ەتنيكالىق ۇيعىر مەحريگۇل تۇرسىن ءۇش اي شىڭجاڭداعى ساياسي ۇيرەنۋ لاگەرىندە قاماۋدا بولعان. ول 3 اي بويى كورگەن ازاپقا تولى ءومىرىن اقش كونگرەسى الدىندا ايتىپ بەردى دەپ حابارلايدى Qamshy.kz اقپارات اگەنتتىگى currenttime.tv سايتىنىڭ دەرەگىن نەگىزگە الىپ. ونىڭ سوزىنە سۇيەنسەك، ازاپقا شىداي الماعاندىقتان ول جۇڭگو ساربازدارىنا «مەنى ولتىرە سالىڭدارشى»، دەپ جالبارىنعان.

وسىدان بىرنەشە جىل بۇرىن مەحريگۇل مىسىر ەلىنە وقۋعا بارعان. سول ەلدە كەيىن تۇرمىسقا شىعىپ، وتباسىلى بولىپتى. 2015 جىلى قىتايعا تۋعان-تۋىستارىن كورگىسى كەلىپ جولعا شىعادى. قىتايعا بارعان كەزدە-اق ونى بەلگىسىز ساربازدار تۇتقىنداپ، بالالارىنان اجىراتىپ الادى. كەيىن ونىڭ ءبىر بالاسى قايتىس بولعانى بەلگىلى بولدى. 

جۇڭگو بيلىگى 3 جىل بويى ۇيعىر ايەلدى ەلدەن شىعارماي قويعان. مەحريگۇل 3 رەت شىڭجاڭ لاگەرىندە تۇتقىندا بولعان. اقىرىندا، قىتايدان مىسىرعا شىعۋعا رۇقسات ەتەدى. الايدا ول قىتايعا قايتا ورالۋعا مىندەتتى بولدى. ءبىراق كايرعا كەلە سالا مەحريگۇل امەريكالىق ديپلوماتتارمەن بايلانىسقا شىعىپ، اقش-قا كەلەدى.

«مەنى تەرەزەسى جوق جەر استىنداعى كامەراعا جىبەردى. تۇرمەنىڭ ىشىندەگى بارلىق جايتتى باقىلاپ وتىرۋ ءۇشىن ءتورت جەرگە بەينەباقىلاۋ كامەراسىن ورناتقان. مەنىمەن بىرگە كامەرادا 60 ادام بولدى. ينە شانشار جەر جوق. تۇندە ۇيىقتاۋ ءۇشىن 15 ايەل تۇرىپ، قالعاندارى مىزعىپ الاتىن ەدى. وسىلاي 2 ساعات سايىن ورىن الماستىرىپ تۇردىق»، دەپ مەحريگۇل تۇرسىن كوزىنە ەرىكسىز جاس الدى.

ولار كىشكەنە مولشەردە كۇرىش پەن سۋدان تۇراتىن تاڭعى اس ىشەتىن. سونىمەن بىرگە تاڭعى استىڭ الدىندا كوممۋنيستىك پارتيانى ۇلىقتايتىن ءان ايتۋ مىندەتتەلگەن.

«ولار بىزگە بەلگىسىز دارىلەر مەن اق سۇيىقتىقتى ىشۋگە ماجبۇرلەيتىن. الگى دارىلەردىڭ اسەرىنەن ءبىز ەسىمىزدى جوعالتىپ، تالىپ قالاتىن ەدىك. ال اق سۇيىقتىقتى ىشكەن كەيبىر ايەلدەردىڭ ايلىق بەلگىسى توقتاپ قالسا، ەندى بىرىنەن توقتاماي قان كەتەتىن.  ءتىپتى بىرنەشە ايەل ازاپقا شىداماي ءولىپ كەتتى.

بىردە مەنى ارنايى بولمەدەگى بيىك ورىندىققا وتىرعىزدى. قولدارىم مەن اياقتارىم ارنايى لەنتالارعا بايلانىپ تۇردى. كۇزەتشى مەنىڭ  باسىما دۋلىعا كيگىزدى. ولار دۋلىعانى ىسكە قوسقان كەزدە مەنىڭ بۇكىل دەنەم اۋىردى. ءتىپتى قان تامىرلارىما دەيىن اۋىرسىنۋدى سەزدى. بۇعان شىداي مۇمكىن ەمەس. ال كورگەن ازابىمدى سوزبەن ايتىپ جەتكىزە المايمىن. ماعان ويلارىنا كەلگەنىن ىستەدى. "ءوز كىناڭدى مويىندا"، - دەپ قورلاپ، قىسىم جاسادى. ماعان بىردە انام مەن بالامنىڭ ولگەنىن، ال اكەمنىڭ ءومىر بويى تۇرمەدە جاتاتىنىن، مەنىڭ كەسىرىمنەن وتباسىمنىڭ ويرانى شىققانىن ايتتى. سوڭعى رەت سوققىعا جىعىپ، ازاپتاعان كەزدە مەن ولارعا «مەنى ولتىرە سالىڭدارشى»، دەپ جالبارىندىم»، دەيدى مەحريكۇل تۇرسىن.