بۇگىن قازاقستان رەسپۋبليكاسى پارلامەنتى ءماجىلىسىنىڭ دەپۋتاتى ءا.ە. بەكتۇرعانوۆتىڭ توراعالىعىمەن «نۇر وتان» پارتياسى سايلاۋالدى باعدارلاماسىنىڭ «ءبىلىم بەرۋ» باعىتى بويىنشا پارتيالىق كۋراتور كوميسسياسىنىڭ وتىرىسى ءوتتى.

كۇن تارتىبىندە «پەداگوگ مارتەبەسى تۋرالى» جانە «وقۋشى مەن مۇعالىمگە وقۋ جۇكتەمەسىن تومەندەتۋ ماسەلەلەرى بويىنشا»  ق ر زاڭدارىنىڭ جوبالارى تالقىلاندى.

ەلباسى ن.ءا. نازاربايەۆ 2018 جىلدىڭ 5 قازانىندا «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا  كەلەسى جىلى مۇعالىمدەر مەن مەكتەپكە دەيىنگى مەكەمەلەر قىزمەتكەرلەرى ءۇشىن بارلىق يگىلىكتى قاراستىرىپ، جۇكتەمەنى ازايتۋعا، ءجونسىز تەكسەرىستەر مەن مىندەتتەن  تىس فۋنكسيالاردان اراشالاۋعا باعىتتالعان «پەداگوگ مارتەبەسى تۋرالى» زاڭدى ازىرلەپ، قابىلداۋ تۋرالى تاپسىرما بەرگەن بولاتىن. سودان بەرى بۇل ماسەلە حالىق اراسىندا قىزۋ تالقىلانىپ جاتىر.  

ەلىمىزدە وقۋشىلاردىڭ وقۋ جۇكتەمەسى ماسەلەسى ەڭ وزەكتى ماسەلەلەردىڭ ءبىرى بولىپ تۇرعانى جاسىرىن ەمەس. پرەزيدەنت اتاپ وتكەندەي، قازاقستانداعى وقۋشىلاردىڭ وقۋ جۇكتەمەسى تمد ەلدەرىنىڭ ىشىندە ەڭ جوعارى، ەىدۇ (وەسر) مەملەكەتتەرىنەن 30 پايىزدان استام جوعارى ەكەن.

ال، مۇعالىمدەرگە ءوز مىندەتتەرىنەن باسقا دا فۋنكسيالاردى جۇكتەۋ ماسەلەسى ءتىپتى وزەكتى بولىپ كەلەدى. اتالعان زاڭ جوبالارى قوعامدا كەڭ تالقىلانىپ، وسى ماسەلەلەردى شەشۋگە، بارلىق مۇددەلى تاراپتاردىڭ قۇقىقتارىن قورعاۋعا باعىتتالۋى ءتيىس.

وتىرىسقا جينالعاندار پرەزيدەنتتىڭ جولداۋدا بەرگەن تاپسىرمالارىنا سايكەس، الداعى 5 جىل ىشىندە ءبىلىم بەرۋ، عىلىم جانە دەنساۋلىق ساقتاۋ سالاسىنا شىعىنداردى جالپى ىشكى ءونىمنىڭ 10 پايىزىنا دەيىن جەتكىزۋ جوسپارلانعانىن، سونىمەن قاتار، مەكتەپكە دەيىنگى ءبىلىم بەرۋ ساپاسىن جاقسارتۋ، بىلىكتىلىك تالاپتارىن، وقىتۋ ءادىسىن، تاربيەشىلەردىڭ جانە بالاباقشاداعى باسقا دا قىزمەتكەرلەردىڭ ەڭبەگىنە اقى تولەۋ جۇيەسىن قايتا قاراۋ قاجەت ەكەندىگىن اتاپ ايتتى.

- بۇل ۇستازداردىڭ كوپتەن كۇتكەن جوباسى. اقپان ايىنا دەيىن بۇل جوبانى تالقىلاۋعا كوپ ۋاقىتىمىز بار. «كەلىسىپ پىشكەن تون كەلتە بولماس» دەگەن ءسوز بار قازاقتا، سوندىقتان، ءار نارسەنى كەلىسە وتىرىپ ءتۇيىنىن شىعارامىز دەپ ويلايمىن. اتالمىش زاڭ جوباسى الەۋمەتتىك جەلىلەردە دە كەڭىنەن تالقىلانىپ جاتىر ەكەن. بۇل حالىقتىڭ بەي-جاي ەمەستىگىن تانىتادى، قۋانارلىق جاعداي. جەرگىلىكتى اتقارۋشى ورگان مۇعالىمدەرگە پرەميانى جانە اۋىلدىق جەردە جۇمىس ىستەگەنى ءۇشىن وتىن الۋعا قاراجاتتىڭ سوماسىن بەلگىلەيدى دەگەنگە كەلىسكىسى كەلمەيتىندەر بار. جەرگىلىكتى جەرلەردەگى اكىم ءوزىنىڭ ۇستازى مەن دارىگەرىنە جانى اشىماسا نەعىپ وتىر؟ وسى ماسەلەنى اكىمدەر دە دۇرىستاپ قاراۋ كەرەك،- دەدى پارلامەنت ءماجىلىسىنىڭ دەپۋتاتى باقىتگۇل حامەنوۆا

كەزدەسۋ بارىسىندا وزەكتى ماسەلەلەردى ساپالى تالقىلاۋ ءۇشىن ق ر ءبىلىم جانە عىلىم ۆيسە-مينيسترى ە.ا. سۋحانبەردييەۆا زاڭ جوبالارىن ازىرلەۋ بويىنشا جۇرگىزىلىپ جاتقان جۇمىستار تۋرالى بايانداما جاساپ، ق ر پارلامەنت ءماجىلىسىنىڭ دەپۋتاتتارى ج.ن. نۇرمانبەتوۆا، ن.ۆ. جۇمادىلدايەۆالار اتالعان زاڭ جوبالارىنا قاتىستى ءوز ۇسىنىستارى تۋرالى بايانداما جاسادى. ۆيدەوكونفەرەنس بايلانىس ارقىلى ەلىمىزدىڭ بارلىق ايماقتارى قاتىسقان وتىرىس قورىتىندىسى بويىنشا كوميسسيا مۇشەلەرى ۋاكىلەتتى مەملەكەتتىك ورگاندارعا جىبەرىلەتىن ۇسىنىستار ازىرلەدى.