بۇگىن الماتى قالاسىندا «Almaty Invest»  جىل سايىنعى ينۆەستيسيالىق فورۋمى بولىپ ءوتتى.

شاراعا الەمنىڭ ءبىرقاتار ەلىنەن 500-گە جۋىق دەلەگات قاتىسۋدا.  ولاردىڭ اراسىندا بەلگىلى ساياساتكەرلەر، قازاقستاندىق جانە شەتەلدىك بيزنەس-ليدەرلەر، ينۆەستيسيالىق كورپوراسيالاردىڭ، قارجى ينستيتۋتتارىنىڭ جانە حالىقارالىق ۇيىمداردىڭ باسشىلارى بار.

الماتى قالاسىنىڭ اكىمى باۋىرجان بايبەك بۇعان دەيىن وتكەن فورۋمدار ناتيجەسىندە قۇنى 1 ملرد دوللار بولاتىن 40-قا جۋىق مەموراندۋمعا قول قويىلعانىن اتاپ ءوتتى.  

"شاھارىمىزدىڭ ينۆەستيسيالىق مۇمكىندىكتەرىن تالقىلاۋ مەن ىسكەرلىك قاتىناستار ورناتۋدىڭ ءداستۇرلى الاڭىنا اينالعان 6-شى حالىقارالىق Almaty Invest فورۋمىنا قوش كەلدىڭىزدەر!

وسىعان دەيىنگى فورۋمدار اياسىندا جالپى سوماسى 1 ميلليارد دوللاردى قۇرايتىن 40-تان استام مەموراندۋمعا قول قويىلعان بولاتىن. ونىڭ ىشىندە قازىرگە دەيىن جالپى قۇنى 400 ميلليون دوللاردى قۇرايتىن 12 جوبا ىسكە استى.

بۇگىنگى فورۋم جۇمىسىنا 20 مەملەكەتتەن كەلگەن شەتەلدىك قوناقتار قاتىسۋدا. قوناقتاردىڭ كوپشىلىگى الماتىعا العاش رەت كەلىپ وتىرعاندىقتان قالامىز تۋرالى ازىراق توقتالىپ وتەيىن.

الماتى – شيكىزاتتىق ەمەس ەكونوميكاسى 35 ميلليارد دوللاردى قۇرايتىن ورتالىق ازياداعى ەڭ دامىعان مەگاپوليستەردىڭ ءبىرى. الىپ شاھار ەلىمىزدىڭ جالپى ىشكى ءونىمىنىڭ بەسىنشى بولىگىن جانە سالىق ءتۇسىمىنىڭ تورتتەن ءبىرىن بەرەدى. جالپى وڭىرلىك ءونىم جان باسىنا شاققاندا 20 مىڭ دوللاردى قۇرايدى.

قالامىزعا حالىقارالىق كومپانيالار ينۆەستيسيانى بەلسەندى قۇيۋدا. 10 جىلدا شاھارىمىزعا 22،2 ميلليارد دوللار ينۆەستيسيا تارتىلعان بولسا، ونىڭ 3،5 ميللياردى شەتەلدىك ينۆەستيسيا. بيىلعى جىلى ينۆەستيسيا كولەمى 21%-كە، سونىڭ ىشىندە شەتەلدىك ينۆەستيسيالار 24%-كە ارتتى.

ەلباسىنىڭ سارابدال ساياساتىنىڭ ارقاسىندا تاۋەلسىزدىك جىلدارىندا مەگاپوليس ەكونوميكاسى 100 ەسەگە، حالىق تابىسى 21 ەسە ارتتى"، - دەپ اتاپ ءوتتى الماتى اكىمى.

اكىمنىڭ ايتۋىنشا، ونىڭ ىشىندە قۇنى 400 ملن دوللار بولاتىن 12 جوبا بۇگىندە جۇزەگە اسىرىلعان. 

الماتى ەكونوميكاسىنا سالىنعان شەتەلدىك ينۆەستيسيا كولەمى ءبىر جىلدا 24% ءوستى. بۇل تۋرالى بۇگىن قالادا ءوتىپ جاتقان «Almaty Invest» جىل سايىنعى ينۆەستيسيالىق فورۋمىندا ءمالىم بولدى.

شاھار باسشى اتاپ وتكەندەي، بۇگىندە قالا ەكونوميكاسىنىڭ 86% ساۋدا مەن قىزمەت كورسەتۋ سالالارىنا تيەسىلى. مۇندا قازاقستانداعى ءىرى كومپانيالاردىڭ ۇشتەن ءبىرى شوعىرلانعان.

سونداي-اق ب.بايبەك اتاپ وتكەندەي، قالا جەرگىلىكتى رەفورمالاردى ىسكە اسىرۋدا جاھاندىق ۇستانىمدارعا سۇيەنەدى جانە ۇزدىك الەمدىك تاجىريبەلەرگە، سونىڭ ىشىندە بۇۇ-نىڭ تۇراقتى دامۋ ماقساتتارى مەن ەكونوميكالىق ىقپالداستىق جانە دامۋ ۇيىمىنىڭ ستاندارتتارىنا باعدارلانعان. اتاپ ايتقاندا،  بۇۇ دامۋ باعدارلاماسىمەن جانە «Systra» فرانسۋزدىق كومپانياسىمەن بىرلەسە كولىك رەفورماسى، امەريكاندىق IDC كومپانياسىمەن بىرلەسە «Smart Almaty» كونسەپسياسى جۇزەگە اسىپ كەلەدى.

"الماتى ءومىر ءسۇرۋ مەن بيزنەس جۇرگىزۋگە قولايلى قالا. بۇگىننىڭ وزىندە قالا ەكونوميكاسىنداعى مەملەكەتتىڭ ۇلەسى – 2،4%.

مۇندا 300-دەن استام ءىرى سالىق تولەۋشى كومپانيالاردىڭ ۇشتەن ءبىرى، 30-دان استام ترانسۇلتتىق كومپانيا، ەلىمىزدەگى بانكتەردىڭ 90%ء-ى، بىرلەسكەن كاسىپورىنداردىڭ 43%ء-ى جانە ءىرى حالىقارالىق ۇيىمدار ورنالاسقان. جاقىندا بىرىككەن ۇلتتار ۇيىمىنىڭ 14 ارناۋلى اگەنتتىگى ءۇشىن ۇيىم حابىنىڭ جاڭا عيماراتى اشىلدى.

الماتى ءوز جولىندا تۇراقتى دامۋ ماقساتتارىنا، ەكونوميكالىق ىنتىماقتاستىق جانە دامۋ ۇيىمىنىڭ ستاندارتتارىنا جانە ۇزدىك الەمدىك تاجىريبەلەرگە سۇيەنەدى. ماككەنزي كومپانياسىمەن بىرلەسە دايىندالعان «الماتى-2020» دامۋ باعدارلاماسى ازيا جانە تىنىق مۇحيتى وڭىرىنە ارنالعان ەكونوميكالىق جانە الەۋمەتتىك كوميسسيا تاراپىنان وسى ايماقتاعى 2016 جىلعى ەڭ ۇزدىك تاجىريبە دەپ باعالاندى"، - دەدى باۋىرجان بايبەك.