سونىمەن بولعانىنا ون كۇن بولعان استاناداعى ايتىستىڭ داقپىرتى ءالى تولاستار ەمەس. ايتىستان كەيىنگى ەل اراسىنداعى ايتىستىڭ ءتىپتى باسەڭدەيتىن ءتۇرى جوق. ارينە، اتى جەر جارىپ تۇرعان جىلدىڭ قورىتىندى ايتىسى بولعاندىقتان، ونىڭ ۇستىنە جەڭگەن اقىن التىن دومبىرانىڭ يەسى اتاناتىندىقتان، اقىندار بارىن دا سالدى، جانىن دا سالدى. الەۋمەتتىك جەلىدەگى اڭگىمەگە قاراعاندا ايتىستا ايتىلماعان اڭگىمە قالماعان سياقتى. ەلدىڭ مۇڭىن مۇڭداپ، جوعىن جوقتاپ، اششى شىندىعىن ايتىپ ءاربىر اقىنى ايانىپ قالماعان ەكەن.

سىرتتان قاراعان سول زالداعى حالىقتىڭ تولقىنى، ايعايىن كورىپ، ءدال وسى ايتىستىڭ اناۋ-مىناۋ وبلىستا ەمەس، وسى ايتىستىڭ استانانىڭ تورىندە ءوتۋىنىڭ ءوزى حالىق پەن بيلىكتىڭ بىر-بىرىنە ءسال بولسا دا جاقىن كەلۋىنىڭ كورىنىسى بولدى. ەندى اقىنداردىڭ سوزىنە قاراعاندا بۇل ايتىستى ارنايى ءبىر دەمەۋشىلەر وتكىزىپ جاتىر-اۋ دەگەن ويعا قالدىق. كەيىن ءمالىم بولعانداي، بۇل ايتىستىڭ وتۋىنە جانە دەمەۋشىلىك جاساعان ۇكىمەتتىڭ ءوزى ەكەنىن، ونىڭ ىشىندە مادەنيەت جانە سپورت مينيسترلىگى ەكەنىن ءارى مينيستر ارىستانبەك مۇحامەدي ۇلى ەكەنىن بىلگەندە تاڭ قالعانىم راس. ءارى ارەكەڭنىڭ تاپجىلماي وتىرىپ، ءبىر كۇن ايتىس كورگەندىگى ءتىپتى كۇمانىمدى سەيىلتتى. ەندى ءوزى بيلىك وكىلى ءارى وسى ايتىستىڭ ۇيىتقىسى بولعاندىقتان.

اقىندار تاراپىنان دا، حالىق تاراپىنان دا ايتىلعان ءسوز قىسىمىنىڭ ارىستانبەك مۇحامەديۇلىن اينالىپ وتپەسى اقيقات. دىندە دە ايتۋشىنىكى سۇننەت، تىڭداۋشىنىكى پارىز دەگەندەي، ايتىلعان دۇنيەنىڭ ءتۇيىنى، سول زالدا وتىرعان بيلىك قاۋىمىنىڭ جالعىز وكىلى ارەكەڭە تىرەلەتىندىگى، بۇكىل مۇڭ-زاردى جالعىز ءوزى كوتەرىپ، ءسوز قىسىمىنا شىداي الماي سول زالدان شىعىپ كەتپەي ءارى سابىر ساقتاپ، اياعىنا دەيىن كۇتكەندىگىنە ءوز باسىم ريزا بولدىم. ءيا، ريناتتان باستاپ اقىندار سويقان ايتىس جاسادى. ايقايلاپ جەتەر جەرىنە جەتكىزىپ ايتقان اقىنداردان باستاپ، قيقۋلاپ ەموسياعا بەرىلىپ وتىرعان قاسيەتىڭنەن اينالايىن. 

قارا حالىقتىڭ نالاسىنان ارىستانبەك مىرزا بولماسا، اناۋ-مىناۋ بيلىك وكىلى  الدى-ارتىنا قاراماي تايىپ تۇرار ما ەدى، كىم ءبىلسىن. ول ول ما، وسىناۋ ەلدىڭ مۇڭىن قولىنا دومبىرا السا، تولاسسىز مۇڭداي جونەلەتىن اقىنداردىڭ ەڭبەگى مەن ەرلىگىن ەسكەرىپ، توعىز اقىنعا قاتارىنان «مادەنيەت سالاسىنىڭ ۇزدىگى» اتاقتارىمەن ماراپاتتاۋ – تاۋەلسىز ەلدىڭ تاريحىندا بولماعان قۇبىلىس. قىسقاسى، بيلىك حالىقپەن جاقىن بولۋى كەرەك دەگەن قاعيدانى  ۇستاناتىن كۇن جەتتى جانە وسى جولدا تىنىمسىز ەڭبەك ەتىپ جۇرگەن ارىستانبەك سەكىلدى ازاماتتاردىڭ ۇستانىمى وزگە دە اتقا مىنەرلەرگە ساباق بولسا ەكەن. ال، جالپى ۇنەمى سىن ساداعىنىڭ وتىندە جۇرسە دە، تىنىمسىز ەڭبەگىمەن ات ۇستىندە جۇرەتىن ارەكەڭ نەندەي ەڭبەگىمەن ۇزدىك بولدى دەسەڭىز، ونى دا ايتايىن. بيىلعى جىلدىڭ وزىندە مادەنيەت جانە سپورت مينيسترلىگىنىڭ ۇيىمداستىرۋىمەن بيىل «رۋحاني جاڭعىرۋ» اياسىندا كوپتەگەن يگى شارالار ىستەلدى. «جاھاندىق الەمدەگى زاماناۋي قازاقستاندىق مادەنيەت» اتتى قازاقستاننىڭ مادەنيەتى مەن ادەبيەتىنىڭ حالىقارالىق فورۋمى ءتورت ەلدە – سەۋلدە،  لوندوندا، بەرليندە جانە نيۋ-يورك قالالارىندا ءوتتى. سونىمەن قاتار ەل كۇنتىزبەسىندە جاڭا مەرەكە – دومبىرا كۇنى ەنگىزىلىپ، مادەنيەت ءمينيسترى ارىستانبەك مۇحامەدي ۇلى ۇلتتىق دومبىرا كۇنىن كەڭ كولەمدە اتاپ وتۋگە مۇرىندىق بولدى. استانادا العاش رەت اتالىپ وتكەن دومبىرا كۇنىنە ەلىمىزدىڭ تۇكپىر-تۇكپىرىنەن 2 مىڭنان استىم كۇيشى كەلىپ قاتىستى. جانە ءىرىلى-ۇساقتى، كوزگە كورىنەتىن، كورىنبەيتىن قانشاما ەڭبەكتەرى بار. بىرەۋى بىلسە، بىرەۋى بىلمەس دەگەندەي.  سوندىقتان دا ءوز باسىم ارىستانبەك مۇحامەديۇلىنا مىقتى دەنساۋلىق، ءساتتى قىزمەت تىلەيمىن. ۇلتتىق ونەر ايتىستىڭ دا، كينو، تەاتر سالاسىنىڭ دا، سپورتتىڭ سان الۋان تۇرلەرىنىڭ وسىپ-وركەندەۋىنە ۇلەسىڭىزدى قوسىپ جۇرە بەرىڭىز.

باقىت تۋشايەۆتىڭ فەيسبۋك پاراقشاسىنان