بىرنەشە رەسەيلىك تەلەارنا گرۋزيادا ءتبيليسيدىڭ شەت ايماعىندا قۇپيا زەرتحانا بار ەكەنىن حابارلادى. وندا ادامدارعا قۇپيا تۇردە ءقاۋىپتى تاجىريبە جۇرگىزەتىنى ايتىلادى.
«زاڭسىز تاجىريبە» تۋرالى العاشقىلاردىڭ ءبىرى بولىپ گرۋزيانىڭ بۇرىنعى مەملەكەتتىك قاۋىپسىزدىك ءمينيسترى يگور گيورگادزە ايتقان ەدى. ول گرۋزيا تۇرعىندارىنا اقش-تان اكەلىنگەن تەكسەرىلمەگەن پرەپاراتتاردى سالىپ، سونىڭ سالدارىنان ادامدار كوز جۇمعانىن «دالەلدەيتىن» قۇجاتتاردى جاريالادى-مىس.
ودان كەيىن رەسەي بيلىگى اكىمشىلىك عيماراتىنداعى زەرتحانانىڭ ەكى قاباتىندا امەريكالىق اسكەريلەر جۇرەتىنىن ايتتى.
بۇل اقپاراتتاردىڭ راس، وتىرىك ەكەنىن انىقتاۋ ءۇشىن بي-بي—سي كوررەسپوندەنتى ستيۆ روزەنبەرگ تبيليسيگە بارىپ «ءولىم زەرتحاناسىن» ءوز كوزىمەن كوردى.
گەورگيي حاتەليشۆيلي قۇجاتتاردى جاساعان ادامداردىڭ ءبىرى. ول 2015 جىلى گرۋزيانىڭ دەنساۋلىق ساقتاۋ مينيسترلىگىندە جۇمىس ىستەدى. دۇنيە جۇزىنە تانىلعان باعدارلامانىڭ باستى ماقساتى — گرۋزياداعى س گەپاتيتىن جويۋ. باعدارلاما اياسىندا قولدانىلعان امەريكالىق پرەپاراتتار تاجىريبەدەن وتكىزىلىپ، قولدانۋعا رۇقسات بەرىلگەن.
«گيورگادزە مىرزا نەلىكتەن "ادامدارعا تاجىريبە جاسالىپ جاتىر" دەپ اقپارات تاراتقانى تۇسىنىكسىز. سەبەبى 36 000 ادام جازىلىپ شىقتى. ونىڭ تەك 200ء-ى عانا كوز جۇمدى جانە جاناما اسەرلەر دە از بولدى»، - دەيدى گەورگيي حاتەليشۆيلي.
تبيليسي ماڭىنداعى زەرتحانانى گرۋزيا بيلىگى باسقارادى. ءبىراق عيماراتتى اقش-تىڭ قورعانىس مينيسترلىگى سالدى.
ماسكەۋ ورتالىقتىڭ ەكى قاباتى امەريكانىڭ اسكەرىنە ارنالعان دەگەن ويدا. بۇل اقپاراتتىڭ جالعان ەكەنىن دالەلدەۋ ءۇشىن اۋرۋدى باقىلاۋ ورتالىعىنىڭ ديرەكتورى اميران گامكرەليدزە بي-بي-سي جۋرناليسىنە عيماراتتا ەكسكۋرسيا جاسادى.
«مۇمكىن مەن ولاردى ءبىر جەرگە تىعىپ وتىرعان شىعارمىن؟ امەريكالىق اسكەريلەر قايدا ەكەنىن بىلەسىز بە؟»، - دەپ كۇلدى ورتالىق ديرەكتورى.
رەسەي زەرتحانادا ينفەكسيا جۇقتىرعان ماسانى تاراتاتىن درونداردى جاساپ شىعاراتىنىن ايتادى.
«ءبىزدىڭ ونداي ىسپەن اينالىسىپ جاتقانىمىزدىڭ دالەلى قايدا؟ ولار دالەلدى بىزگە كورسەتە الا ما؟ مۇندا گرۋزيا تۋرالى قايدا جازىلعان؟ (قولىنداعى قاعازدى كورسەتىپ)»، - دەيدى اميران گامكرەليدزە.
بي-بي-سي ءجۋرناليسى جان-جاقتى زەرتتەۋ جۇرگىزگەننەن كەيىن رەسەي تاراتىپ وتىرعان اقپاراتتىڭ جالعان ەكەنىنە كوز جەتكىزگەن.
جالعان جاڭالىقتاردىڭ باستى پروبلەماسى – ولاردىڭ شىندىققا ۇقساۋى. ءبىر ساتكە بولسا دا توقتاپ، دەتالدارعا ءمان بەرسەڭىز، ءىستىڭ اق-قاراسىن اجىراتا الاسىز.
رەسەي فەدەراسياسىنىڭ سىرتقى ىستەر مينيسترلىگىنىڭ رەسمي وكىلى ماريا زاحاروۆا دالەل تۋرالى بىلاي دەگەن ەدى: «ءقازىر سىزدەردە دالەل بولماسا ول مۇلدە جوق دەگەن ءسوز ەمەس».
تاجىريبە تۋرالى العاشقىلاردىڭ ءبىرى بولىپ حابارلاعان يگور گيورگادزەنىڭ ءوزى ءسوزىن دالەلدەي الماي وتىر.
جۋرناليست: — كلينيكالىق تەكسەرۋدەن وتپەگەن پرەپاراتتى گرۋزيا تۇرعىندارىنا بەرگەنىنە دالەل بار ما؟
يگور گيورگادزە: — جوق، مەن بىردەڭەنى دالەلدەپ وتىرۋعا زاۋقىم جوق. مەن ماسەلەنى كوتەرىپ وتىرمىن.
جۋرناليست: — بۇل جالعان اقپارات قوي، ياعني؟
يگور گيورگادزە: — بىلمەيمىن! بىلمەيمىن!
پىكىر قالدىرۋ