مىنگەنمەن ءتۇسۋى قيىن ەلورداداعى قوعامدىق كولىكتەر حالىقتى ءبىراز ابىگەرگە سالعان دەپ جازادى Qamshy.kz اقپارات اگەنتتىگى. حالىقتىڭ كوبىسى اۆتوبۋستاعى جولاقى تولەۋگە كوڭىلى تولمايتىنىن الەۋمەتتىك جەلى ارقىلى جەتكىزگەن بولاتىن. استاناداعى اۆتوبۋستىڭ كوبىندە ادام لىق تولى بولعان كەزدە ادامدار اۆتوبۋستان تۇسە الماي ابىگەرگە تۇسەدى ەكەن. بۇعان سەبەپ Astana LRT كارتاسى ەكەن. ناقتىلاي كەتسەك، اۆتوبۋسقا مىنگەن ادام اhتقى جاقتا ورنالاسقان اپپارات ارقىلى كارتامەن تولەم جاساپ بولعاننان كەيىن مىندەتتى تۇردە اۆتوبۋستىڭ الدىڭعى ەسىگى ارقىلى ءتۇسۋ كەرەك. اۆتوبۋستىڭ ىشىندە ادام از بولسا، بۇل وڭاي ارينە، ال ادامعا لىق تولى اۆتوبۋستا بۇل قاعيدانى ورىنداۋ ايتارلىقتاي قيىنعا سوعادى.

قوعامدىق كولىك سالاسى قاراپايىم حالىقپەن تىعىز بايلانىستا بولعاندىقتان ءتۇرلى داۋلى جايتتاردىڭ ورىن الۋى قالىپتى جاعداي. تەك اتالمىش كومپانيا جولاۋشىلاردىڭ ۇسىنىستارى مەن شاعىمدارىن قاراپ، سۇزگىلەۋدەن وتكىزگەن ءجون.

LRT كومپانياسى ءوز كەزەگىندە حالىققا كولىك كارتاسىنا اقشا سالۋدىڭ ءتيىمدى ءارى قاراپايىم ءادىس-تاسىلىن ۇسىندى.

استانالىقتار ەندى كۇندەلىكتى قولدانىستاعى سمارتفون ارقىلى كولىك كارتاسىنا قانشا اقشا قالعانىن تەكسەرىپ، قاجەتتى سومامەن تولتىرا الادى. ال بۇل ءادىستى قالاي ىسكە اسىرۋ تۋرالى اتالمىش كومپانيانىڭ قىزمەتكەرى تولىعىراق ءتۇسىندىرىپ بەردى.

كومپانيا باسشىسىنىڭ ورىنباسارىنىڭ ايتۋى بويىنشا، كومپانيا كارتادا قانشا اقشا قالعانىن تەسەرىپ، قاجەتتى اقشانى اۋدارۋعا مۇمكىندىك بەرەتىن ارنايى قوسىمشانى جاساپ شىعارعان.

«تەلەفونعا NFC جۇيەسى ورناتىلۋى كەرەك. بۇل 10 سم ارا-قاشىقتىق بويىنشا قۇرىلعىلار بىر-بىرمەن مالىمەت الماساتىن بولادى. ازىرگە Real LRT تەستىلەۋدەن ءوتىپ جاتىر. ەندى كارتاداعى بالانستى تەكسەرۋ ءۇشىن ونى سمارتفون ۇستىنە قويۋ جەتكىلىكتى. كەيىن سمارتفون ەكرانىندا بىردەن قانشا اقشا قالعانى تۋرالى اقپارات پايدا بولادى. ءارى قاراي تولتىرۋ دەگەن تەتىكتى باسىپ، قاجەتتى سومانى ەنگىزەمىز»، دەپ ءتۇسىندىردى بەكمىرزا يگەنبەردييەۆ.

قازىرگى ۋاقىتتا بۇل قوسىمشانى Android وپەراسيالىق جۇيەسى بار ادامدار عانا قوسا الادى. الايدا IOS ءۇشىن دە ءبىر نۇسقا جاساۋ جوسپارلانىپ وتىر.

كومپانيا وكىلىنىڭ ايتۋى بويىنشا، كومپانيا جاڭا اۆتومات ساتىپ الۋدان باس تارتىپ، جولاۋشىلارعا ءتيىمدى ءادىستى ۇسىنباق.

قازىرگى ۋاقىتتا قالا بويىنشا 30 تەرمينال مەن 6 كاسسا قىزمەت كورسەتىپ تۇر. ۋاقىتىن ۇنەمدەگىسى كەلەتىندەرگە جول اقىسىن تولەۋدىڭ بىرنەشە ءتۇرى بار.

