ەسكە الۋ مونۋمەنتى قۇتقارۋشىلار مەرەكەسى قارساڭىڭدا سالتاناتتى تۇردە اشىلدى. ول اقتاۋ قالاسىن قورعاۋعا ارنالعان №1 ارنايى مامانداندىرىلعان ءورت ءسوندىرۋ ءبولىمىنىڭ اۋماعىنا قويىلدى. بۇل جونىندە ماڭعىستاۋ وبلىسى تجد ءورت ءسوندىرۋ جانە اۆاريالىق-قۇتقارۋ جۇمىستارى قىزمەتىنىڭ مەملەكەتتىك ءتىل جانە اقپارات توبى حابارلادى.

سالتاناتتى جيىنعا قىزمەتكەرلەر، ازاماتتىق قورعاۋ ارداگەرلەرى مەن قالالىق بيلىك وكىلدەرى، قازا تاپقان ءورت سوندىرۋشىلەردىڭ تۋىستارى مەن جاقىندارى قاتىستى.

«ءبىزدىڭ ءومىرىمىزدى جانە مۇلىگىمىزدى ساقتايتىن، بۇكىل ءومىر بويى ءبىزدىڭ گۇلدەنۋىمىز ءۇشىن كۇرەسەتىن ءورت سوندىرۋشىلەردى ءبىز ەرەكشە قۇرمەتتەيمىز جانە ءقازىر جانىمىزدا جوق بولسا دا جۇرەگىمىزدە قالعان، ومىردەن وتكەن ءورت سوندىرۋشىلەردىڭ جاقىندارى مەن تۋىستارىنا باس يەمىز»، - دەدى وبلىس اكىمىنىڭ ءبىرىنشى ورىنباسارى سەرىك قالەش ۇلى.

ال ماڭعىستاۋ وبلىسى توتەنشە جاعدايلار دەپارتامەنتىنىڭ باستىعى، ازاماتتىق قورعاۋ پولكوۆنيگى قۋانار بەكەن ۇلى بازاربايەۆ ءوز سوزىندە «وسى ەسكەرتكىشتىڭ اشىلۋىمەن ۋاقىتتى، تاريحىمىزدىڭ ساباقتاستىعىن قالپىنا كەلتىرەمىز. ءبىز بەن ءسىز ءۇشىن، ەڭ ءبىرىنشى، ءوز ءومىرىن وتقا توسقان ومىردە جوق ارىپتەستەرىمىزدىڭ بولاشاق ۇرپاقتارى مەن جاقىن-تۋىستارىنا ماڭگى لايىقتى قۇرمەت كورسەتۋدىڭ ماڭىزى زور ەكەندىگىن» ايتتى.

جيىن بارىسىندا قازا بولعاندارعا 1 مينۋت ۇنسىزدىك جاريالانىپ، قاتىسۋشىلار ەسكەرتكىش مانۋمەنتى جانىنا گۇل شوقتارىن قويدى.