اقتوبەدە حالىقارالىق سىبايلاس جەمقورلىقپەن كۇرەس كۇنىنە ارنالعان سالتاناتتى شارا ءوتتى.

وعان ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اليك شپەكبايەۆ، وبلىس اكىمى بەردىبەك ساپاربايەۆ، ق ر پرەزيدەنتى جانىنداعى مەملەكەتتىك باسقارما اكادەمياسىنىڭ رەكتورى فاتيما جاقىپوۆا، مەملەكەتتىك، بانك مەكەمەلەرى مەن قوعامدىق قىزمەت كورسەتۋ قىزمەتكەرلەرىنىڭ سالالىق كاسىپوداق ءتوراعاسى مەربولات جاقىپوۆ، وبلىستىق مەملەكەتتىك جانە قۇقىققورعاۋ ورگاندارىنىڭ باسشىلارى، ارنايى باقىلاۋ توپتارىنىڭ مۇشەلەرى مەن قوعام وكىلدەرى قاتىستى.

- تاۋەلسىزدىك العان كۇننەن باستاپ مەملەكەت باسشىسى سىبايلاس جەمقورلىقتى تامىرىمەن جويۋدىڭ جوسپارلى ساياساتىن جۇرگىزىپ جاتىر. سوڭعى جىلدارى تۇرمىستىق سىبايلاس جەمقورلىقتى جويۋ ءۇشىن مەملەكەتتىك قىزمەتتەردىڭ دەنى ەلەكتروندى فورماتتا جۇرگىزىلۋدە. اقتوبەدە وسى ماقساتتا حالىققا قىزمەت كورسەتۋ ورتالىقتارى جۇمىس جاسايدى، كوشى-قون قىزمەتتەرى ورتالىعى مەن ءبىر جىلدان استام ۋاقىت بۇرىن ازاماتتار 600-دەن استام مەملەكەتتىك قىزمەت تۇرلەرىن الا الاتىن «حالىقتىق كەڭسە» اشىلدى. بيىلدان باستاپ «حالىقتىق كەڭسە» 350 مىڭنان اسا ادامعا قىزمەت كورسەتتى. ءبىزدىڭ باستى مىندەتىمىز – پرەزيدەنتتىڭ سىبايلاس جەمقورلىقتى تامىرىمەن جويۋ بويىنشا بارلىق تاپسىرماسىن ساپالى ورىنداۋ، سول ءۇشىن مەملەكەتتىك ورگاندار مەن ازاماتتىق قوعام بىرلەسە جۇمىس ىستەۋلەرى كەرەك. سونىمەن بىرگە، بالالاردى سىبايلاس جەمقورلىققا قارسى تاربيەلەۋگە ەرەكشە كوڭىل بولگەن ماڭىزدى،- دەدى وبلىس اكىمى بەردىبەك ساپاربايەۆ سالەمدەسۋ سوزىندە.

«سىبايلاس جەمقورلىقتى ءتۇپ تامىرىمەن جويۋ - پرەزيدەنتتىڭ نەگىزگى تاپسىرمالارىنىڭ ءبىرى. ەلباسى وسى جاعىمسىز قۇبىلىسقا «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى قازاقستان حالقىنا جولداۋىندا دا نازار اۋداردى. ءبىز سىبايلاس جەمقورلىققا قارسى كۇرەستە تۇرعىندار ءۇشىن ەلەكتروندى قىزمەتتەردىڭ اۋقىمىن كەڭەيتۋگە جانە قولجەتىمدىلىگىن ارتتىرۋعا دايىنبىز»، - دەدى وبلىس اكىمى.

اليك شپەكبايەۆ اقتوبە وبلىسى سىبايلاس جەمقورلىق دەڭگەيى ەڭ تومەن وڭىرلەردىڭ ۇشتىگىنە كىرەتىنىن اتاپ ءوتتى.

ءوز كەزەگىندە اليك شپەكبايەۆ اقتوبە وبلىسىنداعى انتيكوررۋپسيالىق جۇمىستىڭ ۇيىمداستىرىلۋ دەڭگەيىنە جوعارى باعاسىن بەردى.

