قازاقستانداعى ەڭ تانىمال سپورشىلاردىڭ ءبىرى، اۋىر سالماقتاعى بوكسشى سيدنەي وليمپياداسىنىڭ كۇمىس جۇلدەگەرى مۇحتارحان دىلدابەكوۆ  گولوۆكين مەن الۆارەس اراسىندا وتكەن جەكپە - جەك تۋرالى ايتا كەلىپ، سوڭعى جەڭىلىسىنەن كەيىن گەننادييگە سپورتتى مۇلدە قويۋ قاجەتتىگىن ايتتى. بۇل تۋرالى ول  sports.kz اقپارات اگەنتتىگىنە بەرگەن سۇحباتىندا ءمالىم ەتتى.

–مۇنى ەڭ بىرىنشىدەن، سپورتتاعى ۇلكەن شوۋ-بيزنەس دەپ ايتار ەدىم. وزدەرىڭىز بىلەسىزدەر، كاسىپقوي بوكس جاعدايىندا ۇلكەن اقشا اينالىمعا تۇسكەن ۋاقىتتا جەڭىمپازدى انىقتاۋ 12 راۋندتىڭ قالاي وتكەنىنە بايلانىستى ەمەس. مەنىڭ ويىمشا، سوڭعى بەس جىلداعى گولوۆكين شىققان بيىككە «كانەلو» ەندى  بەتتەپ كەلەدى. ارينە، گولوۆكينگە ەشكىمنىڭ تەڭ كەلمەگەنى – ول اقيقات. ءبىزدىڭ بوكسشى الەمدەگى سۋپەرجۇلدىز بولدى. ەندى ورتا سالماقتاعى مىقتىلىق مەكسيكالىقتىڭ پايداسىندا بولىپ تۇر.

قالاي  ايتقاندا دا، ءقازىر گولوۆكين وتە ناتيجە مەن جىلدامدىقتى كورسەتە الاتىن جاستا ەمەس. ال كانەلو بولسا، ءوز مانسابىنا قاراي جوعارى ورلەپ كەلەدى. ساۋل الۆارەستىڭ ءوز مۇمكىندىگى مەن قۋاتىن اشۋىنا ءالى تولىق مۇمكىندىك بار.

نەگىزى گولوۆكيننىڭ  بوكس قولعابىن شەگەگە ىلەتىن ۋاقىتى كەلدى. اقيقاتى، ول 50 جاسقا دەيىن بوكستاسپايدى عوي. گەنناديي جوعارى ناتيجەلەرگە قول جەتكىزدى، ەل ءۇشىن ۇلكەن جۇمىستار ىستەدى، قازاقستاننىڭ اتىن الەمگە پاش ەتتى. سوندىقتان گولوۆكيننىڭ قازاقستاندىق جاس بوكسشىلاردىڭ كاسىپقوي بوكستا  مۇمكىندىگىن اشۋعا ىقىلاسى شەكسىز ەكەنىن بىلەمىن جانە بۇل  دۇرىس شەشىم دەپ ويلايمىن، - دەدى .سيدنەي وليمپياداسىنىڭ كۇمىس جۇلدەگەرى مۇحتارحان دىلدابەكوۆ.