الماتىدا دەنيس تەننىڭ ۇرىلارمەن جاعا جىرتىسىپ جاتقانىن كورگەن پوليسەيلەر جاۋاپقا تارتىلۋى مۇمكىن. بۇل تۋرالى الدىن الا سوت تىڭدالىمى بارىسىندا جابىرلەنۋشى تاراپتىڭ قورعاۋشىسى نۇرلان وستەمىروۆ ايتتى، دەپ حابارلايدى Qamshy.kz اقپارات اگەنتتىگى قازاقپاراتتىڭ مالىمەتىنە سۇيەنە وتىرىپ.

«ۆيدەوسى بار. كۋاگەرلەر ءتۇسىپ قالعان. ەكى پوليسيا قىزمەتكەرى ءجۇر. ولار نە ىستەپ ءجۇر وندا؟ ءقازىر ولارعا قاتىستى ۇلتتىق بيۋرو قىلمىستىق ءىس قوزعاپ جاتىر. ءبىراق ولار ازىرگە شارا قابىلداماعانى ءۇشىن تارتىلىپ جاتىر. تاپسىرىس بەرۋشىلەر بولۋى ىقتيمال. قياسوۆ دەنيستىڭ ءولىمىن ءوز موينىنا الىپ وتىر. ۆيدەودا كورىنگەندەي، ول ارتقى جاعىنان كەلگەن. ال ارتقى جاعىنداعى ادام قالايشا ادامنىڭ الدىنا كەلىپ، سانىنىڭ ىشكى جاعىنان پىشاقتىڭ ءجۇزىن جوعارى قاراتا تىلەدى. تۋرا حاس شەبەر سياقتى. تامىرىن ءتىلۋ ءۇشىن ىستەلگەن دەپ ويلايمىز. سوندىقتان، ىستە باسقا دا كۇدىكتىلەر بولۋى مۇمكىن ەكەنىن جوققا شىعارمايمىز»، - دەدى قورعاۋشى وستەمىروۆ.

مۇنىڭ الدىندا سوتتالۋشىلاردىڭ جەكە باسى تۋرالى مالىمەت بەلگىلى بولدى. سوتتالۋشى جانار تولىبايەۆا ءوزىنىڭ جۇكتىلىكتىڭ 6،5 ايلىعىندا ەكەنىن مالىمدەگەن بولاتىن. كەلەسى سوت وتىرىسى 3 قاڭتارعا تاڭەرتەڭگى 10-عا بەلگىلەندى.

ەسكە سالساق، دەنيس تەندى بيىل 19 شىلدەدە الماتى قالاسىندا بەلگىسىز بىرەۋلەر پىشاقتاپ كەتكەن ەدى. اۋىر حالدە اۋرۋحاناعا جەتكىزىلگەن سپورتشى كوز جۇمعان بولاتىن.

دەنيس تەننىڭ ولىمىنە قاتىستى قىلمىستىق ءىسقوزعالىپ، كۇدىكتىلەر ىزدەستىرىلدى.

ەلباسى دەنيس تەنگە قاتىستى قىلمىستى مۇقيات تەكسەرۋدى تاپسىردى. كەيىن ق ر ءىىم كۇدىكتىلەردىڭ ۇستالعانىن جاريا ەتتى.

ال، قىركۇيەك ايىنىڭ سوڭىندا ىشكى ىستەر ءمينيسترى قالمۇحانبەت قاسىموۆ اتالمىش قىلمىستىق ءىستىڭ تەرگەلۋىنە قاتىستى مالىمەت بەرگەن بولاتىن.

كەشە الماتى قىلمىستىق ىستەر بويىنشا اۋدانارالىق مامانداندىرىلعان سوتتا بەلگىلى سپورتشىنىڭ ءولىمى بويىنشا الدىن الا سوت تىڭدالىمى ءوتتى.