«قازاق ءتىلى ءالىپبيىن لاتىن گرافيكاسىنا 2025 جىلعا دەيىن كەزەڭ-كەزەڭىمەن كوشىرۋ جونىندەگى ءىس-شارالار جوسپارىنا» سايكەس 14 قاراشا كۇنى رەسپۋبليكا بويىنشا جالپىحالىقتىق ديكتانت وتەدى. شارانىڭ ماقساتى –لاتىننەگىزدى قازاق ءتىلى ءالىپبيىن، ەملە ەرەجەلەرىن مەڭگەرۋ، وعان بەيىمدەلۋ جانە ءتىلدى مەڭگەرۋگە دەگەن قىزىعۋشىلىقتى ارتتىرۋ.

ديكتان جازۋدىڭ الدىندا 15 مينۋت بۇرىن تىڭداۋشىلارعا لاتىننەگىزدى قازاق ءالىپبيى مەن ونىڭ ەملەسى تانىستىرىلادى جانە جاڭا ءالىپبي نۇسقاسى، ارنايى جازۋ پاراقتارى تاراتىلادى. ماڭعىستاۋ وبلىستىق تىلدەردى دامىتۋ، ارحيۆتەر مەن قۇجاتتاما باسقارماسى مالىمەتىنشە، ديكتانت ءماتىنى اۋديوقۇرىلعىدان ءۇش رەت دىبىستالادى. دىبىستالۋ جىلدامدىعى ءتىل مەڭگەرۋ دەڭگەيىنىڭ تالابىنا ساي. قاتىسۋشىلار ءماتىندى ءبىرىنشى رەت وقىعاندا مۇقيات تىڭداپ، ەكىنشى رەت وقىعاندا جازۋى كەرەك. ودان سوڭ قاتەسىن تەكسەرۋ ءۇشىن ءماتىن تاعى ءبىر رەت وقىلادى. ءاربىر دىبىستالۋ ارالىعىندا ءۇزىلىس بولادى.

ديكتانت رەسپۋبليكا بويىنشا ءبىر كۇندە، ءبىر ۋاقىتتا جازىلادى. بەكىتىلگەن ءماتىن (80-90 ءسوز) اۋديوجازباسىنىڭ ۇزاقتىعى 30 مينۋت. رەسپۋبليكالىق شاراعا ماڭعىستاۋدان 80 مىڭ ادام قاتىسادى دەپ جوسپارلانعان.

ديكتانت جازۋعا 15 جاستان اسقان بارلىق ازامات قاتىسا الادى. قاتىسۋشىلار وزدەرىمەن قالامساپتارىن الىپ كەلۋى ءتيىس.

بەلگىلەنگەن ورىندارعا كەلىپ قاتىسا المايتىن تۇلعالار ديكتانتتى emle.kz، tilalemi.kz سايتتارىنىڭ باستى بەتىندە ورنالاسقان سىلتەمەمەن كومپيۋتەر نەمەسە ۇيالى تەلەفون (سمارتفون) ارقىلى كىرىپ، بەلگىلەنگەن ۋاقىتتا ديكتانت اۋديوسىن تىڭداي وتىرىپ جازا الادى.

ديكتانتتى جازىپ بولعان سوڭ سكانەرلەۋ نەمەسە فوتوعا ءتۇسىرۋ ارقىلى tilalemi.kz@gmail.com ەلەكتروندىق پوشتاعا جولداۋى قاجەت. سونداي-اق ديكتانت اياقتالعان سوڭ اتالعان سايتتا ديكتانتتىڭ دۇرىس نۇسقاسى مەن ديكتانتتى باعالاۋ ولشەمشارتتارى شىعادى. ءاربىر پايدالانۋشى جۇمىسىن دۇرىس نۇسقامەن سالىستىرا وتىرىپ، ولشەمشارتتارعا سايكەس ءوزىن-وزى باعالاي الادى.

ارنايى قۇرىلعان جۇمىس توپتارى ديكتانت قورىتىندىسىن شىعارىپ، 5 كۇنتىزبەلىك كۇن ىشىندە ستاتيكاسىن جاريالايدى.