اتىراۋ قالاسىنداعى «ءبىلىم-يننوۆاسيا» ليسەيى بيىل «رۋحاني جاڭعىرۋ» جوباسىنىڭ «تاربيە جانە ءبىلىم» اتتى كىشى باعدارلاماسى اياسىندا وقۋشىلار اراسىندا تەگىن نەگىزدە ات سپورتى كلۋبىنىڭ ۇيىرمەسىن ۇيىمداستىرۋدى قولعا الدى. وسىعان وراي، جاڭاتالاپ اۋىلىندا ورنالاسقان «قۇلاگەر» شارۋا قوجالىعىندا جاڭا كلۋب تۇساۋىن كەستى.

سالتاناتتى اشىلۋ راسىمىندە ءسوز العان «ءبىلىم-يننوۆاسيا» ليسەيىنىڭ ديرەكتورى يسمايل ەلما شاكىرتتەرىن قۋانىشتارىمەن قۇتتىقتادى.

– مەملەكەت باسشىسى نۇرسۇلتان نازاربايەۆ ءوزىنىڭ «بولاشاققا باعدار: رۋحاني جاڭعىرۋ»  اتتى ماقالاسىندا: «ءبىز جاڭعىرۋ جولىندا بابالاردان ميراس بولىپ، قانىمىزعا سىڭگەن، بۇگىندە تامىرىمىزدا بۇلكىلدەپ جاتقان ىزگى قاسيەتتەردى قايتا تۇلەتۋىمىز كەرەك. …ۇلتتىق كود، ۇلتتىق  مادەنيەت ساقتالماسا، ەشقانداي جاڭعىرۋ بولمايدى» دەگەن بولاتىن.

حالقىمىز سوناۋ ەرتە زاماننان ونەردىڭ سان الۋان ءتۇرىن بويىنا ءسىڭىرىپ، ونى ۇرپاقتان-ۇرپاققا اماناتتاپ، بۇگىنگى كۇنگە جەتكىزدى. ۇلتتىق سپورتىمىزدىڭ ءبىر ءتۇرى – ات سپورتى. ەندەشە، ۇلتتىق جاڭعىرۋدىڭ ەندىگى باسىم باعىتتارىندا ءبىزدىڭ ۇلتتىق سپورت ويىندارى  تۇرۋعا ءتيىستى بولسا كەرەك. ويتكەنى، بۇل ۇلتتىق سانا مەن ءور رۋحتى قالىپتاستىرۋدىڭ كىلتى بولىپ سانالادى. ەندى مۇندا 35 وقۋشى ءار اپتا سايىن ارنايى بولىنگەن اۆتوبۋسپەن كەلىپ، ات سپورتىمەن اينالىسا الادى، – دەدى ول.

ليسەي ديرەكتورىنىڭ تاربيە ءىسى جونىندەگى ورىنباسارى اماندىق ەسقالييەۆ كومپيۋتەر مەن ۇيالى تەلەفوندارىنا شۇقشيىپ العان قازىرگى بالالاردى وسىنداي ادىسپەن ۇلتتىق قۇندىلىقتارعا دەگەن قىزىعۋشىلىعىن وياتۋعا بولادى. سوندىقتان، مۇنداي جوبانىڭ ماڭىزى زور ەكەنى ايتپاسا دا تۇسىنىكتى.