قازاقستاندىق ارالاس جەكپە-جەك شەبەرى بەيبىت نازاروۆ جەڭىل سالماقتا Titan FC ۋاقىتشا چەمپيوندىق بەلبەۋى ءۇشىن وتكەن جەكپە-جەكتە جەڭىلىپ قالدى. الماتىدا وتكەن ءتۋرنيردىڭ باستى جەكپە-جەگىندە وتانداسىمىز امەريكالىق مارتين براۋنعا ەسە جىبەردى. وسى جايتقا بايلانىستا ارداق نازاروۆتىڭ ينستاگرام پاراقشاسىندا "بىتكەن ىسكە - سىنشى كوپ...بارىنەن باۋىر قىمبات" دەگەن جازباسى حالىق تاراپىنان قىزۋ تالقىعا ۇشىراپ، ارتى داۋ-دامايعا ۇلاستى. ارداق نازاروۆتىڭ ازاماتتىعىنا ءشۇبا كەلتىرمەيتىندىگىمىزدى ەرەكشە اتاپ وتكىمىز كەلەدى. الايدا "قامشى" ەركىن وي-پىكىر الاڭى ەكەندىگىن ەسكەرە وتىرىپ، ارداق نازاروۆتىڭ اشىنعان جازباسىمەن قاتار ارىپتەسىمىز بەرىكبول تولەگەننىڭ قارا قىلدى قاق جارعان پىكىرىن دە وقىرمان نازارىنا سول قالپىندا ۇسىنۋدى ءجون سانادىق. "سپورت دەگەن - ادىلدىك" ۇعىمىن جالاۋ ەتىپ، "باس كەسپەك بولسا دا، ءتىل كەسپەك" جوق ەكەندىگىن ەكى تاراپ تا تۇسىنسە دەگەن نيەتتەمىز. قازاق جىگىتتەرىنىڭ نامىستى قولدان بەرمەي، جەڭىس تۇعىرىنان كورىنۋىنە تىلەكتەسپىز.
ارداق نازاروۆ:
"بىتكەن ىسكە سىنشى كوپ... بارىنەن باۋىر قىمبات!
كەشەگى مەنىڭ باسىمداعى جاعداي تاۋعا تۇسسە، تاۋ ۇگىلىپ، تەمىرگە تۇسسە، تەمىر بالقىپ كەتەر ەدى.
وسى كۇنگە جەتۋ ءۇشىن قانشاما قيىندىقتان وتتىك. قانداي قيىندىق دەسەڭىزشى، بۇل ۇزاق اڭگىمە...
جارىسقا شىققان باۋىرلارىمنىڭ اتا-انالارىنا شىن جۇرەكتەن العىسىمدى ايتامىن. سىزدەر ناعىز باتىر ۇلداردى تاربيەلەپ وسىرگەنسىزدەر. اللا قالاسا، اسىل ۇلدارىڭىز قازاق ەلىنە ءالى تالاي جەڭىس سىيلايتىن بولادى. ءومىر بولعان سوڭ ىستىق سۋىعى قاتار جۇرەدى. "ەر جىگىتتىڭ موينىندا قىل ارقان شىرىمەيدى"-دەيدى دانا بابالارىمىز...
ءبىز ەكى جىل ناتيجەلى جۇمىس جاساپ، امەريكالىق پروموۋشندى قازاقستانعا الىپ كەلۋىمىزدىڭ ءوزى ۇلكەن جەڭىس. مۇنداعى ماقساتىمىز – جىگىتتەردىڭ دەڭگەيىن الەمدىك شىڭعا كوتەرۋ. ەل ۇيرەنگەندەي قارسىلاستاردى تاڭداپ الىپ كەلىپ، بارلىعىن ساباپ جىبەرگەننەن سپورتشىلارىمىز وسپەيدى. وسىنداي جارىستار ارقىلى جىگىتتەرىمىز وسەدى. ءبىز جاڭا بەلەسكە شىقتىق. ءادىل جارىس بولدى. مىقتىنىڭ باعى جاندى. ۇلكەن تاجىريبە الدىق. كەمشىلىگىمىزدى، قاتەلىكتەرىمىزدى كورە بىلدىك. بارىنەن قىمبات نارسە – ول باۋىرمالدىق. باۋىر جاقسىلىعىن اسىرادى، كەمشىلىگىن جاسىرادى. مەن قاسىمداعى باۋىرلارىمدى ەشقاشان تاستامايمىن. ولارعا تيگەن ءاربىر سوققى مەنىڭ جۇرەگىمە تيەدى...
باۋىرلارىم!
مىڭ تەڭگەگە بيلەت الىپ، جانكۇيەر بولۋعا شاماسى جەتپەي، جەڭسەڭ، كورە المايتىن "وي، ءالسىزدى ادەيى اكەلدى"، "ويباي، ساتىپ الىپتى جەڭىستى"، جەڭىلسەڭ، جەردەن الىپ جەرگە سالاتىندارعا مويىماڭدار!!!
ءبىزدىڭ ماقساتىمىز ۇلكەن. "يت ۇرەدى، كوش جۇرەدى".
تىلەكشى بولعان كۇللى قازاق ەلىنە اللا رازى بولسىن.
بۇل تۇسىنگەن ادامعا ۇلكەن بەلەس، جەڭىس بولسا دا، باسقا بولسا دا، اللاعا ماقتاۋ ايتامىز.
اللاعا شۇكىرشىلىك... حالقىما ريزامىن".
