قازاقستاندا تۇرعىنداردى ەمحاناعا تىركەۋ ناۋقانى اياقتالدى. 15 قىركۇيەك پەن 15 قاراشا ارالىعىندا وتكەن كامپانيا بارىسىندا 300 مىڭعا جۋىق ادام مەديسينا ۇيىمىن ەركىن تاڭداۋ قۇقىعىن پايدالانعان.

«ناۋقان كەزىندە تۇركىستان وبلىسى مەن شىمكەنت قالاسى، الماتى قالاسى، قاراعاندى جانە الماتى وبلىستارىنىڭ، سونداي-اق استانا قالاسىنىڭ تۇرعىندارى بەلسەندىلىك تانىتقان. كامپانيا ناتيجەسى بۇل باستامانىڭ استانا، الماتى سىندى ءىرى قالالار ءۇشىن عانا ەمەس، ايماقتار ءۇشىن دە ماڭىزدىلىعىن كورسەتىپ بەردى»، - دەدى مەديسينالىق ساقتاندىرۋ قورىنىڭ باسقارۋشى ديرەكتورى زابيرا ورازالييەۆا.  

ناۋقانعا قاتىسقان قازاقستاندىقتاردىڭ باسىم بولىگى ەمحاناعا وزدەرى بارىپ تىركەلسە، 13،5 مىڭعا جۋىعى ونلاين قىزمەتتى تاڭداعان (egov.kz پورتالى ارقىلى).

الداعى ۋاقىتتا ەمحانانىڭ تىركەۋ بولىمدەرى ارقىلى تىركەلۋ توقتاتىلادى. بۇل شەشىم جۇيەلى پروبلەمالاردى جويىپ، قىزمەتىن اسىرا پايدالانۋ جانە فالسيفيكاسيا فاكتىلەرىنىڭ الدىن الۋ ماقساتىندا قابىلدانىپ وتىر.

«بۇعان ەشقانداي الاڭداۋدىڭ قاجەتى جوق. بىرىنشىدەن، تىركەلۋ ءۇشىن ەمحاناعا اياقتاي بارىپ ۇيرەنگەن ازاماتتار حالىققا قىزمەت كورسەتۋ ورتالىقتارىنىڭ قىزمەتىنە جۇگىنە الادى. اتالعان ورتالىقتاردا Connection Point بولىمشەلەرى بار، ولار egov پورتالىنا قوسىلعان. سول جەردە ارنايى كەڭەسشىلەر وتىرادى. ەكىنشىدەن، Egov.kz جۋىردا Telegram بوتىن ىسكە قوستى. سمارتفوننىڭ كومەگىمەن وسى بوت ارقىلى بىرەر مينۋتتا تىركەلۋگە بولادى. ۇشىنشىدەن، ءقازىر ءوزىڭىزدى عانا ەمەس، بالالاردى دا ونلاين رەجيمدە تىركەۋگە مۇمكىندىك تۋدى. جۇيە بارلىق مالىمەتتەردى قىسقا مەرزىم ىشىندە، اۆتوماتتى تۇردە شىعارىپ بەرەدى. بۇل پروسەستى بارىنشا جەڭىلدەتەدى ءارى ارتىق قۇجات تالاپ ەتىلمەيدى»، - دەدى ز. ورازالييەۆا.

مسق الماتى فيليالى ديرەكتورى تىلەۋحان ابىلدايەۆتىڭ ايتۋىنشا، تىركەۋگە ءوتىنىش بەرگەن وڭتۇستىك استانالىقتاردىڭ بەستەن ءبىرى egov پورتالى ارقىلى تىركەلگەن. بۇل جۇرتشىلىقتىڭ ەنگىزىلىپ وتىرعان جاڭا باستامالارعا دايىندىق دەڭگەيى جوعارى ەكەنىن كورسەتسە كەرەك.

بيىلعى تىركەۋ ناۋقانىنا 607 مەديسينا ۇيىمى قاتىستى. ونىڭ 82ء-سى – كامپانياعا تۇڭعىش رەت قاتىسىپ وتىرعاندار. اتالعان ەمحانالار كەلەر جىلى كەپىلدەندىرىلگەن تەگىن مەديسينالىق كومەك شەڭبەرىندە حالىققا قىزمەت كورسەتپەك.

جالپى، تىركەۋ ناۋقانى – ەمحانا اۋىستىرۋدىڭ جالعىز جولى ەمەس. قازاقستاندىقتاردىڭ جىلىنا ءبىر رەت ەمحانا اۋىستىرۋعا مۇمكىندىگى بار. سونىمەن قاتار، قونىس اۋدارعاندا، ەمحانا جابىلىپ قالسا نەمەسە مسق-مەن كەلىسىمشارتتى بۇزسا، جاقىن ماڭنان جاڭا ەمحانا سالىنسا، ەمحانا قىزمەتىنە قاتىستى شىعىنداردى جاباتىن ەرىكتى مەديسينالىق ساقتاندىرۋ كەلىسىمشارتىن بەكىتكەن جاعدايدا باسقا ەمحاناعا اۋىسۋعا بولادى. تىركەۋمەن اينالىساتىن ەمحانالاردىڭ تولىق ءتىزىمىن مەديسينالىق ساقتاندىرۋ قورىنىڭ fms.kz سايتىنان تابۋعا بولادى.