جۋرناليست، شىعىستانۋشى عالىم بوقاش وتباسىلىق جاعدايى ءارى قىزمەت بابىنا بايلانىستى اقش-قا قونىس اۋداردى. بۇل تۋرالى عالىم ءوزىنىڭ Facebook-تەگى پاراقشاسىندا جاريالادى. جازباسى تومەندەگىدەي:
"ءقادىرلى Facebook-تاعى اعايىن، دوس-جار، كوز تانىس ءھام ءسوز تانىس ءجاميعات!
بالا كەزىمنەن ءجيى ەستيتىن "ادامنىڭ باسى - اللانىڭ دوبى" دەيتىن ماقالدىڭ ماعىناسىن سوڭعى جيىرما شاقتى جىل ىشىندە ابدەن ۇققانداي بولدىم. سوۆەت وداعىنىڭ قازاق ءسسر-ىنىڭ سەمەي وبلىسىنا ارعى بەتتەن كوشىپ كەلگەن ەكى ۇلكەن اۋلەتتىڭ ورتاسىنان شىققان، سول زاماننىڭ وزىندە ورىس ءتىلىن ەنگىزۋ ساياساتى سىڭبەي، ءىس جۇرگىزۋ قازاقشا بولعان ءداستۇرلى اۋىلدا وسكەن قارابۇلاقتىڭ قارا دومالاق بالاسى ەدىم. بەس جاسىمنان قازاقشا ءارىپ تانىپ الىپ، باس الماي كىتاپ وقىدىم. باتىرلار جىرىنان باستاپ، قازاق-سوۆەت كلاسسيكتەرىنە ءبىر-اق ءتۇستىم. الاكولدە قۇلاشتاپ جۇزگەندەي اسەرگە بولەندىم. جەتى جاسىمنان ورىسشا ۇيرەنىپ، اق-قارا ءتۇستى تەليەۆيزورىمىزدى كورۋگە كەلگەن كورشى-قولاڭ ءۇشىن تارجىمەشىگە اينالدىم ءھام "كۇمىس عاسىردىڭ" عاجايىپتارىن، باتىس ادەبيەتىنىڭ ورىس تىلىنە اۋدارىلعان كەيبىر جاۋھارلارىن تاني باستادىم. كاسپييگە قايىقپەن شىققانداي بولدىم. قازاقستان تاۋەلسىزدىك الىپ، كەۋدەمىز كەڭىپ، جولىمىز ۇزارىپ، ارمانداعان الماتىما جەتىپ، قيالىمداعى ءقازۇۋ-دىڭ شىعىستانۋىنا ءتۇسىپ، ۋردۋ مەن حينديگە دەن قويعاندا پارسى مەن بەنگال شىعاناعى ءھام اراب تەڭىزىن اينالىپ شىققانداي تاڭ-تاماشا قالدىم. كەيىن ۇلىبريتانياعا ساپار شەگىپ، الەمنىڭ ۇزدىك ۋنيۆەرسيتەتى وكسفوردتا وقىعانىمدا، اكادەميالىق بوستاندىق پرينسيپتەرىمەن جازىلعان زەرتتەۋلەردى، شىعارماشىلىق ەركىندىك رۋحىندا جازىلعان كوركەم تۋىندىلاردى كۇنى-تۇنى پاراقتاعاندا تەلەگەي تەڭىز، شەكسىز مۇحيتقا كەمەمەن شىققانداي كۇي كەشتىم.
وقىعان-توقىعانىمدى قازاقستاندا قىزمەتتە جۇرگەنىمدە كوپتىڭ پايداسىنا جاراتۋعا تىرىستىم. سوڭعى سەگىز جىل، سەگىز اي پراگاداعى حالىقارالىق مەديا كومپانيادا ارىپتەستەرىمە تاجىريبەم مەن ءبىلىمىمدى ۇسىنىپ، ءوزىم دە جاڭادان كوپ دۇنيە ۇيرەنىپ، ەلدە ءسوز بوستاندىعىن ءھام مۋلتيمەديا جۋرناليستيكا ۇلگىلەرىن ناسيحاتتاۋ ءۇشىن ءبىراز كۇش سالدىم. ەندى وتباسىمنىڭ جاعدايى، بولاشاق زەرتتەۋ جۇمىسى مەن قىزمەت ىڭعايىنا وراي اقش-قا قونىس اۋدارىپ بارا جاتىرمىن. بۇرىلىپ سوڭىما كوز سالسام، باعىپ-قاققان اكە-شەشەمنىڭ، قۇلدىراڭداپ قاسىمدا وسكەن قارىنداسىمنىڭ، ءتاڭىر تاعالا ۇزەڭگى جولداس قىلعان نەبىر جاقسى مەن جايساڭنىڭ ءجۇزىن كورەم، دەمەۋىن سەزەم، دۇعا-تىلەگىن ەستيمىن. دۇنيەدەن وزعاندارىن دۇعامنان قالدىرمايمىن. سوڭعى بىرنەشە اپتا بويى قيماي قوشتاسىپ، جۇرەكجاردى سوزدەرىن ايتىپ جاتقان استانا، الماتى مەن پراگاداعى ارىپتەستەرىمە العىسىم زور، قۇرمەتىم ەرەكشە. جاقسىلىققا ءھام جارىققا ۇمتىلۋىما سەبەپ بولعان وسىنداي ءبىر تۋماسا دا، جانى تۋىس بولىپ كەتكەن جاقسى ءھام جارىق جاندار ەكەنىن بىلەم، ۇمىتپايمىن، ءقادىر تۇتام، شەكسىز سۇيەم. قۇداي قوسقان جارىمنىڭ كوڭىلىن ءبۇتىن ەتىپ، قوس قىزىمنىڭ ءبىلىمىن ۇشتاپ، دەنساۋلىعىن ساقايتۋ ءۇشىن وسىنداي شەشىم قىلۋعا تۋرا كەلدى. قايدا جۇرسەم دە، قازاق تىلىندەگى اقپارات پەن مادەني كەڭىستىكتىڭ اجىراماس بولشەگى بولىپ قالا بەرەتىنىم، سول كەڭىستىكتى دامىتۋعا جانە كەڭەيتۋگە ۇلەس قوسا بەرەتىنىم انىق. الداعى اپتادان باستاپ الەۋمەتتىك جەلىلەرگە كىرۋىم سيرەپ كەتەدى. سول سەبەپتى حات-حابار ءۇشىن galym.bokash@gmail.com دەگەن جەكە پوشتام بار ەكەنىن ەسكەرتەم.
جاڭا جىلدارىڭىز قۇتتى، باقتى-بەرەكەلى بولسىن!
بارشاڭىزعا دەگەن ىزگى تىلەكپەن،
عالىم بوقاش"
ايتا كەتەيىك، 2017 جىلى Qamshy.kz اقپارات اگەنتتىگىنىڭ ۇيىمداستىرۋىمەن وتكەن الاشتىڭ 100 جىلدىق تويىندا الاش ارىستارىنىڭ ءىزباسارلارى ارنايى مەدالمەن ماراپاتتالعان ەدى. حالىقتىڭ ينتەرنەتتە داۋىس بەرۋى ارقىلى جۇزدىككە كىرگەن تۇلعالاردىڭ ءبىرى - عالىم بوقاش.
قازاق ءۇشىن ەڭبەك ەتكەن ءور تۇلعاعا Qamshy.kz اقپارات اگەنتتىگىنىڭ ۇجىمى "ءسات ساپار" تىلەيدى!
