كەشەلى بەرى قازاقستاننىڭ ۇكىمەت باسشىسى جۇمىس ساپارىمەن الماتى وبلىسىن ارالاپ قايتتى. پرەمەر-مينيستر باقىتجان ساعىنتايەۆ  قازاقستان مەن قىتايدىڭ شەكاراسىندا ورنالاسقان وتكىزۋ بەكەتىنە بارىپ، ونداعى اتقارىلىپ جاتقان جۇمىستارمەن تانىستى.

اتاپ وتەر ءبىر جايت، «نۇر جولى» قازاقستان جاعىندا بولسا، ال «قورعاس» قىتايمەن شەكارا ماڭىنداعى حالىقارالىق ورتالىق ەكەنىن ايتا كەتكەن ءجون.

اتى ايتىپ تۇرعانداي، «نۇر جولى» پرەزيدەنت نازاربايەۆتىڭ «نۇرلى جول» باعدارلاماسى اياسىندا جۇزەگە اسقان «باتىس ەۋروپا — باتىس جۇڭگو» حالىقارالىق ءدالىزىنىڭ كىرەر قاقپاسى.

بۇل ورتالىق ازيا اۋماعىنداعى ەڭ ۇلكەن وتكىزۋ پۋنكتى سانالاتىندىقتان ونىڭ حالىقارالىق ماڭىزى بار. دەمەك، بۇدان شىعاتىن قورىتىندى، «نۇر جولى» پرەزيدەنتتىڭ «نۇرلى جول» باعدارلاماسىنىڭ سوڭعى قورىتىندىسى دەسە دە بولادى. قىتايدىڭ «ءبىر بەلدەۋ-بىر جول» باعدارلاماسىمەن شەكتەسەتىن نازاربايەۆتىڭ اتالعان جوباسىنىڭ قازاقستان ءۇشىن ترانزيتتىك الەۋەتى وتە زور بولىپ وتىر. ويتكەنى اتالعان جوبا ۇى جىبەك جولىن جاڭعىرتادى. رەسەي، ودان ارى ەۋروپاعا قاراي باعىت الاتىن بۇل جول ارقىلى ءارتۇرلى جۇك تاسىمالى وتەدى. ساۋدا قاتىناسىن عانا ەمەس، جولاۋشىلارعا دا قىزمەت كورسەتەتىن بۇل باعىت جۇڭگو مەن قازاقستان اراسىندا ەڭ الدىمەن الىس-بەرىستى دامىتىپ وتىر.

ايتا كەتەر ءبىر جايت، اتالعان كولىك-لوگيتستيكالىق ورتالىعىنىڭ قۇرىلىسى 2017 جىلى باستالعان. اينالاسى بىرەر جىلدىڭ ىشىندە قۇرىلىسى اياقتالىپ، وسىدان 1،5 اي بۇرىن پايدالانۋعا بەرىلگەن ورتالىقتىڭ 27 قىركۇيەكتە اشىلۋ سالتاناتى ءوتتى.

 «نۇر جولى» باقىلاۋ وتكىزۋ پۋنكتىنىڭ جۇمىسى بۇرىنعىداي ەمەس، جەڭىلدەگەن، تۇگەلدەي اۆتوماتتاندىرىلعان جانە دە  توقتاۋسىز جۇمىس ىستەيدى. جۇك كولىكتەرىن شەكارالىق راسىمدەۋ كوپ ۋاقىت المايدى. مۇنىڭ بارلىعىنا بار-جوعى 40 مينۋتتاي ۋاقىت كەتەدى

الىپ ءىرى كەشەن جۇمىس كۇندەرى ەرسىلى-قارسىلى ەكى باعىتتا 2500 كولىكتى وتكىزە الادى. ناقتى دەرەككە جۇگىنەر بولساق،  2500ء-دىڭ ىشىندە 300 -دەي جولاۋشى كولىگى بار ەكەنىن ايتا كەتكەن ءجون. قارجى مينيسترلىگى مەملەكەتتىك كىرىستەر كوميتەتى ءتوراعاسىنىڭ ورىنباسارى عۇسمان ءامرين كەلەشەكتە بۇل پۋنكتتەن 500 كولىكتى وتكىزۋگە بولاتىنىن تىلگە تيەك ەتتى.

ارينە، وتكىزۋ ورتالىعىنىڭ حالىقارالىق ماڭىزى وتە جوعارى ەكەنىن ايتتىق. بىرىنشىدەن، «نۇر جولى» ەلىمىزدىڭ ينۆەستيسيالىق مۇمكىندىگىن ارتتىرۋعا مول سەپتىگىن تيگىزەدى. ەكىنشىدەن، وسى ايماقتىق ەكونوميكانىڭ دامۋىنا قۋاتتى سەرپىن بەرەدى.

 «قورعاستى» ارالاۋ بارىسىندا پرەمەر-مينيستر باقىتجان ساعىنتايەۆ شەكارا ماڭى ىنتىماقتاستىعىنىڭ حالىقارالىق ورتالىعىنىڭ جۇمىسىمەن دە تانىستى. جوبا قازاقستان مەن جۇڭگو مەملەكەت باسشىلارىنىڭ باستاماسىمەن جۇزەگە اسىرىلۋدا. ماقسات — ەكى ەل اراسىنداعى ساۋدا-ەكونوميكالىق، ينۆەستيسيالىق، عىلىمي-تەحنيكالىق جانە مادەني ىنتىماقتاستىقتى دامىتۋ.

ارينە ساۋدا - ساتتىق دامىعان سايىن، كەلىپ-كەتۋشىلەردىڭ دە سانى ارتا تۇسەتىنى بەلگىلى. ءبۇل ورايدا 2018 جىلدىڭ قاڭتارىنان قىركۇيەك ايىنا دەيىن بەكەتتەن ەكى جاقتى وتۋشىلەردىڭ جالپى سانى 1 ملن ادامنان اسقان. بولاشاقتا ەكى جاققا قاتىنايتىن ادامداردىڭ سانى مۇنان دا ۇلعايا تۇسپەك. ويتكەنى شەكارا ماڭىنداعى ساۋدا الاڭى مەن وتكىزۋ-باقىلاۋ بەكەتى دەمالىسسىز، تاۋلىك بويى جۇمىس ىستەيتىن بولادى. تاعى ءبىر اتاپ وتەر جايت، «قورعاس» ماڭىندا بولاشاقتا ءبىلىم جانە وقىتۋ، سونداي-اق ىسكەرلىك  ورتالىقتارى، تۇرعىن ۇيلەر مەن سپورتتىق ساۋىقتىرۋ ورىندارى دا سالىناتىن بولادى.  

ەركىن قالدان