اقتوبەدە تاۋەلسىزدىك كۇنىنە وراي اققاعاز دوسجانوۆا اتىنداعى كونفەرەنس-حوللدا دەنساۋلىق ساقتاۋ سالاسىنىڭ قىزمەتكەرلەرى دارىپتەلدى. شارانىڭ رەسمي بولىگىن وبلىس اكىمىنىڭ ورىنباسارى مارات توقجانوۆ اشتى. جينالعانداردى وبلىس باسشىلىعى اتىنان قۇتتىقتاعان ول مەديسينا جۇرتشىلىعىنىڭ ءوڭىردىڭ دامۋىنا قوسقان ۇلەسىن اتاپ ءوتتى.

* تاۋەلسىزدىك جىلدارى ىشىندە اقتوبە وبلىسىنىڭ دەنساۋلىق ساقتاۋ سالاسى ۇلكەن جەتىستىككە قول جەتكىزدى. ەكى جىل بۇرىن قۇرىلعان مەديسينالىق كلاستەردىڭ ارقاسىندا بۇكىل باتىس قازاقستان تۇرعىندارىنا كۇردەلى جوعارى تەحنولوگيالىق ارالاسۋلار قول جەتىمدى بولدى. بالالاردىڭ جۇرەگىنە اشىق وتا جاساۋ، ورگانداردى اۋىستىرۋ، بۋىنداردى ەندوپروتەزدەۋ ءبىزدىڭ دارىگەرلەر ءۇشىن ۇيرەنشىكتى جۇمىسقا اينالدى. مەديسينالىق قىزمەتتەر كورسەتۋدە وڭتۇستىك كورەيا، يزرايل، اقش جانە رەسەي سياقتى الەمدىك كوشباسشىلارمەن تىعىز ىنتىماقتاستىق ورناتىلدى. بارلىق ورتالىقتار وزىق جابدىقپەن جابدىقتالعان. وبلىس اكىمى بەردىبەك ساپاربايەۆتىڭ تاپسىرماسىمەن اۋىلداعى جۇمىستار جولعا قويىلدى. وڭىردە ءبىر جىلدىڭ ىشىندە مجس اياسىندا 21 اۋىلدىق دارىگەرلىك امبۋلاتوريا سالىندى. سىزدەردىڭ ادام ومىرىنە اراشا بولۋداعى كۇندەلىكتى ەڭبەكتەرىڭىز ءۇشىن باس يەمىن،-دەدى م.توقجانوۆ.

سالتاناتتى شارا ماراپاتتاۋ راسىمىنە جالعاستى. اقتوبەلىك دارىگەرلەرگە بەرىلگەن ماراپاتتاردىڭ ىشىندە «دەنساۋلىق ساقتاۋ ءىسىنىڭ ۇزدىگى» جانە «دەنساۋلىق ساقتاۋ ىسىنە قوسقان ۇلەسى ءۇشىن» توسبەلگىلەرى، سونىمەن قاتار، «ەڭبەك ارداگەرى» مەدالى بار. ول ماراپتتارعا شيرەك عاسىردان استام ەڭبەك ءوتىلى بار 14 مەديسينا قىزمەتكەرى يە بولدى.

التى مامان دەنساۋلىق ساقتاۋ مينيسترلىگى مەن فارماسيەۆتيكا كوميتەتىنىڭ قۇرمەت گراموتالارىمەن ماراپاتتالدى. تاعى 11 دارىگەر دياگنوستيكاعا زاماناۋي تەحنولوگيالار ەنگىزگەنى جانە ناۋقاستاردى ەمدەگەنى ءۇشىن ق ر دەنساۋلىق ساقتاۋ مينيسترلىگى مەن اقتوبە وبلىسى اكىمىنىڭ العىس حاتتارىن يەلەندى. مەديسينا ساڭلاقتارىنىڭ ءبىرسىپىراسى «نۇر وتان» پارتياسىنىڭ وبلىستىق فيليالى مەن «سەنىم» مەديسينا قىزمەتكەرلەرى كاسىپوداعىنىڭ رەسپۋبليكالىق قوعامدىق بىرلەستىگى اتىنان ماراپاتتالدى.

كوپتەن كۇتكەن ءسات – پاتەر كىلتتەرىن تابىستاۋ شاراسى بولدى. ەندوكرينولوگ ءمولدىر توماروۆا، بالالار حيرۋرگى اسحات باتىروۆ پەن انەستەزيولوگ نۇرمۇحامبەت بيگييەۆ سىندى جاس ماماندار باسپانالى بولدى.

* ديپلومىمدى العان سوڭ ەڭبەك جولىمدى اقتوبە مەديسينالىق ورتالىعىندا تەراپيەۆت بولىپ باستادىم. سونىمەن قاتار، رەزيدەنتۋرادا تار شەڭبەرلى بىلىكتىلىك الدىم. ەندوكرينولوگيالىق بولىمدە جۇمىس ىستەپ جاتقانىما ەكى جىل بولدى. بىزدەرگە مۇندا ناۋقاستاردى ەمدەۋ ءۇشىن بارلىق جاعداي جاسالعان. پاتەر الام دەپ ويلاماپپىن دا. وبلىس باسشىلىعىنا مەرەكە قارساڭىندا جاساعان سىيى ءۇشىن راحمەت! تۋىستارىم مەن ارىپتەستەرىم تاڭەرتەڭنەن بەرى حابارلاسىپ، قۇتتىقتاپ جاتىر. بۇل مەنىڭ ومىرىمدەگى ەڭ تولقىنىستى كۇن بولدى، - دەدى ءمولدىر توماروۆا.

شارا مەرەكەلىك كونسەرتپەن اياقتالدى.