...قامسىز قازاقپىز. ەشقاشان اسىقپايمىز. كەشكى ساعات جەتىگە شاقىرىلعان تويعا – ساعات وندا اسىقپاي بارامىز...
سابىرلى جۇرتپىز با، الدە، ەرتە تۋىپ، كەش قالعان حالىقپىز با؟..
كۇنى كەشە سپورت سەركەمىز سەرىك قوناقبايەۆ الەمدىك بوكس فەدەراسياسىنىڭ باسشىلىعىنا كانديدات بولۋعا كەشىگىپ تىركەلدى. ايتەۋىر، اۋپىرىمدەپ، ساۋاتى مەن زاڭنىڭ ارقاسىندا، بايگەگە ءتۇسىپ ەدى، وزبەكتەن جەڭىلىس تاپتى. سول جەڭىلىستىڭ سەبەبى – ءبىرىنشى اينالىمعا كەشىگۋدە ەمەس پە ەكەن؟ بالكىم، الا تاقيالى باۋىرىمىز العاشقى اتتانىستا-اق الىپتاردىڭ اۋزىن الىپ، كەلىسىم قىلىپ، قول قىسىپ قويعان شىعار؟!.
ال، ولەگ (شىن اتى – ءاليحان كورىنەدى) سەرمۇحامەدوۆ دەگەن ءبىر قۇلدىق سانانىڭ قۇربانى: «مەن سسرو-دا دۇنيەگە كەلدىم. ول ۋاقىتتا ادىلدىك – زاڭنان جوعارى تۇراتىن. زاڭ – ادىلدىككە مويىنسۇناتىن... اكىمدەر، جەمقور سۋديالار، ساياساتكەرلەر، ساپاسىز ءبىلىم، كوممەرسانت دارىگەرلەر، تاڭداۋلى ادامداردىڭ وففشورداعى قارجىسى – مۇنىڭ بارلىعىن كورىپ قۇسقىڭ كەلەدى، بەتىڭ قىزارادى. وسىنىڭ بارلىعى «ماحاببات، كومسومول مەن كوكتەمدى» الماستىردى. كوپتەگەن قازاقتار ىشكى ءتۇيسىگىمەن رەسەيدى انانىڭ جىلى قۇشاعى رەتىندە قابىلدايدى. ەرتە مە، كەش پە، ونىڭ قۇشاعىنا تىعىلۋعا تۋرا كەلەدى»، – دەپ ساندىراقتاپتى، تاياۋ كۇندەرى. ءبىراق، بىردە-بىر قازاق مىڭق ەتپەيدى. باياعى سول – مارعاۋلىق...
اللا تاعالامىز بىزگە سالبوكسەلىكپەن بىرگە – ءوزىنىڭ شاپاعاتىن دا مولداۋ توگىپ، جاماندىقتان قورعايتىن قالقانىن توسقان سەكىلدى. ايتپەسە، اناۋ يندەەستەردىڭ مولاسىنىڭ ۇستىنە ورناعان اقش دەگەن ەلدە جىل سايىن، كۇن سايىن ءبىر پالەكەت بولادى دا جاتادى.
بىردە اتى اتىشۋلى داۋىلدار كولىكتەردى ماقتاشا ۇشىرىپ، ۇيلەردى ۇيىندىگە اينالدىرسا؛ كەلەسىدە قولانا قاۋ العان ءجاسوسپىرىم ءوزى وقيتىن مەكتەپكە كەلىپ، سىنىپتاستارى مەن ۇستازدارىن قىزىل قانعا بوكءتىرىپ، قىناشا قىرىپ سالادى...
جاقىندا ءبىر قالانى تۇتاسىمەن وت وراپ، ءورت شالدى. اقپارات كوزدەرى: «اقش-تىڭ كاليفورنيا شتاتىنداعى ورمان ورتىنەن كەمىندە 25 ادام قازا تاپقان. سول اۋماقتا تۇرىپ جاتقان تانىمال جۇرگىزۋشى كيم كارداشيان جينالىپ كەتۋگە ءبىر ساعات ۋاقىتى بولعانىن ايتقان. جالپى شتاتتىڭ 16 جەرىنەن ءورت وشاعى تابىلعان. امەريكا بيلىگى مۇنى كاليفورنيا تاريحىنداعى ەڭ ءىرى ورتتەردىڭ قاتارىنا جاتقىزىپ وتىر. كەيبىر وكرۋگتەردە توتەنشە جاعداي جاريالانعان. شامامەن، 400 ءورت ءسوندىرۋشى ءورتتى سوندىرۋگە تىرىسىپ جاتىر» – دەپ، دابىل كوتەردى..
قۇداي بەتىن اۋلاق قىلسىن، ءداپ وسىنداي وراسان كەساپات كەلسە، قامسىز قازاق قايتەر ەدى؟..
تۇماندى ۇيقىدا جۇرەتىن توتەنشە جاعدايلار قىزمەتكەرلەرى ەلگە ەسكەرتۋگە ۇلگەرىپ، ساۋ جۇرتتى ساقتاپ قالا الا ما؟..
اقىن اباي «قىرىق ءبىرىنءشى ءسوز» قارا سوزىىندە: «قازاقتى يا قورقىتپاي، يا پارالاماي، اقىلمەنەن نە جىرلاپ، نە سىرلاپ ايتقانمەنەن ەشنارسەگە كونءدىرۋ مۇمكىن دە ەمەس. ...وزدەرىنىڭ ىرباڭى بار ما، پىش-پىشى بار ما، گۋىلدەگى بار ما، دۇرىلدەگى بار ما – سونىسىنان دۇنيەدە ەشبىر قىزىقتى نارسە بار دەپ ويلامايدى، ويلاسا دا بۇرىلا المايدى، ەگەر ءسوز ايتساڭ تۇگەل تىڭداپ تۇرا المايدى، نە كوڭىلى، نە كوزى الاڭداپ وتىرادى. ەندى نە قىلدىق، نە بولدىق!» – دەپ جازىپتى.
مەنىڭشە، قازاقتىڭ جاۋى – جۇزشىلدىك تە، رۋشىلدىق تا ەمەس، قازاقتىڭ قاس دۇشپانى – ءداپ وسى قامسىزدىقتا!
ۇيقى – تىم ءتاتتى، ويانۋ – تىم قيىن ەكەن-اۋ!..
قاجىمۇقان عابدوللانىڭ فەيسبۋك پاراقشاسىنان الىنعان
