مانەرلەپ سىرعاناۋدىڭ قازاقستان چەمپيونى گۇلجان ءجۇمادىلوۆا Startime كراۋدفاندينگ (حالىقتىڭ اقشا جيناپ بەرۋ، قازاقشالاپ ايتقاندا جىلۋ-رەد.) الاڭى ارقىلى كانكيگە ساتىپ الۋعا 400 000 تەڭگەنى قاراپايىم قازاقتان سۇراپ جۇرگەنى تۋرالى جازعانبىز.
♦مانەرلەپ سىرعاناۋدان قازاقستاننىڭ چەمپيونى كانكيگە اقشا تاپپاسا دا، وتانىن ساتقىسى جوق
"قامشى" رەداكسياسىنىڭ تاراپىنان مارقۇم دەنيستىڭ وكشەسىن باسىپ كەلە جاتقان گۇلجان ءجۇمادىلوۆاعا مادەنيەت جانە سپورت ءمينيسترى ارىستانبەك مۇحامەدي ۇلى تاراپىنان قولداۋ كورسەتىلسە دەگەن وي تاستاعان ەدىك. اينالدىرعان 15 مينۋتتىڭ ىشىندە مينيسترلىكتىڭ باسپا ءسوز حاتشىسى ايدار قىرىقباي رەداكسياعا حابارلاسىپ، گۇلجان الماتىداعى سپورت ينتەرناتىنىڭ وقۋشىسى بولعاندىقتان بۇل ماسەلەگە قالا اكىمدىگى جاۋاپتى ەكەندىگىن جەتكىزدى. وسىدان كەيىن ءبىز الماتى قالاسى دەنە شىنىقتىرۋ جانە سپورت باسقارماسى سپورتتاعى جوعارى جەتىستىكتەر ءبولىمىنىڭ باسشىسى ءاليا مۇحتار قىزى سماقوۆاعا حابارلاسىپ، تىلدەستىك.گۇلجان دارىندى بالالارعا ارنالعان سپورت ينتەرناتىنىڭ وقۋشىسى ەكەندىگىن ايتا وتىرا، تولىق ماعلۇماتتى اتالمىش وقۋ ورنىنىڭ ديرەكتورىنان الۋدى ءوتىندى.
ال ديرەكتور قانات جارىلقاپ ۇلى ينتەرناتتا بالالارعا بارلىق جاعداي جاسالعانىن ەرەكشە ايتىپ ءوتتى. «تەگىن وقيدى، تەگىن تاماقتانادى. «الماتى ارەنا»، «حالىق ارەنا»، بالۋان شولاق سارايىنداعى مۇزدا تەگىن سىرعاناۋعا بار مۇمكىندىك قاراستىرىلعان. كۇنىنە ەكى رەت جاتتىعۋ جاسايدى. 16 جاستاعى ءجاسوسپىرىم بولعاندىقتان، بۇل ماسەلە شىنىمەن دە مينيسترلىككە قاراستى ەمەس. گۇلجان ءقازىر ماسكەۋدە جاتتىعىپ ءجۇر»،-دەدى ديرەكتور.
ءبىزدىڭ ەندى مانەرلەپ سىرعاناۋدان قازاقستان ۇلتتىق قۇراماسىنىڭ باس باپكەرى، ءقازىر تالليندە جۇرگەن قۇرالاي ۇزۋروۆانى مازالاۋىمىزعا تۋرا كەلدى. سايىسقا بالالاردى دايىنداپ جۇرگەن باپكەر قاربالاسقا تولى ۋاقىتىنا قاراماستان ۆاتساپ ارقىلى بىزگە اقپارات بەرۋگە اسىقتى:
«بۇكىل قازاقستاننىڭ شۋلاپ جاتقانىنان حاباردارمىن. گۇلجاننىڭ اناسى ايجانمەن دە سويلەستىك. كانكي تەپكەن قىزدارىمىزدىڭ جاعدايىنا قاراپايىم حالىقتىڭ وسىنشالىقتى نازار اۋدارۋى، ارينە، قۋانتارلىق جاعداي. سەبەبى ،گۇلجان شىنىمەن دە بولاشاعىنان كوپ ءۇمىت كۇتتىرەتىن تالانتتى قىز. الايدا بۇل جەردە ءبىر تۇسىنىسپەۋشىلىك ورىن العان. گۇلجاندا كانكي بار. ءتىپتى اناسىنىڭ جەكە كۋالىگىنىڭ كوشىرمەسىمەن قوسا تولتىرعان قولحاتى دا بار. وعان سايكەس ايجان قىزىنا كانكي الىپ بەرۋ ءۇشىن مەملەكەتتەن كومەك رەتىندە 275 000 تەڭگە العان. كانكي ساتىپ الىندى. ءبىراق گۇلجانعا ءقازىر باسقا كانكي كەرەك. سەبەبى، گۇلجان جالعىز ەمەس، جۇپ بولىپ بيلەپ، ونەر كورسەتپەكشى بولاشاقتا. سوندىقتان وعان مۇلدەم باسقا تيپتەگى كانكي كەرەك. ءبىراق حالىققا ءوتىنىش ايتقاندا، وسى ءبىر ماسەلەنىنىڭ باسىن اشىپ الۋ كەرەك ەدى. قىركۇيەكتىڭ باسىندا ول اناسىمەن بىرگە ماسكەۋگە كەتتى. رەسەيگە بارىپ شىڭدالۋعا ءوزىم كەڭەس بەرگەن بولاتىنمىن. سەبەبى، گۇلجان بيگە جاقسى، حاريزماعا تولى سپورتشى قىز. "جۇپ بولىپ بيلەپ ونەر كورسەتسە، كوبىرەك جەتىستىككە جەتەدى" دەپ توپشىلادىم. وسى ويىمدى اناسىنا ايتتىم. ايجان ويلانا كەلە ماسكەۋگە اتتاندى. بۇكىل قازاقستاندىق ب ا ق "چەمپيون قىز" جار سالۋدا. ايتپاعىم، گۇلجان ءجۇمادىلوۆا - چەمپيون ەمەس. ول قازاقستان بويىنشا مانەرلەپ سىرعاناۋدا تىزىمدە 6-شى ورىندا تۇرعان سپورتشى. دەگەنمەن، قايتالاپ ايتامىن، تالانتتى. گۇلجاننىڭ جاڭا كانكي ساتىپ الاتىن شىنىمەن دە اقشاسى جوق. سوندىقتان دا كوپ تىلەۋى كول بولىپ، قاجەتتى قارجىنى جيناپ بەرسەك، نۇر ۇستىنە نۇر بولار ەدى".
مانەرلەپ سىرعاناۋدان قازاقستان ۇلتتىق قۇراماسىنىڭ باس باپكەرى قۇرالاي ۇزۋروۆا ايتىلعان سوزدەرىن راستايتىن قۇجاتتار بارىن دا ايتتى.
