جازۋشى، پرەزيدەنت ستيپەندياسى مەن «سەرپەر» جاستار سىيلىعىنىڭ يەگەرى اياگۇل مانتاي جالعىز ءىنىسىنىڭ ولىمىنە قاتىستى سوت وتىرىسىنىڭ ءادىل جۇرگىزىلۋىن سۇراپ ەلباسىنا حات جازدى.
ق ر پرەزيدەنتى
ن.ءا.نازاربايەۆتىڭ،
باس پروكۋرور
ق.پ.قوجامجاروۆتىڭ،
ىشكى ىستەر ءمينيسترى ق.ن.قاسىموۆتىڭ،
جوعارى سوتتىڭ ءتوراعاسى ج.ق.اسانوۆتىڭ
نازارىنا
مەن، پرەزيدەنت ستيپەندياسىنىڭ، «سەرپەر» جاستار سىيلىعىنىڭ يەگەرى، جازۋشى اياگۇل مانتاي شاراسىزدىقتان سىزدەرگە حات جولداپ وتىرمىن.
سىزدەرگە حات جولداپ وتىرعان سەبەبىم: 2018 جىلدىڭ 23 تامىزىندا شىمكەنت قالاسىندا ورىن العان جول اپاتىنان تۋعان، جالعىز ءىنىم، تۇركيانىڭ ەگە ۋنيۆەرسيتەتىنىڭ دوكتورانتى، ەكى اپتادان كەيىن دوكتورلىق ديسسەرتاسياسىن قورعاۋ ءۇشىن جولعا جينالىپ جۇرگەن مانتايەۆ تۇراتبەك كوز جۇمدى. بۇل كەزدە مەن ماسكەۋ قالاسىندا ەدىم، سەبەبى، شىعارماشىلىعىمدى تانىتۋ ماقساتىندا التى جىلدان بەرى ماسكەۋ قالاسىندا تۇرام.
شىمكەنت قالاسىنداعى بايدىبەك بي مەن كوشەروۆ كوشەلەرىنىڭ قيىلىسىندا، تاڭعى 8-30-دا ءوز جولىمەن، ءبىراق قاتتى جىلدامدىقپەن كەلە جاتقان (قولىمدا ۆيدەوايعاق بار) بمۆ اۆتوكولىگىنىڭ الدىنان تويوتو اۆتوكولىگى شىعىپ، رولگە يە بولا الماي قالعان بمۆ اۆتوكولىگى جول شەتىندە باعدارشامنىڭ جانۋىن كۇتىپ، وزىمەن ءوزى تۇرعان ىنىمە بارىپ سوعىلعان. ءىنىم سول جول اپاتى ورىن العان جەردە ءتىل قاتپاي كوز جۇمعان. مارقۇم اكەمنىڭ قىرقى وتكەنىنە ءبىر اي وتەر-وتپەس جالعىز ىنىمنەن ايىرىلدىم.
تويوتو 082 اۆتوكولىگىنىڭ يەسى ءابيلحاسوۆ نۇرلان ايىبىن تولىق مويىنداپ وتىر. ءبىراق تەرگەۋ ىسىندە بمۆ 286 اۆتوكولىگىنىڭ قاتتى جىلدامدىقپەن كەلە جاتقانى ەسكەرىلمەي، كولىك يەسى مۋرتازين سابير تەك قانا جابىرلەنۋشى بولىپ كورسەتىلگەن. قاتتى جىلدامدىقپەن كەلە جاتقان مۋرتازين سابيردىڭ دا ءىنىمنىڭ ولىمىندە كىناسى بار دەپ سانايمىن. ەگەر مۋرتازين سابير قاتتى جىلدامدىقپەن كەلمەسە، جولدىڭ شەتىندە تۇرعان ىنىمە سوقتىقپاس ەدى. قۇزىرلى زاڭ ورىندارىنان مۋرتازين سابيردىڭ قانداي جىلدامدىقپەن كەلە جاتقانىن انىقتاۋىن سۇرايمىن.
تەرگەۋ ءىسىنىڭ ءادىل وتپەۋىنە مۋرتازين سابيردىڭ پرەزيدەنت ن.ءا.نازاربايەۆتىڭ، ىشكى ىستەر ءمينيسترى ق.قاسىموۆتىڭ، باس پروكۋرور ق.قوجامجاروۆتىڭ جانە باسقا دا قۇزىرلى مەكەمەلەردىڭ باسشىلارىنا جازعان ارىزى تەرگەۋ ىسىنە قاتىسى بار ادامداردى قورقىتتى دەپ سانايمىن. ەگەر كىسى ولىمىنە قاتىسى بار ادامنىڭ (مەن قاتىسى بار دەپ سانايمىن) ءبارى سىزدەردىڭ اتتارىنىڭىزعا حات جازىپ، اقتىعىن، كىناسىزدىگىن دالەلدەپ، ارىزبەن ءبارىن قورقىتىپ، ۇركىتە بەرسە، تەرگەۋ ءىسى قايدان ءادىل ءوتسىن، سوت قايدان ءادىل ءوتسىن؟!
مۋرتازين سابيردىڭ پرەزيدەنتتىڭ اتىنا، باس پروكۋروردىڭ، ىشكى ىستەر ءمينيسترىنىڭ اتىنا جازعان ءۇش بەتتىك ارىزىنىڭ كوشىرمەسى مەندە ساقتاۋلى تۇر. ءىنىمنىڭ ولىمىنە قاتىستى تەرگەۋ ءىسىن باقتيار دوريبايەۆ جۇرگىزگەن.
ەرتەڭ، ساعات 10-30-دا شىمكەنت قالاسىنداعى قاراتاۋ اۋداندىق سوتىندا ءىنىمنىڭ ولىمىنە قاتىستى ەكىنشى سوت وتىرىسى وتەدى. سوت راحمانبەردى ەرماحان ەركىن ۇلى. سىزدەردەن سوتتى توقتاتىپ، تەرگەۋ ءىسىن باسىنان قايتا جۇرگىزۋگە قولۇشىن بەرۋدى سۇرايمىن. ادام ءولىمى ورىن العان جەردە قازاقستان رەسپۋبليكاسىنىڭ كونستيتۋسياسى اياققا تاپتالماۋىن سۇرايمىن.
وسى كۇنگە دەيىن بۇل ماسەلەنى قولعا الماۋىمنىڭ سەبەبى: ۆيدەو كەشە قولىما ءتۇستى. اۋىلدا، جالعىز ۇلىنان ايىرىلىپ، اڭىراپ وتىرعان اۋرۋ انامنىڭ قاسىنان شىعا الماي، تەرگەۋ ىسىنە قاتىسا المادىم.
سىزدەردى بۇل ماسەلەگە، شەتەلدە تۇراتىن جازۋشىنىڭ جانايقايىنا بەي-جاي قاراماس دەپ سەنەمىن.
اياگۇل مانتايدىڭ فەيسبۋك پاراقشاسىنان الىنعان