تاشكەنتتە وزبەكستاندىق كينەماتوگرافتار تۇسىرگەن «اباي ءسوزى» اتتى دەرەكتى ءفيلمنىڭ تۇساۋى كەسىلدى دەپ حابارلايدى Qamshy.kz اقپارات اگەنتتىگى «حابار 24» سايتىنىڭ دەرەگىن نەگىزگە الىپ.
وزبەك تىلىندەگى تۋىندىدا اقىننىڭ بالالىق شاعى مەن وسكەن ورتاسى، شىعارماشىلىعى مەن مۇراعات قۇجاتتارى كەڭىنەن كورسەتىلگەن. يگى باستاما وزبەكستان پرەزيدەنتى شاۆكات ميرزيويەۆتىڭ قازاق اقىنى اباي قۇنانباي ۇلىنىڭ شىعارماشىلىق مۇراسىن ناسيحاتتاۋ تۋرالى قاۋلىسى اياسىندا جۇزەگە اسىپ وتىر. ويتكەنى كورشى ەل باسشىسى «اباي ەسىمى مەن مول شىعارماشىلىق مۇراسى قازاق حالقىنىڭ عانا ەمەس، بارشا تۇركى حالىقتارىنىڭ، ونىڭ ىشىندە وزبەك حالقىنىڭ رۋحاني دامۋ تاريحىندا وشپەس ءىز قالدىرعان» دەپ اتاپ وتكەن بولاتىن.
قاۋلىنىڭ نەگىزىندە تاشكەنت قالاسىنداعى دەرەكتى فيلمدەر ستۋدياسىنىڭ ۇجىمى ابايدۋىڭ تۋىپ-وسكەن جەرى سەمەيگە ارنايى بارىپ، جيدەبايداعى اقىننىڭ مۋزەيىندە بولعان. قازاقتىڭ كەڭ دالاسىن ارالاپ، ۇلى ويشىل اقىننىڭ ومىرىمەن ەتەنە تانىسقان.
دەرەكتى ءفيلمنىڭ سەناريىن روزيكا مەرگەنبايەۆا جازىپتى.
«قازاقستانعا جاساعان ساپارىمىز ءفيلمنىڭ تولىققاندى جانە تۇشىمدى دۇنيە بولىپ شىعۋىنا مۇمكىندىك بەردى»، – دەيدى رەجيسسەر شۋحرات ماحمۋدوۆ.
«شىن مانىندە وزگە حالىقتى قالاي قۇرمەتتەۋگە بولادى؟ بۇعان جاۋاپ بار، ول ەلدە قانداي ادامدار ءومىر سۇرگەن، قانداي عالىمدار مەن اقىندار، جازۋشىلار بولعانىنا قاراپ تا باعالاۋعا بولادى. سول حالىقتىڭ مادەنيەتىن، جەتكەن جەتىستىكتەرىن سارالاۋ ارقىلى دا كورشى ەلدى قۇرمەتتەۋىمىز كەرەك. سوندىقتان ءبىز بۇل شىعارمانى بۇگىنگى جاستارىمىز ورتالىق ازيا اۋماعىندا، جالپىعا ورتاق كەڭ بايتاق دالامىزدا قانداي عۇلامالار مەن ۇلى ويشىلدار ءومىر سۇرگەنىن ءبىلسىن دەگەن ۇمىتپەن جاسادى. ويتكەنى ءبىز باعزى زاماننان تۋىس بولىپ وستىك. بولە جاراتىن ەشتەمە جوق. ءبىز وتكەنىمىزدەن مەدەت الىپ، سونىمەن ماقتانۋىمىز كەرەك. سونىڭ ءبىرى – اباي. ءبىز سوندىقتان بۇل تۋىندىعا بار كۇشىمىزدى جۇمسادىق»، – دەيدى دەرەكتى فيلم رەجيسسەرى شۋحرات ماحمۋدوۆ.
