ءقابىر شامامەن ب.ز. I-V عاسىرلارىنان قالعان بولۋى مۇمكىن. بۇل تۋرالى ماڭعىستاۋ تاريحي-مادەني قورىعىنىڭ ارحەولوگيا جانە ارحيتەكتۋرا ءبولىمىنىڭ جەتەكشىسى ب. تولەگەن ۇلى فەيسبۋك پاراقشاسىندا جازدى.

ماڭعىستاۋ اۋدانى جىڭعىلدى اۋىلى ماڭىندا ترانشەيا قازۋ كەزىندە قۇرىلىسشىلار كەزدەيسوق ادام قاڭقالارىن كەزدەستىرگەن. ءدال سول اۋماقتاعى قۇرىلىس ۋاقىتشا توقتاتىلىپ، العاشقى اپاتتىق-قۇتقارۋ جۇمىستارى جۇرگىزىلەدى. العاشقى اپاتتىق-قۇتقارۋ جۇمىستارىنا ولكەگە بەلگىلى ارحەولوگ اندرەي استافيەۆ تە قاتىسقان.

— سۇيەكتەردى الىپ، ورنىن تازالاپ، العاشقى اقپاراتتى الدىق. قازىرگى انىقتالعان جاعداي بويىنشا بۇل – كاتاكومبالىق ءقابىر. ىشىنەن 6 ادامنىڭ سۇيەگى تابىلدى، ۋاقىتى جوبامەن ب.ز. العاشقى كەزەڭدەرى دەپ ويلايمىز. ۋاقىتتى تابۋ ءۇشىن ارتەفاكت قاجەت. سۇيەكتەرمەن بىرگە پىشاق، مونشاق جانە ۇرشىق شىقتى. ءبىراق بۇل ەكى-ۇش نارسەمەن قورىتىندى جاساي المايمىز. ادامداردىڭ باسىنىڭ شىعىسقا قاراپ جاتۋىن، بىرنەشە ادامدى بىرگە جەرلەۋىن ەسكەرە وتىرىپ، ب.ز. 1-5 عاسىرلارى بولۋى مۇمكىن دەپ ازىرشە ايتا الامىز، — دەيدى بەكبولات تولەگەن ۇلى.

— ءبىز قۇزىرلى ورگان رەتىندە، الدىمەن، ماماندارىمىزدى جىبەرىپ، انىقتادىق. ول زەرتتەۋدى قاجەت ەتەتىن نارسە. ءبىز ءقازىر سۇيەك قانا تاۋىپ وتىرمىز. زەرتتەۋدىڭ قورىتىندىسى شىققان سوڭ ق ر مادەنيەت جانە سپورت مينيسترلىگىنە وسىنداي جاڭالىق تابىلعانىن حابارلايتىن بولامىز. عالىمدار قاراپ، تاريحي قۇندىلىعى انىقتالسا، مىندەتتى تۇردە زەرتتەلەدى، — دەيدى مادەنيەت باسقارماسىنىڭ باسشىسى پانيا سارمۋرزينا.

ولكەتانۋشىنىڭ ايتۋىنشا، مۇنداي قابىرلەر بۇعان دەيىن سىرلىتام، شاعاتاي، قۇمىرا جەرلەرىنەن دە تابىلعان.

— كاتاكومبانى تابۋ قيىن، ارنايى ىزدەسەڭ دە تاپپايسىڭ. وسى سەكىلدى اياقاستى كەز بولىپ قالادى. بۇرىن تابىلعان كاتاكومبالار ءبىر بولمەلى بولسا، بۇل جەردە بىردەن 8 بولمە شىعىپ تۇر. بۇل – ۇلكەن ولجا، مۇنىڭ ەرەكشەلىگى سوندا. ولجانى قازباي تاستاپ كەتۋ، شىنى كەرەك، تاريح ءۇشىن، عىلىم ءۇشىن قيانات دەپ ويلايمىن، — دەيدى بەكبولات تولەگەن ۇلى.

العاشقى جۇمىستار كەزىندە ماماندار سۇيەكتەردى الىپ، ورىنداردى كومىپ، الاڭشانى قورشاۋعا العان. ەندى ونى ءارى قاراي تولىققاندى عىلىمي تۇرعىدا زەرتتەۋ جۇمىستارىن جۇرگىزۋدى كۇتۋدە.

اۋماققا زەرتتەۋ جۇرگىزۋ ماسەلەسى قاراشا ايىنىڭ العاشقى 10 كۇندىگىندە شەشىلمەك.