ولاينەدە (لاتۆيا) قازاقتىڭ زياتكەرلىك ۇلتتىق ويىنى – توعىزقۇمالاقتان قازاقستاننىڭ تۇڭعىش پرەزيدەنتى كۇنىنە وراي جارىس ءوتتى. سايىستى قازاقستاننىڭ ليتۆا جانە لاتۆياداعى ەلشىلىگى، دۇنيەجۇزىلىك توعىزقۇمالاق فەدەراسياسى جانە ولاينە قالاسى اكىمشىلىگى ۇيىمداستىردى.

جارىسقا 20 سپورتشى قاتىستى. سپورتشى س. اقتايەۆ مىڭ جىلدىق تاريحى بار ويىننىڭ قىر-سىرىمەن تانىستىرىپ، قاتىسۋشىلارعا ستراتەگيا قۇرۋ مەن جىلدام جەڭىسكە جەتۋ تاسىلدەرىمەن ءبولىستى.

تارتىستى ينتەللەكتۋالدى جانە ستراتەگيالىق سايىس ناتيجەسىندە ەرەسەكتەر اراسىندا: 1 ورىن - س. اقتايەۆ (قازاقستان)، 2 ورىن - د.ليپينا  (لاتۆيا)، 3 ورىن - د. كوزلوۆ (لاتۆيا). ۇلدار اراسىندا: 1 ورىن - د. ليپين (لاتۆيا)، 2 ورىن - د. كوزلوۆ، 3 ورىن - د. رامينيش. قىزدار اراسىندا: 1 ورىن - ۆ. چاگينا (لاتۆيا)، 2 ورىن - E. چاگينا، 3 ورىن - M.گەتمانيۋك يەلەندى.

الداعى ۋاقىتتا ەلشىلىك پەن فەدەراسيا جارىستى جىل سايىن وتكىزىپ، ونىڭ اۋقىمىن كەڭەيتۋدى جوسپارلاۋدا. لاتۆياداعى توعىزقۇمالاق سپورتى بويىنشا سەكسيا ل. ازيموۆانىڭ باسشىلىعىنداعى «لوگيكا» ينتەللەكتۋالدى ۇستەل ويىندارى كلۋبىنىڭ بازاسىندا قۇرىلعان.

لاتۆيالىقتار قازاق مادەنيەتى كەشى اۋقىمىندا سونداي-اق قازاقستاننىڭ تابيعاتى تۋرالى فوتوكورمە مەن ۇلتتىق ءبيدى تاماشالاپ، قازاقى داستارحان مازىرىنەن ءدام تاتتى. ولار قازاقستان تۋرالى ۆيكتوريناعا قاتىسىپ، ونىڭ اياسىندا پرەزيدەنت ن. نازاربايەۆتىڭ «ۇلى دالانىڭ جەتى قىرى» ماقالاسىنىڭ نەگىزگى مازمۇنىمەن تانىستى. لاتۆيالىق مەكتەپ حورى قازاقستاندىق تاراپقا سىيلىق رەتىندە «دۋداراي» ۇلتتىق ءانىن ورىنداپ بەردى

توعىزقۇمالاق تەك قازاقستاندا عانا ەمەس، سونىمەن قاتار گەرمانيا، چەحيا، فرانسيا، شۆەيساريا جانە ءتىپتى كولۋمبيا سياقتى الەمنىڭ كوپتەگەن ەلدەرىندە دە تانىمال. قازاقستاندا توعىزقۇمالاقپەن ەكى ءجۇز مىڭنان استام ادام شۇعىلدانادى. كەلەسى جىلى تۇركيادا توعىزقۇمالاقتان كەزەكتى V الەم چەمپيوناتى وتكىزىلەدى.