كاسپيي ماڭى ەلدەرىنەن كەلگەن جانە جەرگىلىكتى جۋرناليستەردەن قۇرىلعان حالىقارالىق تەلەەكسپەديسيا "ءوز كوزىڭمەن" دەپ اتالدى. «رۋحاني جاڭعىرۋ» باعدارلاماسى اياسىندا ءوتىپ جاتقان جوبا تۋرالى باسپا ءسوز كلۋبىندا بولعان كونفەرەنسيادا ايتىلدى.

تۇرىكمەنستان، ازەربايجان، رەسەي جانە قازاقستاننان جينالعان توپ اتىراۋ ءوڭىرىنىڭ كيەلى جەرلەرى مەن تاريحي-مادەني ورىندارىن ءبىر نىساننان ەكىنشى نىسانعا جاياۋ بارۋ ارقىلى تاماشالادى. شەتەلدىك ازاماتتار  ساپار بارىسىندا حالىقتىڭ تۇرمىس-تىرشىلىگىمەن،  دالا شەجىرەسىمەن، كورنەكتى تۇلعالارىمەن تانىستى. ولار وسىعان دەيىن يمانقارا ۇڭگىرى، اقمەشىت، قۇلشان اتا جەراستى مەشىتى، ارالتوبە قورىمى، تاسكەشۋ كەرۋەن سارايىن ارالادى. ءسويتىپ، ولكەمىزدە تۇڭعىش رەت جاياۋ تۋريستىك مارشرۋت جولى سالىندى. كەلگەن قوناقتار العان اسەرلەرىمەن جانە وسىنداي اۋقىمدى جوبانى ءوز ەلدەرىندە وتكىزۋ جونىندەگى ويلارىمەن ءبولىستى. ولاردى جەرگىلىكتى حالىقتىڭ قوناقجايلىلىعى مەن دارحاندىعى، ءوز ەلىنىڭ تاريحي تامىرىن تەرەڭ ءبىلۋى تاڭ قالدىرعان. سونىمەن بىرگە، بارلىق تاريحي ەسكەرتكىشتەردىڭ مەملەكەت قورعاۋىندا ەكەنىنە ءتانتى بولعان. ءتۇسىرىلىم توبى جۇمىسىن اياقتاعاننان كەيىن سول ەلدەردىڭ تەلەارنالارىنان كورسەتىلەتىن 20 مينۋتتىق 12 فيلم دايىندالاتىن بولادى.