نۇرسۇلتان نازاربايەۆ استاناداعى فورۋمدا ەلىمىزدەگى جەتىم بالالاردىڭ جاعدايىنا الاڭدايدى دەپ جازادى Qamshy.kz اقپارات اگەنتتىگى. سونىمەن بىرگە ەلباسى قازاقستاندا بالالار ءۇيى مۇلدەم بولماۋ كەرەكتىگىن جانە شەتەلدەگى اسىراندى بالالاردىڭ ءوز ەلىن ساعىناتىنىن ايتتى.
«ءبىز ارنايى اگەنتتىك قۇرۋعا قاتىستى ۇسىنىستى قولداۋىمىز كەرەك. مۇمكىندىگى بار ادامدار جەتىم بالالاردى بالالار ۇيىنەن الۋى كەرەك. ءبىزدىڭ بالالارىمىز شەكارا اسىپ شەت ەلدە قالۋى ءبىز ءۇشىن قولايلى ما؟» دەدى پرەزيدەنت.
كەيىن ەلباسى ءبىلىم جانە عىلىم ءمينيسترى (كەلەسىدە بعم) ەرلان ساعادييەۆتى سۇراقتىڭ استىنا الدى.
«بعم ءتوراعاسى وسىندا بار ما؟ ەرلان بەرى قارا، 11 شەتەلدىك اگەنتتىك بار، ال بىزدە بىردە-بىرى جوق»، دەپ نارازىلىعىن ءبىلدىردى ەلباسى.
ال ەرلان ساعادييەۆ سوڭعى ءۇش جىلدا قازاقستاندا ءبىر دە ءبىر بالا شەتەلدىكتەرگە اسىراپ الۋعا بەرىلمەگەندىگىن ايتتى. سونىمەن قاتار ەرلان ساعادييەۆ اگەنتتىك قۇرۋ يدەياسىنا قارسى ەمەستىگىن جەتكىزدى.
ەلباسى قازاقستاندىق بيزنەسمەندەردىڭ مەملەكەتتىك ساياساتتىڭ ارقاسىندا بايىعانىن تىلگە تيەك ەتتى.
«مەن بۇرىننان كەدەرگىلەرگە توسقاۋىل قويىپ، تەكسەرۋ جۇمىستارىن الىپ تاستاپ ورتا جانە كىشى بيزنەسكە قولداۋ ءبىلدىرىپ كەلەمىن. مۇنداي ساياساتتى بۇرىننان ۇستانامىن. ەندى ءبىزدىڭ ەلدە حالىقتىڭ جاعدايىن جاساۋعا مىندەتتى تابىستى ازاماتتاردىڭ سانى ارتتى. كوپتەگەن ازاماتتار حالىقتىڭ، مەملەكەتتىك ارقاسىندا بايلىققا جەتتى. ەگەر كەدەيلەر رازى بولماسا، بايلار بايىمايدى»، دەپ مالىمدەدى ەلباسى.
وسىعان دەيىن BI Group كومپانياسىنىڭ باسشىسى ايدىن راقىمبايەۆ بالا اسىراپ الۋ جونىندە ۇلتتىق اگەنتتىك قۇرۋ تۋرالى ۇسىنىستى ايتقان بولاتىن. تابىستى بيزنەسمەننىڭ ايتۋى بويىنشا، قازاقستاندىق بيزنەسمەندەر جەتىم بالالاردىڭ سانىن ازايتۋ ماقساتىندا قيىندىققا تاپ بولعان ايەلدەردى قولداۋعا ارنالعان «انالار ءۇيى» جوباسىن باستاعان.
