پانفيلوۆ اۋدانىندا «مەيىرىم كەرۋەنى» ۇيىمداستىرىلدى دەپ جازادى Qamshy.kz اقپارات اگەنتتىگى. اتالمىش شارانى اتالمىش اۋداننىڭ ىسكەر ايەلدەر كەڭەسى العاش رەت كەڭ كولەمدە ۇيىمداستىرعان.

ءۇش كۇن ىشىندە بيزنەس-حانىمدار اۋدانداعى 13 اۋىلدىق وكرۋگتى ارالاپ، از قامتىلعان 71 ۇيگە ازىق-تۇلىك سەبەتتەرىن سىيلادى. وندا جەرگىلىكتى ايەل-كاسىپكەرلەردىڭ قاراجاتىنا ەڭ قاجەتتى دەگەن تاۋارلار ساتىپ الىنعان.

قايىرىمدىلىق شاراسىنا كاسىپكەرلەر پالاتاسىنىڭ فيليالى مەن كولىكپەن قامتاماسىز ەتكەن اۋداندىق اكىمدىك قولدادى. ءاربىر سەبەت ءوزىنىڭ مەكەنجايى بويىنشا جەتكىزىلدى. جۇمىسپەن قامتۋ جانە الەۋمەتتىك باعدارلامالار ءبولىمى ۇيىمداستىرۋشىلارعا كومەككە ءزارۋ ازاماتتاردىڭ ءتىزىمىن ۇسىنعان.

بۇل ىسكەر ايەلدەر كەڭەسىنىڭ العاشقى دەمەۋشىلىگى ەمەس. قىركۇيەك ايىنىڭ باسىندا «مەكتەپكە جول» رەسپۋبليكالىق اكسياسىنا قاتىسىپ، وقۋشىلاردى مەكتەپ قۇرالدارىمەن قامتاماسىز ەتكەن بولاتىن. «مەيىرىم اۆتوكەرۋەنى» يگى ءداستۇردىڭ جالعاسى اتاندى.

«كەڭ كولەمدە، بارلىق اۋىلدىق وكرۋگتەردى ارالاپ كومەك كورسەتۋىمىز ءبىرىنشى رەت. مەنىڭ ويىمشا، بۇنى كومەك ەمەس، ادامداردىڭ جاي عانا كوڭىلىن سۇراۋ ارەكەتى دەپ باعالاۋ كەرەك سياقتى. سەبەبى، وتباسىلارى وكىلدەرىمەن تىلدەسكىمىز كەلدى. كەي جەردە كەڭەسىمىزبەن دە بولىستىك»، - دەيدى پانفيلوۆ اۋدانى ىسكەر ايەلدەر كەڭەسىنىڭ ءتورايىمى، «يرادا بالىك» ج ش س ديرەكتورى سۋريام يزيموۆا.

پەنجىم اۋىلدىق وكرۋگىندەگى عاليا داركەمبايەۆانىڭ وتباسى ازىق-تۇلىك سەبەتىن العان جانۇيالاردىڭ ءبىرى. سەگىز بالانىڭ اناسى ءوزىنىڭ جاسى مەن كىشكەنتاي بالالارىنىڭ بولۋى سەبەپتى ۇيدە وتىر. ۇلكەن وتباسىنى جولداسى عانا اسىراپ كەلەدى.

«وتاسقانىمىزعا 30 جىل. كورىپ وتىرعاندارىڭىزداي جانۇيامىز ۇلكەن، ءبىراق ەشقاشان مۇڭايعان ەمەسپىن. كۇيەۋىمنىڭ جۇمىسى تۇراقتى ەمەس، كەيدە اپتالاپ جۇمىسقا شىقپايدى. سول ۋاقىتتا قاتتى قينالىپ كەتەمىز»، - دەيدى عاليا داركەمبايەۆا.

ءايىمبيبى ءابيجانوۆا دا كوپبالالى انا. تۇرمىسى تومەندىگىنە بايلانىستى  وتباسى ۇنەمى ۇنەمدەپ جۇرۋگە ءماجبۇر. جاردەماقى مەن بالالارىنىڭ ايلىعى شاڭىراققا جەتپەيدى. ايتۋىنشا، ىسكەر ايەلدەر كەڭەسىنىڭ سىيلاعان سەبەتى ەكى اپتاعا جەتۋى ءتيىس.

«جاقسى ءىستىڭ باستاماشىسى بولعان ازاماتتارعا شىن جۇرەتەن العىسىمدى ايتامىن. كورسەتىلگەن كومەككە ريزامىن. اينالامىزدا جاقسى ادامدار بارىنا، نازاردا جۇرگەنىمىزگە راقمەت!»، - دەيدى ول.

پانفيلوۆ اۋدانى ىسكەر ايەلدەر كەڭەسىنىڭ ءتورايىمى سۋريام يزيموۆانىڭ ايتۋىنشا، ايەل-كاسىپكەرلەر ءاربىر اۋىلدىق وكرۋگتەردە الەۋمەتتىك جاعىنان از قامتىلعان بىرنەشە وتباسىلاردى قول استىنا الىپ، جىل بويى تۇراقتى كومەك كورسەتىپ تۇرادى.

«ءقازىر كاسىپكەرلەر الەۋمەتتىك جاۋاپكەرشىلىگىن جوعارىلاتۋعا تىرىسىپ كەلەدى. قالىپتاستىرۋ كەزەڭىنەن وتكەن سوڭ، كەز كەلگەن كاسىپكەر قورشاعان ورتاسى تۋرالى ويلاپ، ءوزىنىڭ مۇكىندىكتەرىنە قاراي، قايىرىمدىلىق جوبالارىنا قاتىسۋى ماڭىزدى. قارابايىر بولىپ كەتسە دە ايتايىن: جاقسىلىقتى كوپ جاساۋىمىز كەرەك. سول سەبەپتى بيزنەس وكىلدەرىن ەڭ الدىمەن  تۋعان اۋىلىنان باستاپ، سول جەردە كومەككە ءزارۋ ازاماتتاردى قولداۋعا شاقىرامىز. ەرتەڭگى كۇنى بۇل ءىسىمىزدى جالعاۋشى جاستارعا ۇلگى بولۋى كەرەك»، - دەيدى سۋريام يزيموۆا.

اۆتوكەرۋەننىڭ ۇيىمداستىرۋشىلارى جەلتوقسان ايىندا اۋدان اۋماعىن تاعى ءبىر مارتە ارالاۋدى جوسپالاپ وتىر. ال الداعى قاراشادا ىسكەر ايەلدەر از قامتىلعان بالالاردى جىلى كيىمدەرمەن قامتاماسىز ەتەدى.