ەگەر ءسىز Activ، Kcell، Beeline ابونەنتىن پايدالاناتىن بولساڭىز قاراپايىم حابارلاما ارقىلى «SMSBUS جولاۋشى» قوسىمشاسى ارقىلى جانە "موي Beeline" قوسىمشاسى (ەگەر Beeline ابونەنتى بولساڭىز)، Homebank قوسىمشاسى ارقىلى (ەگەر Halyk Bank نەمەسە Qazkom كارتاڭىز بولسا) اۆتوبۋستا QR-كود ارقىلى تولەي الاسىز.

بۇل ءادىس ءۇشىن 2505 نومىرىنە اۆتوبۋستىڭ QR كودىن جىبەرسەڭىز بولدى. اتالمىش كود اۆتوبۋستىڭ ىشىندە كورسەتىلىپ تۇرادى. كەيىن چەك رەتىندە سىزگە ارنايى حابارلاما كەلەدى.

سونىمەن بىرگە ەلەكتروندى تولەمنىڭ ۋاقىتى قىسقارتىلىپ، وففلاين رەجيمدە جۇمىس ىستەيتىن بولادى. تولەنگەن اقشا 24 ساعاتتا تۇسەدى. الداعى ۋاقىتتا جولاۋشىلاردىڭ ارنايى تەرمينالدار مەن مامانداندىرىلعان كاسسالاردان بولەك رەسۋرستاردان سالىنعان اقشانىڭ ءتۇسۋ ۋاقىتى قىسقارتىلاتىن بولادى. ءتىپتى الداعى 1-2 ايدا ءۇش ساعاتتىڭ ىشىندە تولەگەن قاراجاتىڭىز جول اقى كارتاسىنا تۇسسە تاڭعالماڭىز.

ال كارتاداعى قاراجاتتى تەكسەرە الماساڭىز اۆتوبۋستاعى كەز كەلگەن قىزمەتكەر جاۋاپ بەرىپ، قىزمەت كورسەتەتىن بولادى. كارتاداعى قاراجاتتى تەكسەرۋ ءۇشىن ۆاليداتوردىڭ وڭ جاق تومەنگى تۇيمەسىن باسساڭىز جەتكىلىكتى. سونىمەن بىرگە transcard.kz سايتى ارقىلى جول اقى كارتاسىنداعى قالدىقتى تەكسەرە الاسىز.

جولاۋشىلاردىڭ كوبىسى قانشا تولەم الىنعانى جانە كارتادا قانشا قاراجات قالعانى تۋرالى اقپارات ۆاليداتورلاردا كورسەتىلسىن دەگەن ۇسىنىس ايتقان بولاتىن. سەبەبى جول اقى كارتاسىنداعى قاراجات ءجيى جوعالىپ كەتىپ جاتىر. وسىعان قاتىستى مەكەمە قىزمەتكەرلەرى بۇل ۇسىنىستىڭ ورىندى ەكەنىن، الايدا مۇنداي مۇمكىندىكتى ىسكە اسىرۋ ءۇشىن بەلگىلى ءبىر ۋاقىت قاجەت ەكەنىن ايتقان.

سونىمەن بىرگە حالىق اراسىندا استاناداعى جولاقىعا 180 تەڭگە الىناتىن بولادى دەگەن اقپارات تاراعان بولاتىن. الايدا كومپانيا قىزمەتكەرى بۇل اقپاراتتىڭ جالعان ەكەنىن ايتىپ سەندىردى.

– بۇگىنگى تاڭدا بۇنداي سۇراق كوپتەپ ءتۇسىپ جاتىر. ءبىراق، راستالعان فاكتى جوق. جولاۋشىلارعا كارتا بويىنشا ەگجەي-تەگجەيلى اقپارات (دەتاليزاسيا) ۇسىنىلادى. ويتكەنى قوعامدىق كولىكتەردەگى تولەم قۇرىلعىلارىنىڭ بارلىعى ءبىر جۇيەگە نەگىزدەلگەن. بۇعان ەشىكىم وزگەرىس جاساپ، كوپ نەمەسە ارتىق سومانى الا المايدى. باسىندا بەكىتىلگەن 90 تەڭگە بارلىق جەردە بىردەي تولەم رەتىندە الىنادى. ءتىپتى كوندۋكتورلار دا بۇل ماسەلەگە ارالاسا المايدى. ۆاليداتورلار 180 تەڭگە الدى دەۋ مۇلدە قيسىنسىز. بۇل جاعداي ەشقاشان بولماعان جانە بولمايدى دا. شاعىمدانعان جولاۋشىلاردىڭ ءجۇرۋ كەستەسىمەن ۋاقىتىن ساراپتاپ، ساراپتاما دەتاليزاسياسىن ۇسىنامىز. سوندا عانا كوزدەرى جەتكەن جۇرگىنشىلەر، سابالارىنا تۇسەدى. الاڭداماڭىزدار، ەشقانداي دا 180 تەڭگە الىنبايدى. 100 پايىز كەپىلدىك بار، – دەپ سەندىردى ءاليا جارقىنبەكوۆا.

