى» ارنايى ەكونوميكالىق ايماعىندا 500 ملن. اقش دوللار سوماسىندا 27 ينۆەستيسيالىق جوبا ىسكە اسىرىلۋدا. ءبىزدىڭ ءوڭىردىڭ كليماتتىق جاعدايى، ەلەكتر ەنەرگياسىنىڭ قوسىمشا رەسۋرسى ءۇشىن كۇن جانە جەل ەلەكتر ستانسيالارىن سالۋعا مۇمكىندىك بەرەدى. سوندىقتان بالامالى ەنەرگيا كوزدەرىن دامىتۋ ماڭىزدى سەكتور. اگروونەركاسىپ كەشەنىنە ينۆەستيسيا سالۋ ءۇشىن، اتاپ ايتقاندا جىلىجاي شارۋاشىلىقتارىن دامىتۋدا مول مۇمكىندىكتەر بار. ماڭعىستاۋ ءوڭىرىنىڭ گەوگرافيالىق جاعىنان قولايلى

ورنالاسۋى، باي تاريحي مۇراسى، كورىكتى جەرلەرى، تەڭىز ايدىنى، ۇزاق جاعاجاي ماۋسىمى - تۋريستىك اعىندى مولايتىپ ەكى ەل ءتۋريزمىنىڭ دامۋىنا مۇمكىندىك مول"، - دەدى.

شارا بارىسىندا ءبىرقاتار كەلىسسوزدەر جۇرگىزىلىپ، ەگىن، مال جانە قۇس شارۋاشىلىعى، تاماق ونەركاسىبى، ينجەنەرلىك-تەحنيكالىق قىزمەتتەر، قۇرىلىس ونەركاسىبى، بيداي، وسىمدىك مايلارىن ءوندىرۋ-ساتۋ، تەحنيكا، اعاش ونەركاسىبى، ءبۋىپ-تۇيۋ ونەركاسىبى، كەن، فارماسيەۆتيكا، حيميالىق زاتتار، تابيعات ءتۋريزمى مەن ەمدىك تۋريزم سالاسى تالقىلاندى.