الماتى اكىمدىگى A-Parking  باۋىرجان بايبەك پەن ونىڭ تۋىستارىنىڭ يەلىگىندەگى كومپانيا دەگەن جالعان اقپاراتقا قاتىستى پىكىر ءبىلدىردى دەپ جازادى Qamshy.kz اقپارات اگەنتتىگى informburo.kz  سايتىنىڭ دەرەگىن نەگىزگە الىپ. 

«الماتى اكىمدىگى قالا تۇرعىندارىنا ىڭعايلى ترانسپورتتىق ورتا قالىپتاستىرىپ، ەكولوگيالىق جاعدايدى رەتتەپ، كولەڭكەلى ەكونوميكانىڭ كۇرت تومەندەۋىنە جاعداي جاساپ، تۇرعىنداردىڭ ىڭعايلى ءومىر ءسۇرۋى ءۇشىن كولىك رەفورماسىن جۇرگىزۋدە»، - دەيدى اكىمدىك.

اكىمدىك تۇراق تەرمينالدارى مەن ايالدامالاردا ءىلۋلى تۇرعان پلاكاتتارداعى «ا-Parking كومپانياسىنا الماتى اكىمىنىڭ قاتىسى بار» دەگەن جالعان اقپاراتتى كولەڭكەلى كاپيتالعا توقتاۋ سالىپ، اق-قارانى اجىراتۋعا كەدەرگى جاساعىسى كەلەتىن ارنايى ادامداردىڭ قاستاندىعى دەپ باعالادى.

 "A-Parking كومپانياسىنىڭ 70 پايىزى جەكە مەنشىكتە، ال 30 پايىزى مەملەكەتتىڭ يەلىگىندە. 2016 جىلدىڭ مامىر ايىندا ارنايى كونكۋرس جاريالاندى. بۇل كونكۋرسقا 4 كومپانيا قاتىستى، ونىڭ ىشىندە بىرەۋى شەتەلدىك كومپانيا بولاتىن. ناتيجەسىندە، سەرىكتەس رەتىندە «RR2» ج ش س جەڭىسكە جەتتى.

الماتى اكىمدىگى قالا اكىمىنىڭ جانە ونىڭ وتباسى، تۋعان-تۋىستارىنىڭ ا-Parking كومپانياسىندا ۇلەسى جوق ەكەنىن رەسمي تۇردە مالىمدەيدى. وسىعان قاتىستى اكىمدىك قالالىق قۇقىق قورعاۋ ورگاندارىنا جالعان اقپارات تاراتىپ، جالا جابۋعا قاتىسى بار ازاماتتاردى قۋدالاپ، جازالاۋعا ءوتىنىش ءبىلدىردى.

ال قالا اكىمدىگى ءوز كەزەگىندە زاڭسىز ارەكەتتەردى انىقتاپ، قالاداعى جاعدايدى جاقسارتۋ ءۇشىن زاماناۋي باسقارۋ تەحنولوگيالارىن ەنگىزۋدى جالعاستىرادى" دەيدى الماتى قالاسىنىڭ اكىمدىگى.