الماتى قالاسى تۇركىسىب اۋدانىندا ەسكى ءۇيدى ءسۇرۋ باعدارلاماسى بويىنشا بىرنەشە جوسپارلار ىسكە اسىرىلدى دەپ جازادى Qamshy.kz اقپارات اگەنتتىگى.  بۇل تۋرالى اۋدان اكىمى مالىمدەگەن بولاتىن. الماتى قالاسىنداعى ەسكى ۇيلەردىڭ كوبىسى تۇركىسىب اۋدانىندا ورنالاسقان. ەكى قاباتتى 16 ءۇي سۇرىلسە، تۇرعىندارعا پايدالانۋعا بەرىلەتىن باسپانا سانى 4 ەسەگە كوبەيەدى ەكەن.ال «وڭىرلەردى دامىتۋ – 2020» باعدارلاماسى بويىنشا «جاس قانات» ىقشاماۋدانىندا 47 تۇرعىن ءۇي بوي كوتەرىپ، تۇرعىنداردىڭ تىلەگىن ورىندادى. بيىلعى جىلدىڭ سوڭىنا دەيىن 90 وتباسى جاڭا پاتەردە قونىس تويىن تويلايدى.

«وڭىرلەردى دامىتۋ – 2020» باعدارلاماسىن ىسكە اسىرۋ ءۇشىن اۋدان نەگىزگى 4 ايماققا بولىنگەن. الداعى ۋاقىتتا بەلگىلەنگەن جوسپار بويىنشا ءسۇرۋ مەن قۇرىلىس جۇمىستارى كەزەڭ-كەزەڭىمەن، ساتى-ساتىسىمەن جۇرگىزىلىپ وتىرادى. بۇل جۇمىستاردىڭ العاشقىسى الداعى جىلدىڭ ءبىرىنشى توقسانىندا باستالادى دەپ جوسپارانۋدا. قازىرگى ۋاقىتتا كەزەكتە 16 ەسكى ءۇيدى ءسۇرۋ جوسپارلانىپ تۇر. ال ولاردىڭ ورنىنا 800 پاتەردى قامتيتىنداي 40 جاڭا ءۇي بوي كوتەرەتىن بولادى.

الماتى قالاسى تۇركىسىب اۋدانىنىڭ اكىمى پاۆەل كۋلاگيننىڭ ايتۋى بويىنشا، بارلىق شارالار كەلىسىم ارقىلى نەمەسە سوت ارقىلى شەشىلەدى. الايدا ەڭ ءبىرىنشى تۇرعىندارمەن ارنايى كەلىسىم جۇرگىزىلەدى. ەگەر تۇرعىندار ءوز ەركىمەن كەلىسپەگەن جاعدايدا سوت ارقىلى ماسەلە شەشىلىپ، ەسكى ۇيلەر سۇرىلەتىن بولادى.

«ءقازىر ءتيىستى جۇمىستار ىستەلىپ جاتىر. جوبا بار. مەنىڭ ويىمشا،  كەلەر جىلدىڭ العاشقى توقسانىندا جاڭا ءۇيدىڭ قۇرىلىسى باستالادى»، دەيدى پاۆەل كۋلاگين.

اۋدان اكىمى تۇركىسىب اۋدانىنداعى نەگىزگى ماسەلەلەردىڭ كوبىسى جاڭادان قوسىلعان اۋماقتاردا ەكەنىن تىلگە تيەك ەتتى. قازىرگى ۋاقىتتا جارىقتاندىرۋ، گاز جۇرگىزۋ، ينفراقۇرىلىمدى جاقسارتۋ، زاڭسىز قۇرىلىستى جويۋ سەكىلدى ماسەلەلەر ءوز شەشىمىن تاۋىپ جاتىر. ءقازىردىڭ وزىندە 370 كوشەگە شام ورناتىلىپ، 3 جەراستى وتكەلى تۇرعىندارعا قىزمەت كورسەتۋگە جاراپ تۇر. «الماتى-1» تەمىر جول ۆوكزالى الدىنداعى الاڭ دا كورىكتەندىرىلدى. ەكى اپتادان كەيىن قوعامدىق كولىكتەرگە ارنالىپ ايالدامالار قويىلاتىن بولادى. ال الداعى 2019 جىلى اۋدان تولىقتاي دەرلىك كوگىلدىر وتىنمەن قامتىلماق.

«جەكە تۇرعىن ءۇي سەكتورىندا بىرنەشە ۇيلەر كوگىلدىر وتىنمەن قامتىلۋى ءتيىس. ولاردىڭ دەنى ماگيسترالدى جەلىلەردەن الشاق ورنالاسقان. ولاردى بيىل قامتىپ ۇلگەرمەيمىز. ءبىراق كەلەر جىلدىڭ ءبىرىنشى جارتىسىندا اۋدانداعى بارلىق ۇيلەرگە گاز جۇرگىزىلەدى»، – دەدى پاۆەل كۋلاگين.

اۋداندا جاڭا بالاباقشا، مۇگەدەكتەرگە ارنالعان پسيحونيەۆرولوگيالىق ينتەرنات ءۇيى جانە مەديسينالىق مەكەمەلەر سالىنىپ جاتىر. اۋلالاردى كورىكتەندىرۋ مەن ونىڭ قاۋىپسىزدىگىنە دە دەن قويىلۋدا. ءقازىر 4000 بەينەباقىلاۋ كامەرالارى ورناتىلعان.

جالپى 9 ايدىڭ كورسەتكىشى بويىنشا اۋداندا بارلىق سالا بويىنشا وڭ ناتيجە بايقالىپ، اۋداننىڭ جاقسارىپ قالعانىن كورۋگە بولادى. وسى ۋاقىت ىشىندە 30 ميلليارد تەڭگەگە جۋىق ينۆەستيسيا تارتىلىپ، شاعىن جانە ورتا بيزنەس مەكەمەلەرى مەن كومپانيالارىنىڭ سانى 102 پايىزعا ارتقان. بۇعان قاتىستى 7 مىڭعا جۋىق كاسىپكەر جاقسى تابىس تاۋىپ، پايدا كورىپ وتىر. 2018 جىلدىڭ باسىنان بەرى 3 مىڭعا جۋىق جاڭا جۇمىس ورنى اشىلعان. سونىمەن بىرگە جاقىندا اۋەجاي تەرمينالى سالىناتىن بولسا جۇمىس ورىندارىنىڭ سانى تاعى دا ارتاتىن بولادى.

اۋدان اكىمى پاۆەل كۋلاگيننىڭ سوزىنە سەنسەك، قازىرگى ۋاقىتتا اۋەجاي تەرمينالىنىڭ سىزبالىق جۇمىستارىنا بايلانىستى حالىقارالىق كونكۋرس جاريالانعان.

«جاقىن ارادا ءسىز بەن ءبىز سول جوبامەن تانىسامىز دەپ ويلايمىن. كوپشىلىك نازارىنا ۇسىنىلادى. ازىرلەنىپ جاتقان جوبا بويىنشا قازىرگى اۋەجايدىڭ وڭ جاعىندا بوس اۋماق تاڭدالىپ، ءتيىستى جۇمىستار جۇرگىزىلىپ جاتىر»، – دەدى الماتى قالاسى تۇركسىب اۋدانىنىڭ اكىمى.

سۇلتان ءابىش ۇلى