بۇگىن استاناداعى ۇلتتىق اكادەميالىق كىتاپحانادا قازاقستان رەسپۋبليكاسى مادەنيەت جانە سپورت مينيسترلىگىنىڭ ءتىل ساياساتى كوميتەتى ش.شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعىمەن بىرلەسە وتىرىپ، «تەرمينولوگيانىڭ وزەكتى ماسەلەلەرى» اتتى رەسپۋبليكالىق ادىستەمەلىك سەمينار وتكىزدى. سەمينار كورنەكتى جازۋشى، اۋدارماشى، تەرمينتانۋشى عالىم ءىسلام جارىلعاپوۆتىڭ  100 جىلدىق مەرەيتويىنا ورايلاستىرا ۇيىمداستىرىلعان.

«ءتىل-قازىنا» ۇلتتىق عىلىمي-پراكتيكالىق ورتالىعى باس ديرەكتورىنىڭ مىندەتىن اتقارۋشى ەربول تىلەشوۆ مودەراتورلىق جاسادى.

كىرىسپە ءسوزدى ق ر مادەنيەت جانە سپورت مينيسترلىگى ءتىل ساياساتى كوميتەتىنىڭ ءتوراعاسى قۋات بوراشيەۆ اشىپ، قازىرگى قازاق تىلىندەگى تەرمينولوگيا ماسەلەلەرى بويىنشا جاسالعان جۇمىستار مەن الدا اتقارار جۇمىستار بارىسىن تىلگە تيەك ەتتى.

         سەميناردا قازاقستان رەسپۋبليكاسىندا تىلدەردى قولدانۋ مەن دامىتۋدىڭ  2011-2020 جىلدارعا ارنالعان مەملەكەتتىك باعدارلاماسىن ىسكە اسىرۋ ماقساتىندا قازاقستان رەسپۋبليكاسى پرەزيدەنتى اكىمشىلىگى،  قازاقستان رەسپۋبليكاسى پرەمەر-مينيسترىنىڭ كەڭسەسى، قازاقستان رەسپۋبليكاسى پارلامەنتى سەناتىنىڭ اپپاراتى، قازاقستان رەسپۋبليكاسى پارلامەنتى ءماجىلىسىنىڭ اپپاراتى، قازاقستان رەسپۋبليكاسى مينيسترلىكتەرىنىڭ جەتەكشى ماماندارى اراسىندا قازاق تەرمينولوگياسىنىڭ قوردالانعان ماسەلەلەرى تالقىلاندى. سونىمەن قاتار احمەت بايتۇرسىن ۇلى ۇستانعان تەرمينجاسام مەحانيزمىن ىلگەرى جىلجىتقان ءسوز زەرگەرى ءىسلام جارىلعاپوۆتىڭ تاجىريبەسىنىڭ قىر-سىرى ءسوز بولدى. 

         اتالعان ادىستەمەلىك سەميناردا تەرمينجاسامنىڭ باعىتتارى ايقىندالىپ، تەرميندەردى تالقىلاۋدىڭ حالىقارالىق جانە وتاندىق تاجىريبەلەر زەردەلەندى.

شاراعا قازاقستان رەسپۋبليكاسى پارلامەنتىنىڭ دەپۋتاتتارى، قازاقستان رەسپۋبليكاسى ۇكىمەتىنىڭ جانىنداعى رەسپۋبليكالىق تەرمينولوگيا كوميسسياسىنىڭ مۇشەلەرى، لينگۆيست-عالىمدار، ب ا ق وكىلدەرى، ورتالىق اتقارۋشى ورگانداردىڭ جەتەكشى ماماندارى، ۇلتتىق كومپانيالار مەن اكسيونەرلىك قوعامداردىڭ مەملەكەتتىك تىلدە ءىسقاعازدارىن جۇرگىزۋگە جاۋاپتى قىزمەتكەرلەرى قاتىستى.