بەرىكبول تولەگەن:
"ايتپاسا ءسوزدىڭ اتاسى ولەدى. "الەمفايتەرس" جىگىتتەرى الماتى ارەنادا جەكپە-جەك وتكىزدى. ءتۋرنيردىڭ باستى جەكپە-جەگىنە شىققان بەيبىت نازاروۆ جەڭىلىپ قالدى. ارداق نازاروۆ ءوزىنىڭ ينستا پاراقشاسىندا مۇنداي تۋرنيرلەردى وتكىزۋدىڭ ءوزى جەتىستىك ەكەندىگىن جازىپ، تۇسىندىرگىسى كەلدى. پوستىنا ءوز پىكىرىمدى جازىپ، ۇسىنىسىمدى ايتقانمىن. ول كىسى سوزگە كەلمەي بۇعاتتاپ تاستاۋدى ءجون كورىپتى. سول پىكىردى سىزدەردىڭ نازارلارىڭىزعا ۇسىنىپ وتىرمىن. سونىمەن مەن نە جازدىم؟
"جىگىتتەر، باۋىر مەن رۋدىڭ نامىسىنان قازاقتىڭ نامىسى بيىك بولۋى كەرەك ەدى. جەكپە-جەك پەن استىنداعى پىكىرلەردى تولىق وقىپ شىقتىم. حالىقتىڭ 90 پايىزى رەنجۋلى. "حالىق ايتسا، قالت ايتپايدى" دەيدى. حالىقتىڭ سىن-پىكىرىن "كورە الماۋشىلىق" دەپ قابىلداۋدى قويۋ كەرەك. ودان كەيىن كىشىگىرىم ءبىر ءتۋرنيردى جەڭىپ، "الەم چەمپيونىمىز" دەپ ايتۋدى قاشان قوياسىزدار؟ راديودا جۇرگەنىمدە بەيبىتپەن سۇحباتتاسقان ەدىم. ەشنارسەنى اشىپ ايتپايدى. ءيا، ينتەرنەتتەن شىقپايتىن، ءيا، رەسمي سايتى جوق ءتۋرنيردى ۇتىپ، چەمپيون بولدىق دەگەن سوڭ جۋرناليستەر دە جازا سالادى. دەرەككوز وزدەرى عانا. سونىمەن، سىزدەر الەم چەمپيونىسىزدار ما، الدە كىشىگىرىم تۇجىرىم چەمپيونىسىزدار ما؟ بۇل ءتۋرنيردى جەڭگەن قازاققا UFC-گە جول اشىلار ما ەدى؟ بەيبىت وتە دارمەنسىز بولدى. بىتكەننەن كەيىن قولىن كوتەرۋى دە ۇيات. 2013-تەگىدەي استىنا جىعىپ بەرەدى دەپ ويلادى ما ەكەن؟ نەگە مىقتى قازاقتاردى باستى كەزدەسۋگە شىعارمادىڭىزدار؟ ءبىز باۋىرلارىمىزدى وتىرىك ماقتاعانىمىزبەن، جەتىستىگىنە شىن قۋانا المايمىز. "UFC-گە شىققان تۇڭعىش قازاق" دەگەن اتاق ءۇشىن قانشاما ادامنىڭ جولى كەسىلدى. قايتا، شۇكىر، شەتەل قازاعى بۇل اتاقتى يەلەنىپ قويدى. قاشانعى مىڭ كلۋب اشىپ، بىر-بىرلەرىڭىزدىڭ جالدارىڭىزعا جارماسا بەرەسىزدەر؟ سىزدەردى ازامات رەتىندە جانە ۇلگىلى وتباسى رەتىندە قاتتى سىيلايمىن. ءبىراق سىزدەر كاسىبي مىقتى سپورتشى ەمەسسىزدەر. سپورتشىنىڭ مىندەتى سپورتتا جەتىستىككە جەتۋ، قازاقتىڭ جاۋىنگەرلىك رۋحىن تانىتۋ. شىن پاتريوت بولساڭىزدار، پەندەشىلىكتەن ەلدىڭ نامىسىن بيىك قويىڭىزدار. سوزبەن ەمەس، ىسپەن".
وسى ءسوز ارداق نازاروۆقا جاقپادى. نازاروۆتارعا دەگەن سىي-قۇرمەتىم ەرەكشە ەدى. "ادامنىڭ كوڭىلى ءبىر اتىم ناسىبايدان قالادى" دەۋشى مە ەدى. بۇل جىگىتتەردىڭ وسى ىس-ارەكەتى، ودان قالدى UFC-گە شاقىردى دەگەن شىندىققا جاناسپايتىن اقپاراتپەن حالىقتى الداعىسى كەلەتىندىگى مەنىڭ ولارعا دەگەن قۇرمەتىمدى جوعالتىپ جىبەردى. "پلاتون مەنىڭ دوسىم، ءبىراق شىندىق ودان قىمبات". مەنىڭ ايتپاعىم – وسى. ارداق باۋىرىمىزدىڭ ەلدىڭ الدىندا جۇرگەن بەدەلىنە جاعىنىپ قولپاشتاپ قويۋعا دا بولار ەدى. ودان ءبىز وسەمىز بە؟! ءقازىر شوۋ-بيزنەستە دە، سپورتتا دا كەمشىلىگىن ايتساڭ كورە الماعانىڭ. ءيا، راس، مەن تەك ءسوزى مەن ءىسى الشاق كەتپەيتىن "دوستوينىي" جىگىتتەردى كورگىم كەلەدى. سولارعا جانكۇيەرمىن!".