- ءبىز وبلىس اكىمىمەن بىرگە «اقتوبە – ادالدىق الاڭى» جوبالىق كەڭسەسىنىڭ اشىلۋىنا قاتىسىپ، جارعىسىنا قول قويدىق. ونىڭ باستى ماقساتى – تۇرمىستىق سىبايلاس جەمقورلىقتى تۇبەگەيلى تامىرىمەن جويۋ. بۇل بولاشاعى زور جوبا جانە مەن ونى ساپالى جۇزەگە اسىرۋ ءۇشىن مەملەكەتتىك ورگاندارمەن قاتار، قوعام وكىلدەرى دە بەلسەندى تۇردە قاتىسادى دەپ سەنەمىن. جالپى، ەكى كۇندىك جۇمىس ساپارىمنىڭ قورىتىندىسىندا اقتوبە وبلىسىنداعى انتيكوررۋپسيالىق قىزمەت جۇيەلى جانە كەشەندى سيپاتقا يە دەپ ايتا الامىن. بۇعان بيىلعى جىلدىڭ 11 ايىنىڭ ناتيجەسى بويىنشا وبلىستاعى سىبايلاس جەمقورلىق دەڭگەيى ەلىمىز بويىنشا ەڭ تومەن ەكەندىگى دالەل، - دەدى اگەنتتىك باسشىسى. شارانىڭ جالعاسىندا ب.ساپاربايەۆ پەن ا.شپەكبايەۆ وبلىستاعى انتيكوررۋپسيالىق مادەنيەتتى قالىپتاستىرۋعا سۇبەلى ۇلەس قوسقان اقتوبەلىكتەردى العىس حاتتارمەن ماراپاتتادى.

سونداي-اق، «ادال جول» مارافون-ەستافەتاسى مەن جۋرناليستەر اراسىنداعى «ۇزدىك انتيكوررۋپسيالىق ماتەريال» وبلىستىق بايقاۋى قورىتىندىلاندى. ءتۇرلى اتالىمدار بويىنشا «قازاقپارات» حاا ءتىلشىسى سامال ەندىبايەۆا، «حابار-24» تەلەارناسىنىڭ ءتىلشىسى اقساۋلە بايمەنشينا، «اقتوبە» گازەتىنىڭ ءتىلشىسى ايرايلىم نۇربايەۆا، «Bnews» اقپاراتتىق سايتىنىڭ ءتىلشىسى بايان ساعىمبايەۆا جەڭىمپاز اتاندى. مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى دەپارتامەنتىنىڭ ۇزدىك قالالىق، اۋداندىق اكىم اپپپاراتىن انىقتايتىن باسقا بايقاۋىندا قوبدا، بايعانين جانە تەمىر اۋداندارى جۇلدەلى ورىندارعا يە بولدى.

جوبالىق كەڭسە وبلىس اكىمدىگى مەن مەملەكەتتىك قىزمەت ىستەرى جانە سىبايلاس جەمقورلىققا قارسى كۇرەس دەپارتامەنتى قىزمەتكەرلەرىنەن قۇرالعان. باستى ماقساتى - تۇرمىستىق سىبايلاس جەمقورلىقتى قىسقارتۋ، سىبايلاس جەمقورلىق قاتەرىن ازايتۋ، مەملەكەتتىك قىزمەت ساپاسى مەن حالىقتىڭ مەملەكەتتىك اپپاراتقا دەگەن سەنىمىن ارتتىرۋ.

ايتا كەتەيىك، كەڭسە ماماندارى ءبىرىنشى باسشىلاردىڭ دەربەس جاۋاپكەرشىلىكتەرىن كۇشەيتەتىن قۇجات ازىرلەگەن. وعان قالا مەن اۋدانداردىڭ اكىمدەرى، جەرگىلىكتى اتقارۋشى ورگاندار مەن ورتالىق مەملەكەتتىك ورگانداردىڭ اۋماقتىق بولىمشەلەرىنىڭ باسشىلارى سىندى 259 مەملەكەتتىك قىزمەتكەر قول قويعان.

جوبالىق كەڭسەنىڭ تاعى ءبىر جەتىستىگى - «ءبىر تەرەزە» قاعيداسىمەن ميگراسيالىق قىزمەتتەر كورسەتۋ بولىپ تابىلادى. بۇل بەلگىلى ءبىر قىزمەتتەردى كورسەتۋ مەرزىمىن بەس جۇمىس كۇنىنەن ەكى ساعاتقا دەيىن قىسقارتۋعا مۇمكىندىك بەردى.