باۋىرجان بايبەك مەگاپوليستىڭ بارلىق اۋداندارىنا قالا تۇرعىندارىنىڭ قاردى ۋاقتىلى تازارتۋ جانە وزگە دە وتىنىمدەرىنە شۇعىل نازار اۋدارۋ ءۇشىن «جەدەل» جەلى مەن ۋچاسكە باستىقتارىنىڭ، اۋدان اكىمدەرى ورىنباسالارىنىڭ بايلانىس نومىرلەرى جازىلعان اقپاراتتىق ستەند ورناتۋدى تاپسىردى. بۇل اقپارات الماتى تۇرعىندارىنا قولجەتىمدى بولۋ ءۇشىن عالامتور جەلىسىنە اشىق تۇردە جاريالانادى.

قىس ماۋسىمىنا دايىندىق بارىسىندا قالانىڭ كوممۋنالدىق قىزمەتىنە جاياۋ جۇرگىنشىلەر جۇرەتىن تروتۋارلار مەن اۋلا ءىشىن جەدەل تازارتۋدا پيك-تەردىڭ جۇمىسىن بارىنشا كۇشەيتۋ قاجەتتىگى ەسكەرتىلدى. وسى ىسكە جاۋاپتى مەردىگەرلىك ۇيىمداردىڭ جۇمىسىن الماتى قالاسىنىڭ تابيعي رەسۋرستار جانە تابيعاتتى پايدالانۋدى رەتتەۋ باسقارماسى باقىلايتىن بولادى.

«قالانى رەكونسترۋكسيالاۋعا بايلانىستى جاڭارعان داڭعىلدار مەن كوشەلەردە ارنايى تەحنيكا، ونىڭ ىشىندە كوپفۋنكسيونالدى Pony ماشينالارى، ميني جۇكتيەگىشتەر، جەڭىل تراكتورلار جۇمىس ىستەيتىن بولادى. ال جۇمىسشىلار توسەلگەن زاتتارعا ەش اقاۋ تۇسىرمەيتىن ارنايى قۇرالداردى پايدالانادى»، - دەدى باسقارما باستىعى اسەت ماسابايەۆ.

ول ءوزىنىڭ سوزىندە قالادا قاردان تازارتىلاتىن جولدىڭ جالپى كولەمى 20 ملن. م².ەكەنىن ايتتى. كوشەلەردى قىستا 13 مەردىگەرلىك ۇيىم، 1285 ارنايى تەحنيكا بىرلىگى تازارتادى. جول تازالايتىن جۇمىسشىلار سانىن 1700-دەن 3200 ادامعا جەتكىزۋ جوسپارلانعان.

اۋداندار بويىنشا وندىرىستىك بازالار قۇرىلعان، بۇل قار تازالاۋ جۇمىستارىن 1،5 ەسە جەدەلدەتەدى. جۇمىسشىلار ديسلوكاسياسى جانىنا مودۋلدى كونتەينەرلەر قويىلادى، ولار سول جەردە كيىنىپ، جىلىنىپ، ىستىق اس ىشەدى. پوليسيا جانە قۇتقارۋ قىزمەتىمەن بىرگە ەۆاكۋاتور كەزەكشىلىگى ۇيىمداستىرىلادى جانە سىپىرۋ-جيناۋ تەحنيكالارى قاتار جۇرەدى.