اقتوبەلىك جاس سۋرەتشىنىڭ تۋىندىلارى تالايدى تاڭقالدىردى. اۆتوردىڭ كارتينالارىن العاش كورگەندەر ناعىز كاسىبي ماماننىڭ قىلقالامىنان تۋعان دەپ ويلاپ قالۋى ابدەن مۇمكىن. الايدا، 24 جاستاعى ۆاسيليي موروزوۆتىڭ سۋرەتشىلىككە دەن قويعانىنا ءبىر جىلعا دا تولماعان. جاس جىگىت ون ساۋساعىنان ايرىلعانىنا قاراماستان، كانىگى سۋرەتشىلەرمەن يىق تىرەسە ەڭبەك ەتىپ، ۇلكەن جوبالاردىڭ باسى-قاسىندا ءجۇر. بۇل تۋرالى ەۋرازيا ءبىرىنشى ارناسى حابارلايدى.  

2016 جىلدىڭ قاڭتارى ءۆاسيلييدىڭ ءومىرىن تۇبەگەيلى وزگەرتتى. كوللەدجدى ءتامامداپ، ەلەكترو-مەحانيك بولىپ جۇمىس ىستەپ جۇرگەن جىگىت قايعىلى جاعدايعا ۇشىراپ، ەكى قولىن قاتتى ءۇسىپ قالعان. اقتوبە، كەيىن رەسەيدىڭ دارىگەرلەرى وتا جاساپ، 22 جاستاعى جالىنداپ تۇرعان جىگىتتىڭ قولىن كەسپەسكە امال جوق ەكەندىگىن ايتادى. پىشاققا تۇسكەننەن كەيىن ءبىراز قينالادى. سول كەزدە دارىگەرلەر قولدى قيمىلداتىپ، كوبىرەك جاتتىعۋ جاساۋعا كەڭەس بەرىپتى. ۆاسيليي دەرەۋ قولىنا قارىنداشتى العانىن ايتادى. 

«ءبىر جىل بويى اۋرۋحانا جاعالاپ ءجۇردىم. دارىگەرلەر قولىڭ جاقسى جۇمىس ىستەسىن دەسەڭ، جاتتىعۋ جاسا دەدى. بۇرىن-سوڭدى سۋرەت سالۋعا ءتىپتى ەبىم بولعان جوق. وسى جاعدايعا تاپ بولعاننان كەيىن، قارىنداش ۇستاپ كوردىم. بىرتە-بىرتە بەينەلەۋگە قىزىعۋشىلىعىم ارتتى. وسى ستۋدياعا بىلتىر قاڭتاردا كەلدىم. قارىنداشتى ۇستاۋدان باسقا تۇك بىلمەيتىنمىن. وسى جەردە اكريلمەن، ءتۇرلى-تۇستى بوياۋمەن جۇمىس ىستەۋدى ۇيرەتتى»، - دەيدى سۋرەتشى ۆاسيليي موروزوۆ.

ۆاسيليي ءبىر جىلدىڭ ىشىندە ابدەن توسەلگەن. قارىنداش، قىلقالاممەن گرافيكادان باستاپ، پورترەت، پەيزاج، كەز كەلگەن جانردا كارتينانى بەينەلەي الادى. ەڭ باستىسى  تاباندىلىق. ەگەر كاسىبىڭدى سۇيسەڭ، تالپىنساڭ، الىنبايتىن قامال جوق. جاس جىگىتتىڭ ومىرلىك ۇستانىمىن دوستارى دا قۇپتايدى. 

«ۆاسيليي  جاقسى سۋرەتشى. ءبىز ونى جوباعا شاقىردىق.ول سونداي مەيىرىمدى ادام.ءبىز ونىمەن تانىسقانىمىزعا، كەزدەسكەنىمىزگە قۋانىشتىمىز» - دەيدى ۆ.موروزوۆتىڭ دوسى، ارىپتەسى ايگەرىم ماعجانوۆا.

ارىپتەس دوسى ايگەرىمنىڭ ايتقان جوباسى  «ونەر سيتي». ياعني، ۆاسيليي موروزوۆ دوستارىمەن بىرگە الەۋمەتتىك جوبانى جۇزەگە اسىرىپ وتىر. ولار وزدەرىنىڭ ديزاينەرلىك شەبەرحاناسىندا جارىمجان بالالارعا ارنالعان ارنايى سەنسورلىق ويىنشىقتار ازىرلەيدى. بۇل بالانىڭ موتوريكاسىن دامىتۋعا كومەكتەسەدى ەكەن. ويىنشىقتاردى كەسكىندەۋ، ءپىشىنىن ويلاپ تابۋ ۆاسيلييگە جۇكتەلگەن. جاس جىگىت مۇنىمەن شەكتەلىپ قالماق ەمەس. الدا جەكە كورمەسىن وتكىزىپ، شىعارماشىلىعىن شىڭداۋدى جوسپارلاپ وتىر.