الماتىدا ءۇش بىردەي ادامنىڭ ءومىرىن جالماعان جول اپاتىنا قاتىستى تەرگەۋدى ق ر ىشكى ىستەر مينيسترلىگى ءوز باقىلاۋىنا الدى دەپ حابارلادى مينيسترلىكتىڭ رەسمي وكىلى الماس سادۋبايەۆ.
ەسكە سالايىق، 29 جەلتوقسان كۇنى تاڭەرتەڭ Mercedes-Benz Gelandewagen جول تالعامايتىن اۆتوكولىگى باعدارشامنىڭ قىزىل ءتۇسى جانىپ تۇرعانىنا قاراماستان اسا جوعارى جىلدامدىقپەن قيىلىستان جۇيىتكىپ وتپەك بولىپ، Mitsubishi اۆتوكولىگىن سوققان بولاتىن. سوققىنىڭ قاتتى بولعانىنان زارداپ شەككەن كولىكتە وتىرعان ءتورت ادامنىڭ ۇشەۋى قايتىس بولدى. ولاردىڭ ءبىرى كولىك جۇرگىزۋشىسى بولسا، ەكەۋى جولاۋشى.
Mercedes-Benz اۆتوكولىگىنىڭ جۇرگىزۋشىسى مەن جولاۋشىلارى وقيعا ورنىنان قاشىپ كەتكەن. كۇنى كەشە الماتى قالالىق پوليسيا باسقارماسى قاشقان جۇرگىزۋشىنىڭ ۇستالعانىن ايتتى. الايدا، كۇدىكتىنىڭ كىم ەكەنىن جاريالاعان جوق. بۇل ءوز كەزەگىندە قوعام بەلسەندىلەرىنىڭ نارازىلىعىن تۋدىرۋدا. ەكس-دەپۋتات جانە ق ر بعم بۇرىنعى ۆيسە-مينيسترى مۇرات ابەنوۆ، جۋرناليست گۇلجان ەرعالييەۆا سىندى ازاماتتار جول اپاتىن جاساعان جۇرگىزۋشىنىڭ ىقپالدى ادام بولۋى جانە جازادان سىتىلىپ كەتۋى مۇمكىن ەكەنىن جازۋدا.
الايدا، ق ر ءىىم رەسمي وكىلى الماس سادۋبايەۆ مينيسترلىك اتالعان ءىستى ءوز باقىلاۋىنا العانىن مالىمدەدى.
"مارقۇمداردىڭ وتباسىنا قايعىرا كوڭىل ايتامىن. ال، جاراقات العان ناۋقاستىڭ تەزىرەك جازىلىپ كەتۋىن تىلەيمىن. تەرگەۋ ءبولىمى جول اپاتىن جان-جاقتى تەكسەرۋ ۇستىندە جانە وعان كۇمان كەلتىرەتىن ەشقانداي سەبەپ جوق، ءىس باقىلاۋدا"، - دەدى سادۋبايەۆ.
پىكىر قالدىرۋ