بۇگىن تۇركىستان وبلىسىنىڭ اكىمى جانسەيىت تۇيمەبايەۆ پەن «تۇرعىن ءۇي قۇرىلىس جيناق بانكى» اق-نىڭ وڭتۇستىك فيليال ديرەكتورى قۇدايبەرگەن سەيتمامبەتوۆپەن كەزدەسىپ، «نۇرلى جەر» مەملەكەتتىك باعدارلاماسىمەن بەرىلەتىن كرەديتتىك تۇرعىن ءۇي قۇرىلىسىن دامىتۋ ماسەلەلەرىن تالقىلادى دەپ جازادى Qamshy.kz اقپارات اگەنتتىگى. 

قوس تاراپ كەزدەسۋ كەزىندە تۇرعىندارعا قولجەتىمدى باسپانا تۇرعىسىندا تۋىنداعان كەيبىر ماسەلەلەردى تالقىلاپ، شەشۋ جولدارىن قاراستىردى.

بانكتىڭ وڭىرلىك جەتەكشىسى وسىعان دەيىن اتقارىلعان بىرنەشە جۇمىستاردى اتاپ ءوتىپ، الداعى جوسپارلارىمەن ءبولىستى. ونىڭ ايتۋى بويىنشا، قازىرگى تاڭدا «تۇرعىن ءۇي قۇرىلىس جيناق بانكى» اق-تىڭ وڭتۇستىك فيلالى «باسپانا» اتتى مەكەمەسىمەن قول قويۋ شارالارىن جۇرگىزىپ جاتىر. اتالمىش بانكتىڭ وڭىرلىكجەتەكشىسى قۇدايبەرگەن سەيتمامبەتوۆ بيىلعى جىلدىڭ 1ء-شى جەلتوقسانىنان باستاپ بانك ۇجىمى «7-20-25» باعدارلاماسى بويىنشا ءتيىستى جۇمىستاردى ىسكە اسىرا باستايتىنىن اتاپ ءوتتى.

سونىمەن بىرگە، قۇدايبەرگەن سەيتمامبەتوۆ وبلىس اكىمىنە وبلىس تۇرعىندارى ءۇشىن ءتيىمدى ءارى ىڭعايلى بولاتىن ۇسىنىستاردىڭ بارىن ايتىپ، قۇلاعدار ەتتى.

ونىڭ ايتۋىنشا، العاشقى سالىمسىز-اق باسپانالى بولۋعا بولاتىن جوبادا قاراپايىم حالىقتىڭ تۇرمىستىڭ حال-احۋالى باسا نازارعا الىنىپ، قاراستىرىلعان.

وسىناۋ ۇسىنىس، تىلەكتەرگە قانىققان ايماق باسشىسى، ەڭ باستىسى، باسپانالاردىڭ قولجەتىمدى بولۋى قاجەتتىگىن اتاپ ءوتتى. «7-20-25» باعدارلاماسىن وڭىردە مىقتاپ قولعا الۋ ءۇشىن تۇسىندىرمە جۇمىستارىن كەڭىنەن جۇرگىزۋدى ءتيىستى باسقارما باسشىلارىنا تاپسىردى.

ايتا كەتەيىك، اعىمداعى جىلى «7-20-25» باعدارلاماسىن وبلىستا ىسكە اسىرۋ ماقساتىندا تۇركىستان قالاسىندا قۇرىلىس كومپانياسى «تۇركىستان» اكك» اق-ى ارقىلى 6 كوپقاباتتى تۇرعىن ءۇيدىڭ (288 پاتەر، 15،6 مىڭ ش.م.) قۇرىلىسىن باستاعان بولاتىن. بۇل پاتەرلەردى 2019 جىلى پايدالانۋعا تاپسىرۋ جوسپارلانىپ، بارلىق ۇيلەردى «7-20-25» باعدارلاما ارقىلى تاراتۋ كوزدەلۋدە. «7-20-25» باعدارلاماسى ارقىلى سالىنعان تۇرعىن ۇيلەردى تاراتۋ وبلىستىڭ ەنەرگەتيكا، تۇرعىن ۇي-كوممۋنالدىق شارۋاشىلىق باسقارماسى ارقىلى جۇرگىزىلەدى. سونىمەن قاتار، «تۇرعىن ءۇي قۇرىلىس جيناق بانكى» اق باسشىلىعىنىڭ مالىمەتىنە سايكەس 2019 جىلى وبلىس ورتالىعى - تۇركىستان قالاسىندا بانكتىڭ وبلىستىق فيليالى اشىلاتىن بولادى.