قاراپايىمدىلىق، توسىن، ناقتىلىق، سەنىمدىلىك، ەموسيا جانە وقيعا. بۇل – ماقالاداعى ويدى ساپالى ەتىپ قالىپتاستىرۋدىڭ التى قاعيداسى. ونى ءار جۋرناليست  جەتىك، ءارى ۇتىمدى پايدالانا بىلسە، وقىرمان جۇرەگىنەن جول تابار دۇنيە جازادى. بۇل تۋرالى گارۆارد ۋنيۆەرسيتەتىنىڭ تۇلەگى شىڭعىس مۇقان «اتىراۋ-اقپارات» سەرىكتەستىگىنىڭ باسپا ءسوز كلۋبىندا وتكەن جيىندا مالىمدەدى.

سپيكەر «جابىسقاق» دەپ اتالاتىن سەمينار-ترەنينگتە اتالعان التى قاعيدانى تەرەڭىرەك تالداپ، ماقالانىڭ يدەياسى قاراپايىم، ءارى تەرەڭ بولۋ قاجەتتىگىن ايتتى. «ماقالانىڭ نەگىزگى يدەياسى ءبىرىنشى سويلەمدە ­– ليدتە جازىلادى. ودان ءارى ويلار توڭكەرىلگەن پيراميدا ىسپەتتەس جالعاسا بەرەدى. سونداي-اق، ءباسپاسوزدىڭ وقىلىمدى ءارى وقىرمان سانىنىڭ ارتۋى ءۇشىن ونىڭ ءار بەتىندە ادامداردىڭ اتتارى ءجيى اتالۋى ءتيىس. ماسەلەن، ءبىر ماقالادا تاقىرىپقا بايلانىستى دۇكەن ساتۋشىسىنىڭ، قالا تۇرعىنىنىڭ، مەكەمە باسشىسىنىڭ، بولماسا باسقا ءبىر مامانداردىڭ ءاتى-جونىن كەلتىرىپ، ولاردىڭ پىكىرلەرىن جازىپ وتىرعان ءجون» دەدى شىڭعىس مۇقان.

ونىڭ ايتۋىنشا، شەتەلدىك باسپاسوزدەر وسى قاعيدانى ءجيى  قولدانادى. سونداي-اق، جازبا ادام ويىندا جاتتالىپ قالۋى ءۇشىن ءتىلى قاراپايىم، يدەياسى توسىن بولعانى ءجون. كۇندەلىكتى ءبىرقالىپتىلىقتان شىعىپ، تاڭ قالدىراتىنداي وي تاۋىپ، جاقسى دۇنيەلەر  ۇسىنعان ءجون. «ءجۋرناليستىڭ جازعان دۇنيەسى وقىرمانعا ەرەكشە اسەر ەتىپ، ونى كوز الدىنا ەلەستەتەتىندەي بولۋى قاجەت. ماتەريالدارداعى وي نانىمدى بولۋى ءۇشىن ناقتى مامانداردى سويلەتۋ ماڭىزدى. ىشكى-سىرتقى سەنىم كوزدەرىن پايدالانۋعا بولادى. ادامداردىڭ جەكە مۇددەسىنە دە نازار اۋدارىلادى» دەدى شىڭعىس جۇمابەك ۇلى.