ءقازىر الماتىداعى «وڭاي» تولەم كارتاسى 100 تەڭگەگە قىمباتتاعان. ال استانادا جولاقىنىڭ باعاسىن ءوسىرۋ ازىرگە جوسپاردا جوق ەكەن.

ال استاناداعى 15 جاسقا دەيىنگى وقۋشىلار مەكتەپتىڭ كولىك كارتاسىن الا الادى. بۇل كارتامەن وقۋشىلار 40 تەڭگە جولاقىسىن تولەيدى.

وقۋشىلاردىڭ كولىك كارتاسىن ءبىلىم بەرۋ مەكەمەسىنەن الۋعا بولادى. ونى رەسىمدەۋ ءۇشىن بالانىڭ تۋۋ تۋرالى كۋالىگى مەن سۋرەتى جەتكىلىكتى.

ەگەر مەكتەپ كارتانى رەسىمدەي الماسا، بالانىڭ اتا-اناسى نەمەسە قامقورشىسى قاجىمۇقان كوشەسى، 14 مەكەنجايى بويىنشا ورنالاسقان تولەم جۇيەلەرى دەپارتامەنتىنە ءوتىنىش بەرۋى كەرەك. بالانىڭ قۇجاتتارىنان بولەك، ءوتىنىش بەرۋشى ەرەسەك تۇلعانىڭ دا جەكە كۋالىگى قاجەت بولادى.

باسقا قالادان كەلگەن بالالار دا ەرەسەكتەردىڭ كومەگىمەن اتالعان مەكەنجاي بويىنشا كارتا الا الادى.

اتاپ وتسەك، تامىزدىڭ ورتاسىنداعى احۋال بويىنشا 120 مىڭنان استام وقۋشى كارتا الىپ ۇلگەرگەن. العاش رەت كارتانى رەسىمدەۋ تەگىن بولادى. ءبىراق وقۋشى كارتاسىن جوعالتىپ السا، قايتا شىعارۋ ءۇشىن 400 تەڭگە تولەۋى ءتيىس.

ال سمارتفوندارعا ارنالعان قوسىمشا قاراشا-جەلتوقسان ايلارىندا ىسكە قوسىلادى.

رەسمي دەرەكتەرگە سۇيەنسەك، استانا قالاسىندا جۋىردا قوعامدىق كولىكتە جولاقىسىن تولەۋگە ارنالعان ارنايى بىلەزىكتەر مەن سالپىنشاقتار پايدا بولادى. بيىل ديەۆايستار تەستىلەۋ رەجيمىندە قولدانىستا بولادى، ال كەلەسى جىلدان باستاپ ساتىلىمعا شىعادى.

جالپى كولىك كارتاسى ناقتى جولاۋشىلار سانىن ەسەپتەۋگە مۇمكىندىك بەرەدى. ول ءوز كەزەگىندە ماماندارعا جاڭا باعدارلاردى ەنگىزۋگە، ولاردى ىڭعايلى ەتىپ جەتىلدىرۋگە كومەكتەسەدى.

ال جولاۋشىلار ءۇشىن دە پايداسى – وزىمەن بىرگە قولما-قول اقشا الىپ جۇرمەيدى. ۇساق تيىن تاسىپ نەمەسە ءىرى اقشانى ۇساقتاۋعا تيىن ىزدەپ اۋرە بولمايدى.

تاعى ءبىر پايداسى – قوعامدىق كولىك سالاسىنداعى كولەڭكەلى اقشا اينالىمىن ازايتۋعا مۇمكىندىك بەرەدى. قالا بيۋدجەتىنە ءتيىستى قاراجات ءوز ورنىنا اداسپاي جەتىپ، جول-كولىك ينفراقۇرىلىمىن جانە قوعامدىق كولىكتى دامىتۋعا ارنالعان نەبىر ۇلكەن جوبالار مەن جۇمىستارعا جۇمسالادى.