قىرعىزستان جوعارعى كەڭەشىنىڭ بۇرىنعى ءتوراعاسى احماتبەك كەلدىبەكوۆ، سونداي-اق ساياساتكەرلەر ازىمبەك بەكنازاروۆ جانە كەڭەشبەك دۇيشەبەكوۆ ەكس-پرەزيدەنت المازبەك اتامبايەۆ پەن رنىڭ «اپرەل» تەلەارناسىن  سوتقا بەردى.

اتالعان تەلەارنانىڭ تىلشىسىنە سۇحبات بەرگەن قىرعىزستاننىڭ بۇرىنعى پرەزيدەنتى جوعارىداعى ءۇش ازاماتتى «جەمقورلىققا قاتىسى بار» دەپ اتادى. اتامبايەۆتىڭ ايتۋى بويىنشا، جوعارعى كەڭەشتىڭ ءتوراعاسى كەلدىبەكوۆ ەلدى تالان-تاراجعا سالۋعا جول بەردى، ول سپيكەر بولعان كەزدە پارلامەنتتە قابىلدانعان زاڭدار ءالسىز بولدى، سونى پايدالانعان ۇرىلار ەلدى تونادى. وعان تىكەلەي كەلدىبەكوۆتىڭ ءوزى كىنالى. ءسويتىپ، ءقازىر  وزدەرى دە ابدەن بايىپ الدى» دەپ مالىمدەدى.  

–ەندى ولار ماعان قارسى شىعىپ، «اتامبايەۆتىڭ ءوزىن سوتتاۋ كەرەك» دەپ جاتىر. مەنى ەمەس، مەملەكەتتىڭ بايلىعىن توناپ، تەز بايىعان وسىنداي مۋلتيميلليونەرلەردى سوتتاۋ قاجەت. قازىرگى پرەزيدەنتتىك بيلىك وسىنداي ۇرى-قارىلارمەن اۋىز جالاسىپ وتىر. ءتىپتى ولاردى جاسىرىن قولدايدى، – دەدى قىرعىزدىڭ ەكس-پرەزيدەنتى المازبەك اتامبايەۆ.

پرەزيدەنتتىك تاقتان تۇسكەننەن كەيىن ەلدە  اتامبايەۆتى جەك كورۋشىلەردىڭ سانى ارتا تۇسكەندەي. ءتىپتى قىرعىز ەليتاسى اراسىندا دا تەكەتىرەس كۇشەيىپ بارادى. المازبەكتىڭ ءبىرجاقتى ايتقان وسىنداي  پىكىرلەرى ارينە ساياساتكەرلەردىڭ نارازىلىعىن تۋدىرۋدا.

ءبىراق اتامبايەۆ قىرعىزستان ءۇشىن باستى ماسەلە – حالىقتىڭ بىرلىگى مەن تۇراقتىلىق جانە بەيبىتشىلىك دەپ سانايدى.

–قۇداي ساقتاسىن، ەگەر ءقازىر  2005 جىلعى ناۋرىز نەمەسە ءساۋىر توڭكەرىسى قايتالاناتىن بولسا، وندا حالىققا وتە قيىن بولادى. ودان تەك ازىمبەك بەكنازاروۆ پەن كەڭەشبەك  دۇيشەبەكوۆ قانا ۇتادى، سولار عانا پايدا تابادى، – دەيدى اتامبايەۆ.  

ءدال وسى سوزدەرى ءۇشىن قىرعىزدىڭ ەكس-پرەزيدەنتى مەن ونىڭ «اپرەل» تەلەارناسىن سوتقا بەرگەن ۇشەۋ وزدەرىنە دالەلسىز ءتىل تيگىزگەنى ءۇشى 257 مىڭ دوللار تالاپ ەتىپ وتىر. الداعى كۇندەرى بولاتىن سوتتا قاي جاق جەڭىپ شىعاتىنىن ۋاقىت كورسەتەدى، ءبىراق ەكى تاراپ تا قايتپايتىن سەكىلدى.

ايتا كەتۋ كەرەك، اتامبايەۆقا ايىپ تاعىپ وتىرعان قىرعىزدىڭ ءۇش ساياساتكەرى ەكس-پرەزيدەنتتىڭ ءوز ءادىسىن وسىلاي وزىنە قارسى قولدانباق. بۇعان دەيىن المازبەك اتامبايەۆ ءوزى جاقتىرمايتىن ب ا ق وكىلدەرىن «ارانداتۋشىلار» دەپ اتاعانى بەلگىلى. ونىڭ پرەزيدەنتتىك بيلىگى تۇسىندا ەلدەگى  «ازاتتىق»، «زانوزا» جانە تاعى باسقا باسىلىمدار جابىلىپ، ءبىرقاتار جۋرناليستەر قۋدالاۋعا ۇشىرادى.

قازىرگى پرەزيدەنت سورونباي جەەنبەكوۆتىڭ  كومانداسىندا اتامبايەۆتىڭ بىردە - ءبىر ادامى قالعان جوق. ولاردىڭ ءبىرقاتارى جەمقورلىق ارەكەتتەرى ءۇشىن ۇستالدى، قامالدى، سوتتالدى. ءتىپتى ونىڭ سوسيال-دەموكراتيالىق پارتياسى ەكىگە ءبولىنىپ كەتتى. ولاردىڭ ءبىرقاتارى اتامبايەۆتى جاقتاسا، جارتىسى قازىرگى پرەزيدەنتتىك بيلىكتى قولداپ وتىر.

ال اتامبايەۆتىڭ قازىرگى ارەكەتى ءوزىن اقتاۋ ءۇشىن جاسالىنىپ جاتقان اقىرعى جانتالاس سەكىلدى...