اقتاۋ قالاسىندا قازاقستان رەسپۋبليكاسىنىڭ پارلامەنتى سەناتى مەن رەسەي فەدەراسياسى فەدەرالدىق جينالىسى فەدەراسيا كەڭەسىنىڭ ىنتىماقتاستىق جونىندەگى كوميسسياسىنىڭ 13ء-شى وتىرىسى ءوتتى. وتىرىسقا يران دەلەگاسياسى دا قاتىستى.

شارانى سەنات ءتوراعاسىنىڭ ورىنباسارى سەرگەي گروموۆ اشىپ، كاسپيي تەڭىزىنىڭ قۇقىقتىق مارتەبەسى تۋرالى كونۆەنسياعا قول قويىلعان كاسپيي ماڭى مەملەكەتتەرى باسشىلارىنىڭ اقتاۋ ءسامميتىنىڭ قورىتىندىلارىن استانا جوعارى باعالايتىنىن سوزىنە تيەك ەتتى.

سەنات ءتوراعاسىنىڭ ورىنباسارى وسىناۋ ەرەكشە قۇجاتقا قول قويۋ جونىندەگى كەلىسىمگە كەلۋدەگى رەسەي مەن يراننىڭ ۇلەسىن جوعارى باعالادى. «بۇل ءبارىمىز ءۇشىن زور جەتىستىك دەپ سانايمىن. بۇگىنگى وتىرىس ءبىزدىڭ ەلدەرىمىز باسشىلارىنىڭ تىلەگىن ومىرگە ەنگىزۋ»، - دەدى ول. س.گروموۆ كونۆەنسياعا قول قويىلۋى وسىناۋ ەرەكشە سۋ ايدىنىنا ەكىجاقتى دەڭگەيدە دە، كوپتاراپتى سيپاتتا دا بەيبىتشىلىك پەن ءوزارا ءتيىمدى ىنتىماقتاستىق ايماعى مارتەبەسىن بەكىتۋگە مۇمكىندىك بەرەتىنىن اتاپ ءوتتى. «ەندى كونۆەنسيانى ۇزاققا سوزباي، ءبىزدىڭ پارلامەنتتەرىمىزدىڭ راتيفيكاسيالاعانى ماڭىزدى بولىپ وتىر. بيىلعى 6 قاراشادا كونۆەنسيانى راتيفيكاسيالاۋ جونىندەگى قۇجاتتار توپتاماسى قازاقستان رەسپۋبليكاسىنىڭ ۇكىمەتىندە قارالعانىن حابارلايمىن. كونۆەنسيانى راتيفيكاسيالاۋ تۋرالى زاڭ جوباسىن ۇكىمەت الداعى ۋاقىتتا پارلامەنت ماجىلىسىنە بەرەدى دەپ كۇتىپ وتىرمىز»، - دەدى س.گروموۆ.

ماڭعىستاۋ وبلىسى اكىمى باسپا ءسوز قىزمەتىنىڭ مالىمەتىنشە، وتىرىس بارىسىندا ەكى ەلدىڭ سەناتورلارى ءبىرىڭعاي ەكونوميكالىق كەڭىستىك اياسىندا ماڭعىستاۋ وبلىسى مەن رەسەيدىڭ داعىستان رەسپۋبليكاسىن مىسال ەتە وتىرىپ، شەكارالىق ايماقتاردى دامىتۋدى، كاسپييدەگى تۋريزم، ەكولوگيا مەن بيورەسۋرستاردى قورعاۋ سالاسىنداعى ىنتىماقتاستىقتى دامىتۋ ماسەلەلەرىن تالقىلادى.

كونۆەنسيا تەڭىزدەگى قۇقىقتار مەن ەگەمەندىكتىڭ اراجىگىن اجىراتۋعا، قويناۋىن پايدالانۋ، ترانزيت پەن تاسىمالداۋقۇقىقتارىن جۇزەگە اسىرۋعا، سۋ استى قۇبىرلارى مەن جەلىلەردى جۇرگىزۋگە، تاريعي ورتا مەن بيولوگيالىق رەسۋرستاردى قورعاۋعا بايلانىستى اۋقىمدى ماسەلەلەردى قامتيدى.

ءسوز العان رەسەي فەدەراسياسى فەدەراسيا كەڭەسى اگرارلىق-ازىق-تۇلىك ساياساتى جانە تابيعاتتى پايدالانۋ كوميتەتى ءتوراعاسىنىڭ ورىنباسارى سەرگەي بەلوۋسوۆ جانە يران يسلام كونسۋلتاتيۆتىك كەڭەسى ءتوراعاسىنىڭ ءبىرىنشى ورىنباسارى ماسۋد پەزەشكيان كونۆەنسيانى ۋاقىتىندا راتيفيكاسيالاۋدىڭ ماڭىزى تۋرالى ايتتى.

س.گروموۆ پەن يران يسلام كونسۋلتاتيۆتىك كەڭەسى ءتوراعاسىنىڭ ءبىرىنشى ورىنباسارى ماسۋد پەزەشكياننىڭ كەزدەسۋىندە پارلامەنتارالىق ىنتىماقتاستىق جانە ەكىجاقتى قاتىناستاردى، ونىڭ ىشىندە پارلامەنتارالىق ءۇنقاتىسۋلاردى ودان ءارى نىعايتۋ ماسەلەلەرى تالقىلاندى.

وتىرىسقا سەناتورلار جەڭىس نۇرعالييەۆ، ولگا پەرەپەچينا، ميحايل بورتنيك، عۇمار دۇيسەمبايەۆ جانە باقتىباي شەلپەكوۆ قاتىستى