اقتوبە وبلىسى سىبايلاس جەمقورلىق دەڭگەيى ەڭ تومەن وڭىرلەردىڭ ۇشتىگىنە كىرەدى.

اقتوبە وبلىسى سىبايلاس جەمقورلىق دەڭگەيى ەڭ تومەن وڭىرلەردىڭ ۇشتىگىنە كىرەدى. بۇل تۋرالى ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اليك شپەكبايەۆ وڭىرگە جۇمىس ساپارىمەن كەلگەن كەزىندە مالىمدەدى. اليك شپەكبايەۆتىڭ قاتىسۋىمەن وبلىس اكتيۆىنىڭ وتىرىسى ءوتتى. شارانى اشقان وبلىس اكىمى بەردىبەك ساپاربايەۆ سوڭعى جىلدارى ەلباسى نۇرسۇلتان نازاربايەۆتىڭ تاپسىرماسىمەن وڭىردەگى سىبايلاس جەمقورلىقپەن كۇرەس ايتارلىقتاي جانداندىرىلعانىن اتاپ ءوتتى.

- سىبايلاس جەمقورلىقتى ءتۇپ تامىرىمەن جويۋ – پرەزيدەنتتىڭ نەگىزگى تاپسىرمالارىنىڭ ءبىرى. ەلباسى وسى جاعىمسىز قۇبىلىسقا «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى قازاقستان حالقىنا جولداۋىندا دا نازار اۋداردى. ءبىز سىبايلاس جەمقورلىققا قارسى كۇرەستە تۇرعىندار ءۇشىن ەلەكتروندى قىزمەتتەردىڭ اۋقىمىن كەڭەيتۋگە جانە قولجەتىمدىلىگىن ارتتىرۋعا دايىنبىز، - دەدى وبلىس اكىمى.

ءوز كەزەگىندە اليك شپەكبايەۆ اقتوبە وبلىسى سىبايلاس جەمقورلىق دەڭگەيى ەڭ تومەن وڭىرلەردىڭ ۇشتىگىنە كىرەتىنىن اتاپ ءوتتى.

- ەلەكتروندى مەملەكەتتىك قىزمەتتەردى دامىتۋ تۇرمىستىق سىبايلىس جەمقورلىقتى تامىرىمەن جويۋعا ايتارلىقتاي اسەر ەتەدى. بىلتىر اقتوبە وبلىسىندا مەملەكەتتىك قىزمەتتەردىڭ نەبارى 22%-ى ەلەكتروندى فورماتتا كورسەتىلسە، بۇگىندە جەرگىلىكتى اتقارۋشى ورگاندار بۇل كورسەتكىشتى 82%-عا دەيىن، ياعني نەبارى ءبىر جىلدىڭ ىشىندە ءتورت ەسەگە كوتەردى. جاقىندا اقتوبەدەگى «حالىقتىق كەڭسەدە» بولدىم. بارلىق قىزمەتتى ءبىر جەرگە جيناعان، ازاماتتار ەشقايدا شىقپاي-اق، بارلىق قىجەتتى ءبىر ورىندا الا الادى. ءسىزدىڭ وبلىستاعى ەلەكتروندى مەملەكەتتىك قىزمەتتەردى دامىتۋعا جاۋاپتى ادامدار قۇرمەت پەن ماقتاۋعا لايىق،- دەدى اليك شپەكبايەۆ.

جالپى، اگەنتتىك ءتوراعاسىنىڭ ايتۋىنشا، ەلەكتروندىق ۇكىمەتتى دامىتۋ رەيتينگىندە بۇۇ دەڭگەيى جوعارى قىرىق ەلدىڭ قاتارىنا ەنگەن. رەيتينگكە بارلىعى 193 مەملەكەت كىردى. ول سونداي-اق، اقتوبەدەگى بىرنەشە الەۋمەتتىك جانە وندىرىستىك نىسانداردى ارالاعاننان العان اسەرىمەن ءبولىستى.

- سوڭعى ءۇش جىلدىڭ ىشىندە اقتوبەدە تالدىقورعانداي شاعىن وبلىس ورتالىعى سالىندى دەۋگە بولادى. وسىنىڭ ءوزى كوپ نارسەنى ايتادى. كەيبىرەۋلەر بايقاماۋى دا مۇمكىن، ءبىراق مەن سالىنعان الەۋمەتتىك نىسانداردى كورىپ سانىنان جاڭىلدىم،-دەدى اليك شپەكبايەۆ.

وبلىس اكتيۆىنىڭ كەزدەسۋى بەردىبەك ساپاربايەۆ پەن اليك شپەكبايەۆتىڭ "استانا - ادالدىق الاڭى" جوباسىنىڭ بالاماسى - «اقتوبە – ادالدىق الاڭى» جوبالىق كەڭسەسىنىڭ جارعىسىنا قول قويۋىمەن اياقتالدى.

جوبالىق كەڭسە وبلىس اكىمدىگى مەن مەملەكەتتىك قىزمەت ىستەرى جانە سىبايلاس جەمقورلىققا قارسى كۇرەس دەپارتامەنتى قىزمەتكەرلەرىنەن قۇرالعان. باستى ماقساتى – تۇرمىستىق سىبايلاس جەمقورلىقتى قىسقارتۋ، سىبايلاس جەمقورلىق قاتەرىن ازايتۋ، مەملەكەتتىك قىزمەت ساپاسى مەن حالىقتىڭ مەملەكەتتىك اپپاراتقا دەگەن سەنىمىن ارتتىرۋ.

«ءۇش جىلدىڭ ىشىندە كوپ وزگەرىس بولعان. «استانادا سوڭعى 5 جىلدا ءبىر پاۆلودار سالىندى» دەپ ايتادى. اقتوبەدە ءۇش جىلدىڭ ىشىندە كىشى وبلىس ورتالىعى سالىندى. «نۇر اقتوبە»، «باتىس»، «باتىس — 2» شاعىن اۋداندارىن قوسقاندا 130 مىڭنان استام تۇرعىن بار ەكەن. جەكەمەنشىك ۇيلەردىڭ قۇرىلىسى دا كوپ. قۇرىلىس سانىنە قاراپ، جەرگىلىكتى تۇرعىنداردىڭ جاعدايى جوعارى دەپ ايتۋعا بولادى»، — دەدى اليك شپەكبايەۆ.

ايتا كەتەيىك، كەڭسە ماماندارى ءبىرىنشى باسشىلاردىڭ دەربەس جاۋاپكەرشىلىكتەرىن كۇشەيتەتىن قۇجات ازىرلەگەن. وعان قالا مەن اۋدانداردىڭ اكىمدەرى، جەرگىلىكتى اتقارۋشى ورگاندار مەن ورتالىق مەملەكەتتىك ورگانداردىڭ اۋماقتىق بولىمشەلەرىنىڭ باسشىلارى سىندى 259 مەملەكەتتىك قىزمەتكەر قول قويعان. جوبالىق كەڭسەنىڭ تاعى ءبىر جەتىستىگى – «ءبىر تەرەزە» قاعيداسىمەن ميگراسيالىق قىزمەتتەر كورسەتۋ بولىپ تابىلادى. بۇل بەلگىلى ءبىر قىزمەتتەردى كورسەتۋ مەرزىمىن بەس جۇمىس كۇنىنەن ەكى ساعاتقا دەيىن قىسقارتۋعا مۇمكىندىك بەردى.