اتىراۋ قالاسىنداعى «تاماشا» ويىن-ساۋىق كەشەنىندە ۇلتتىق قولونەر تۋىندىلارىنىڭ كورمەسى ءوتىپ جاتىر.

وندا باتىس قازاقستان وبلىسىنىڭ بەلگىلى شەبەرلەرى وزدەرىنىڭ قولدان جاساعان بۇيىمدارىن اتىراۋلىقتارعا ۇسىندى. ولاردىڭ اراسىندا سۋرەتشى، ءارى دومبىرا جاساۋ شەبەرى جانپەيىل سەيتحانوۆ، «يزۋمرۋدنىي گورود» ورتالىعى، «مەكو» ديزاين ستۋدياسىنىڭ وكىلدەرى مەن كوپتەگەن قولونەرشىلەر بار.

2006 جىلى قۇرىلعان «عىلىمي زەرتتەۋلەردى قولداۋ» قورىنىڭ ديرەكتورى، رەسەي ولكەتانۋشىلار وداعىنىڭ مۇشەسى ايبولات قۇرىمبايەۆ جەرگىلىكتى جەردەن وسى كورمەنىڭ وتۋىنە دەمەۋشىلىك تانىتقان گۇلجان ەلەشيەۆاعا العىسىن بىلدىرەدى.

– بۇل شارا «اقجايىق – شەبەرلەر قالاسى» جوباسى اياسىندا ءوتىپ جاتىر. ءبىزدىڭ قوردا ءقازىر جۇزدەن استام قولونەرشى تىركەلسە، وسىندا سونىڭ وتىزى كەلىپ وتىر. ولار جارمەڭكەلەرگە تۇراقتى شىعىپ ءجۇر (اتىراۋلىق قولونەرشىلەرگە دە ءوز ونەرلەرىمەن، تاماشا تۋىندىلارىمەن ءبولىسۋ ءۇشىن ارنايى الاڭ كەرەك-اق. اۆتور.) اتاپ ايتسام، باتىس قازاقستان وبلىسىنىڭ بىرنەشە اۋداندارىندا، ءتىپتى، كورشىلەس رەسەيدىڭ سامارا قالاسىندا دا بولدىق. ال، اتىراۋعا العاش رەت ات باسىن بۇردىق جانە سوڭعىسى بولماس دەپ ۇمىتتەنەمىن. ەكىنشىدەن، «كاسپيي كۋبوگى – جايىق جاعاسىندا» اتتى ۇلتتىق سپورت تۇرلەرىنەن حالىقارالىق ءتۋرنيرىن تاماشالادىق، – دەيدى ول.

سونداي-اق، اتالعان قور تاريحي ەكسپەديسيالار ۇيىمداستىرىپ، تاريحي-مادەني تاقىرىپتا كىتاپ باسىپ شىعارۋمەن دە اينالىسادى ەكەن. ماسەلەن، كەزىندە بوكەي ورداسى ورىن تەپكەن اۋدانداردى ارالاپ، كونە قۇلپىتاستارداعى جازۋلاردى قازاق تىلىنە اۋدارعان.