بۇگىن پارلامەنت ءماجىلىسىنىڭ ءتوراعاسى نۇرلان نىعماتۋلين ەستونيانىڭ پرەمەر-مينيسترى يۋري راتاس باستاعان دەلەگاسيا وكىلدەرىمەن كەزدەستى.   

تاراپتار ەكىجاقتى قارىم-قاتىناستى نىعايتۋدىڭ وزەكتى سۇراقتارىن تالقىلادى.  

ءماجىلىس ءتوراعاسى ەستونيا قازاقستاننىڭ بالتىق ايماعىنداعى ماڭىزدى ارىپتەسى ەكەنىن العا تارتا كەلىپ، وتكەن جىلى ەكى ەل اراسىندا ديپلوماتيالىق قاتىناستىڭ ورناعانىنا 25 جىل تولعانىن اتاپ ءوتتى.

ءبىزدىڭ ەلىمىز اتالعان مەملەكەتپەن جان-جاقتى ءارى سىندارلى ديالوگتى ودان ءارى دامىتۋعا ىنتالى.

ءماجىلىس ءتوراعاسى اسىرەسە، قازاقستان پرەزيدەنتى نۇرسۇلتان نازاربايەۆتىڭ باستاماسىمەن جۇزەگە اسىرىلىپ جاتقان «سيفرلى قازاقستان» باعدارلاماسىنا ايرىقشا توقتالدى.

وسى رەتتە ەستونيانىڭ سيفرلاندىرۋ، اقپاراتتىق-كوممۋنيكاسيالىق تەحنولوگيا سالاسىنداعى جەتىستىكتەرىن ءسوز ەتكەن ن. نىعماتۋلين وسى باعىتتا جان-جاقتى، سونىڭ ىشىندە، زاڭنامالىق دەڭگەيدە تاجىريبە الماسۋدىڭ ماڭىزدىلىعىنا ەرەكشە كوڭىل ءبولدى.

ءوز كەزەگىندە ەستونيا پرەمەر – ءمينيسترى قازاقستاننىڭ، سونىڭ ىشىندە، استانانىڭ دامۋ قارقىنىنا تاڭدانىسىن جاسىرمادى. سونداي-اق، ءبىزدىڭ ەلدەرىمىزدىڭ ءوزارا ءىس-قيمىلى تابىستى دامىپ كەلە جاتقانىن ايتا كەلىپ، ەكىجاقتى قاتىناستى ودان ءارى نىعايتۋدىڭ الەۋەتى زور ەكەنىنە توقتالدى.

ودان ءارى پالاتا سپيكەرى ءماجىلىستىڭ زاڭ شىعارماشىلىق جۇمىسى جايىندا اڭگىمەلەي كەلىپ، پارلامەنتارالىق بايلانىستى كۇشەيتۋ ماسەلەلەرىنە توقتالدى.